Te lek yachʼil kʼop ya yal te Lucas

20 Jun buelta te Jesús te kʼalal yak ta snojptesel te ants winiketik ta templo sok te yak ta yakʼel ta nopel te lek yachʼil kʼope, tey kʼotik-a te jwolwanej sacerdoteetik, te escribaetik sok te jwolwanejetik yuʼun te judioetike, 2 jich la sjojkʼoybeyik: «Ala kaʼiykotik, ¿bin awaʼtel awichʼoj ta spasel ini? ¿Machʼa la yakʼbat awaʼtel ta spasel?». 3 Jich la yal te Jesús: «Ay bin ya jojkʼoybeyex-euk, akʼbonik te sujtibe. 4 ¿Machʼa tikunot yuʼun ta yakʼel ichʼjaʼ* te Juane? ¿Jaʼbal te Diose, o jaʼbal te ants winiketike?». 5 Jich jajch yalbey sbaik: «Teme ya kalbeytik te jaʼ tikunot yuʼun te Diose, yame yalbotik: ‹¿Bin yuʼun ma la achʼuunbeyikix skʼop-a jiche?›. 6 Pero, teme ya kaltik te jaʼ tikunot yuʼun te ants winiketike, yame schʼojotik ta ton te jlumaltike, melel spisil schʼuunojik te yuʼun-nix j-alwanej-a te Juane». 7 Jaʼ yuʼun la yalik te ma snaʼike. 8 Jich albotik yuʼun te Jesús: «Jaʼnix jichon-euk maba ya kalbeyex te machʼa la yakʼbon kaʼtel ta spasel ini».

9 Tey-abi jajch yalbey yaʼiy te ants winiketik te lokʼombakʼop ini: «Ay jtul winik te la stsʼun tsʼusub ta skʼinal sok la yakʼbey jilel skanantay te j-aʼteletike, jich bajt ta yan lum, jalaj tey-a. 10 Ta yorail stulbeyel sit te tsʼusube, la stikun jtul j-abat yuʼun ta stojol te j-aʼteletik swenta ya skʼanbey tal te bin ya yichʼ-euke. Pero, te j-aʼteletik bayal la smajik te j-abate, maʼyuk bin la yakʼbeyik bael. 11 Te winik la schaʼtikun bael yan j-abat yuʼun. Jaʼnix jich la smajik, la skʼexlaltesik sok maʼyuk bin la yakʼbeyik bael. 12 Jaʼnix jich la stikunxan bael yan j-abat, yoxebalix-abi. Jaʼnix jich la yejchentesik sok la schʼojik lokʼel. 13 Te yajwal te tsʼusubiltik jich la yal: ‹¿Bin ya jpasix-a? Ya jtikun bael te jnichʼan te mero kʼux ta koʼtane. Yaniwan yichʼbonik ta mukʼ stukel›. 14 Te kʼalal la yilik te j-aʼteletike, jich la yalbey sbaik: ‹Jaʼ te machʼa ya yichʼ jilel spisil te kʼinale. Akʼa jmiltik, jichme ya kichʼbeytik spisil te bin ay ta swentae›. 15 Jich la slokʼesik bael te banti ay te tsʼusubiltike sok la smilik. Jich yuʼun, ¿bin ya xbajt spas te yajwal te tsʼusubiltike? 16 Yame xtal smil te j-aʼteletik sok yame yakʼbey jilel ta skʼab yantik j-aʼteletik te tsʼusubiltike».

Te kʼalal la yaʼiyik stojol ini, jich la yalik «¡Mame ayuk bin-ora jich ya xkʼot ta pasel!». 17 Te Jesús la yiltiklanbey sitik sok jich la yal: «¿Bin ya skʼan ya yalix-a te jich tsʼibaybile: ‹Te ton te la spʼajik te jpasnaetike jaʼ te mukʼul ton te ya yakʼbey yiptajib te sjol na›?, te xchie. 18 Machʼauk-a te ya xyal ta sba te ton ini yame sta tulan yejchen. Teme ay machʼa ya xchʼay koel tal ta sba te ton ini, juchʼbil ya xjil ta jkʼaxel».

