Te lek yachʼil kʼop ya yal te Marcos

5 Tey-abi kʼotik ta jejch mar ta skʼinal te gerasenoetik. 2 Te kʼalal ko ta barco te Jesuse, tal ta tael yuʼun jtul winik te ochem pukuj ta yoʼtan te lokʼ tal ta mukenaletik, 3 melel tey nainem ta mukenaletik. Ta yorail-abi, maʼyuk machʼa juʼem yuʼun schukel ni jaʼuk ta cadena. 4 Bayal buelta la schukbeyik yok skʼab ta cadena, pero spisil-ora la stuchʼtiklan. Maʼyuk machʼa la stabey yip yuʼun ya schukik. 5 Ta kʼajkʼal ajkʼabal ya xbeen ta mukenaletik sok ya x-awun ta witstikil soknix ya yejchentes sba ta tonetik. 6 Pero, te kʼalal namalto* la yil te Jesuse, bajt ta animal sok la snijan sba ta stojol. 7 Jich tulan awun: «¿Bin awentaon-a, Jesús, te sNichʼanat Dios te toyol aye? Ala ta jamal ta stojol Dios te maba ya awakʼbon jwokole». 8 Yuʼun jich albilix yuʼun-a te Jesuse: «Jaʼat, pukuj, lokʼan ta yoʼtan te winike». 9 Te Jesús jich la sjojkʼoybey te winike: «¿Bin abiil?». «Legión* te jbiile, melel bayalonkotik», xchi. 10 Bayal buelta la skʼanbey wokol te Jesús te manchuk ya xtikunot bael ta yan lugar.

11 Tey-abi ay bayal ta kojt chitametik te yakik ta weʼel ta witstikil. 12 Te pukujetik jich la skʼanbeyik wokol te Jesuse: «Akʼawonkotik ochel ta chitametik». 13 Jich la yakʼ permiso te Jesús yuʼun ya xbajt ochukik tey-a. Jich te pukujetik lokʼik ta yoʼtan te winike, ochik ta chitametik. Spisil te chitametik la schʼoj sbaik koel ta sjemelul kʼinal ta mar. Ayniwan 2 mil ta kojt chitametik te la sjikʼik* jaʼe. 14 Te jkananchitametik lokʼik bael ta anel sok bajt spukik ta alel ta mukʼul lum sok ta sjoyobal, jich te ants winiketike bajt yilik te bin kʼot ta pasele. 15 Te kʼalal kʼotik te banti ay te Jesuse, tey la yilik-a te winik te uʼuninbil yuʼun-a te bayal pukujetik te Legión* sbiile. Nakal kʼot staik. Slapojix skʼuʼ sok ya snaʼix kʼinal-a, bayal xiwik yuʼun te kʼalal la yilike. 16 Te machʼatik la yilik te bin kʼot ta pasel ta stojol te winik te ochem pukujetik ta yoʼtan-ae soknix te bin kʼot ta stojol te chitametike, la scholbeyik yaʼiy te yantik spisil te bin-utʼil kʼot ta pasele. 17 Jich yuʼun, te ants winiketik la skʼanbeyik wokol te Jesús te yakuk xlokʼ bael ta slumalike.

18 Te kʼalal yak ta ochel ta barco-a te Jesuse, te winik te ochem pukujetik ta yoʼtan-ae la skʼanbey wokol te Jesús te yakuk sjokin baele. 19 Pero, te Jesús ma la skʼan la yikʼ bael sok jich la yalbey: «Baan ta ana, baan sok te machʼatik ay awuʼun sok cholbeya yaʼiy spisil te bintik la spas Jehová* ta atojol sok te bin-utʼil la snaʼbat yoʼbolil abae». 20 Jich bajt te winike, bajt spuk ta alel ta Decápolis* spisil te bin la spas Jesús ta stojole. Chamnax yoʼtanik* yuʼun spisil te ants winiketike.

21 Te Jesús chaʼsujt bael ta jejch mar. Te kʼalal ayix ta stiʼil mar-ae, tal ta joytayel yuʼun kʼax bayal ta tul ants winiketik. 22 Tal ta stojol Jesús jtul jwolwanej yuʼun te sinagoga te Jairo sbiile. Te kʼalal la yil te Jesuse, la skejan sba ta stojol 23 sok jich bayal buelta la yalbey wokol: «Te kantsil nichʼane yakix ta lajel. Laʼ, awokoluk, kajanbon akʼab ta stojol yuʼun jich ya xlekub sok maba ya xlaj». 24 Jich te Jesús la sjokin bael te winike. Ay bayal ants winiketik te la stʼunik baele sok stenten-nax sbaik ta spat.

