Apocalipsis

7 Patil la kil chantul chʼul-abatetik te tekʼajtik ta schanxujkul te balumilale, yakik ta skomel te chaneb ikʼ ta schanxujkul te balumilal yuʼun jich maba ya xbeen ikʼ ta balumilal, ta mar sok ta teʼetik. 2 Jaʼnix jich la kil yan chʼul-abat te yak ta moel tal te banti ya xlokʼ tal te kʼajkʼale yichʼoj te sello yuʼun te kuxul Dios, sok tulan la yawtay te chantul chʼul-abatetik te yichʼojik yaʼtelik ta yakʼbeyel swokol te balumilal sok te mare. 3 Jich la yaltiklanbey: «¡Ma xa awakʼbeyik swokol te balumilal, te mar sok te teʼetik jaʼto te kʼalal ya kakʼbeytik sello ta stiʼbaik te j-abatetik yuʼun te Dios kuʼuntike!».

4 La kaʼiy stojol te jayebik ta tul te machʼatik la yichʼ selloilike: jaʼ 144 mil ta tul te la yichʼik selloilik ta spisil te stsʼumbal te snichʼnab Israel.

9 Ta patil la kil kʼax bayal ta tul ants winiketik te maʼyuk machʼa ya xjuʼ ya yajtay. Talemik ta spisil ta chajp nacionetik, tsʼumbaliletik, lumetik sok kʼopiletik, tekʼajtik ta stojol te mukʼul naktajibal sok ta stojol te Jkolel* Tuminchij. Slapojik najtil sakal kʼuʼul sok stuchtiklanojik yabinal palmera ta skʼabik. 10 Jich tulan yakik ta aw: «¡Te jkoleltik jaʼ ta swenta te Dios kuʼuntik, te nakal ta mukʼul naktajibal, sok ta swenta te Jkolel* Tuminchij!».

11 Spisil te chʼul-abatetik tekʼajtik ta sjoyobal te mukʼul naktajibal sok ta sjoyobal te mamaletik soknix te chantul querubinetik;* la spajkan sbaik ta stojol te mukʼul naktajibal jich la yichʼik ta mukʼ te Diose. 12 Jich yakik ta yalel: «¡Jichuk! Te Dios kuʼuntik te ay spʼijil yoʼtan, yuʼel sok yip, akʼa yichʼ albeyel yutsilal, akʼa yichʼ albeyel yutsil skʼoplal, albeyel wokol sok ichʼel ta mukʼ ta sbajtelkʼinal. Jichuk».

13 Tey-abi ay jtul ta yolil te mamaletik te jich la sjojkʼoybone: «¿Machʼatik-a te slapojik sakal najtil kʼuʼule? ¿Banti talemik?». 14 Jich la kalbey ta oranax: «Kajwal, jaʼat ya anaʼ». Jich la yalbon: «Jaʼik te machʼatik kolik lokʼel tal ta tulan wokolil; la sakʼikix te snajtil kʼuʼik sok la sakubtesikix ta swenta schʼichʼel te Jkolel* Tuminchij. 15 Jaʼ yuʼun ayik ta stojol te mukʼul naktajibal yuʼun te Dios sok ta kʼajkʼal ajkʼabal ya spasik chʼul aʼtelil ta templo yuʼun. Te machʼa nakal ta mukʼul naktajibal ya slichʼ bael te nailpakʼ yuʼun ta stojolik.* 16 Maba ya xwiʼnajikix sok maba ya yaʼiyikix takintiʼil; maba ya yaʼiybeyikix skʼuxul te kʼajkʼal sok maba ya xwoklajikix yuʼun te skʼixinale. 17 Melel te Jkolel* Tuminchij te ay ta yolil te mukʼul naktajibale, yame skanantay sok yame stojobteslan bael ta slokʼib jaʼetik yuʼun kuxlejalil. Sok yame xkustiklanbot yaʼlel sitik yuʼun te Diose».