25 Ay jtul ants tey-a te ayix 12 jaʼbil te ma xkejchaj ta yilel te schamele. 26 Bayalix buelta baem ta stojol te jpoxtaywanejetik, pero jaʼnax akʼbil swokol yuʼun. Lajemix spisil-a te stakʼine, pero maʼyuk lekuben, jaʼnax yak ta batsʼejel. 27 Te bitʼil yaʼiyoj stojol te bin ya yalik ta stojol te Jesuse, la schʼik sba ochel ta yolil te ants winiketike, noptsaj* bael ta spat te Jesús sok la spikbey te snajtil kʼuʼe, 28 melel jich la yal: «Teme jaʼnax ya jpikbey te skʼuʼe, ya xlekubon». 29 Oranax kejchaj te schamele sok la yaʼiy te lekub ta swenta te chamel te bayal ya x-akʼbot swokol yuʼune.

30 Ta oranax la yaʼiy te Jesús te lokʼ yuʼele, jich yuʼun la sut sba ta yilel te ants winiketike sok jich la sjojkʼoy: «¿Machʼa la spikbon te jkʼuʼe?». 31 Pero, te jnopojeletik jich la yalik: «Ya awil te bayal ants winiketik yak stenbelate... ¿bin yuʼun te ya ajojkʼoy te machʼa la spikate?». 32 Manchukme jich-abi, la sle yil ta sjoyobal te machʼa pikot yuʼune. 33 Te ants te lekubenixe jajch ta nijkel yuʼun xiwel. Jich noptsaj* bael ta stojol te Jesuse, la skejan sba ta stojol sok la yalbey ta jamal te bin la spase. 34 Jich albot yuʼun te Jesús: «Kantsil nichʼan, lekubatix ta swenta te schʼuunel awoʼtane. Lamalukme awoʼtan ya xbaat, kolatix ta swenta te chamel te bayal la yakʼbat awokole».

35 Te kʼalal yakto ta kʼop-a te Jesús, kʼotik chaʼoxtul winiketik te talemik ta sna te jwolwanej yuʼun te sinagoga, jich jul yalbeyik: «Lajix te awantsil nichʼane. ¿Bin yuʼun ya awutsʼinxan te Maestroe?». 36 Te Jesús la sta ta aʼiyel te bin yakik ta yalele, jaʼ yuʼun jich la yalbey te jwolwanej yuʼun te sinagoga: «Mame xiwat, jaʼnax ayuk schʼuunel awoʼtan». 37 Te Jesús jaʼnax la yikʼ bael te Pedro, Santiago sok te Juan te jun sme’ statike.

38 Te kʼalal kʼotik ta sna te jwolwanej yuʼun te sinagogae, te Jesús la yil te ants winiketik te x-awetik ta okʼel. 39 Te kʼalal och bael ta yutil te nae, jich la yaltiklanbey: «¿Bin yuʼun te x-awetex ta okʼele? Te chʼin achʼixe maba lajem, wayalnax». 40 Te kʼalal jich la yaʼiyik stojole, jajch stseʼlayik yuʼun ya slabanik te Jesuse. Pero, te Jesús la stikunlan lokʼel spisil te ants winiketike, och bael tey-a te banti ay te chʼin achʼixe, jokinbil ochel yuʼun te smeʼ stat soknix te jnopojeletik te jokinbil yuʼune. 41 Tey-abi la stsakbey skʼab te chʼin achʼixe sok jich la yalbey: «Tálitha cúmi» te ya skʼan ya yal «chʼin achʼix, joʼon ya kalbat: ¡jajchan!». 42 Ta oranax jajch te chʼin achʼix sok jajch ta beel. (12 yaʼbilal-a). Te kʼalal jich la yilike, chamnax yoʼtanik* yuʼun sok tseʼelnax yoʼtanik yuʼun. 43 Pero, te Jesús bayal buelta la yaltiklanbey ta mantal te manchuk ayuk machʼa ya yalbeyike, jaʼnix jich la yaltiklanbey te akʼa yakʼbeyik sweʼel te chʼin achʼixe.