19 Jich yuʼun, te escribaetik sok te jwolwanej sacerdoteetik kʼan stsakik ta oranax te Jesús, melel la snaʼik stojol te jaʼ skʼoplalik te lokʼombakʼop la yale. Pero la xiʼik te ants winiketik yuʼun te lume. 20 Te kʼalal laj yoʼtanik ta yilel ta lek te Jesús, la smuken tojik chaʼoxtul winiketik te toj yoʼtan ya skuy sbaik yuʼun ya slebeyik smul te Jesús ta swenta te bin ya yale. Te bin ya skʼanike, jaʼ te ya yakʼbeyik ta skʼab te machʼatik yichʼoj mukʼ yaʼtelik sok ta skʼab te ajwalile. 21 Jich la sjojkʼoybeyik: «Maestro, jnaʼojkotik te leknax ya xkʼopojat, toj ya xnojpteswanat sok maʼyuk machʼa ya atsa, smelelil te bin ya awakʼ ta nopel ta swenta te Diose. 22 ¿Stojilbal teme ya jtojbeytik jpatantik te César, o maʼuk?». 23 Pero, kʼalal la snaʼ stojol te Jesús te ay spʼijilik ta loʼlaywaneje, jich la yaltiklanbey: 24 «Akʼbonik kil junuk denario.* ¿Machʼa slokʼomba ini sok machʼa sbiil te liʼ tsʼibaybile?». «Jaʼ te César», xchiik. 25 Jich albotik yuʼun: «Yame skʼan ya awakʼbeyik te César te bin jaʼ yuʼun César, pero akʼbeyaik te Dios te bin jaʼ yuʼun te Diose». 26 Pero maba juʼ yuʼunik slebeyel smul ta stojol te ants winiketik ta swenta te bin la yale. Chamnax yoʼtanik* yuʼun te bitʼil la sute, maʼyuk bin la yalikix-a.

27 Tey-abi talik te saduceoetik te ya yalik te maʼyuk chaʼkuxajele, jich la sjojkʼoybeyik te Jesuse: 28 «Maestro, te Moisés jich la stsʼibaybotik jilel: ‹Teme ay jtul winik te ya xlaj te sbankile teme maʼyuk jilel yal snichʼnab sok te yiname, te winik ini yame skʼan ya yinamin te yinam te sbankile, yuʼun jich ya yakʼbey stsʼumbal te sbankil te laje›. 29 Ay juktul winiketik te jun-nax te smeʼ statike. Te bankilale la sta yinam, pero maʼyuk jilel snichʼan te kʼalal laje. 30 Jaʼnix jich te schebal 31 sok te yoxebal nujpunik sok te antse. Jich kʼot ta stojol ta sjuktululik: maʼyuk jilel yal snichʼnabik te kʼalal lajik baele. 32 Ta patil, jaʼnix jich laj-euk te antse. 33 Jich yuʼun, ta yorail chaʼkuxajel, ¿machʼa ta sjuktulul ya yikʼ yinamin te antse? Melel ta sjuktulul la yinaminik».

34 Jich albotik yuʼun te Jesús: «Te snichʼnab te ants winiketik ta balumilal ini ya xnujpunik sok ya yichʼik akʼel ta nujpunel, 35 pero te machʼatik lek ilbilik yuʼun te Dios te ya staik te kuxlejalil te ya xtal ta patil sok te chaʼkuxajel ta yolil te machʼatik lajemike maba ya xnujpunikix sok maba ya x-akʼotikix ta nujpunel. 36 Jaʼnix jich maba ya xlajikix, melel jich ya xkʼotik te bin-utʼil chʼul-abatetik sok jaʼ yal snichʼnab Dios ya xkʼotik ta skaj te yichʼojik chaʼkuxajtesele. 37 Pero, ta swenta te chaʼkuxajel yuʼun te machʼatik lajemike, jaʼnix jich la yakʼ ta naʼel te Moisés te kʼalal la scholbey skʼoplal ta swenta te jpejt* chʼixe, jich la yal ta stojol te Jehová* te jaʼ ‹Dios yuʼun Abrahán, Dios yuʼun Isaac sok Dios yuʼun Jacob›. 38 Te Diose ma jaʼuk Dios yuʼun te machʼatik lajemikixe, jaʼ Dios yuʼun te machʼatik kuxulike, melel spisil kuxulik ta sit stukel». 39 Te kʼalal jich la yaʼiyik stojol ini, ay chaʼoxtul escribaetik te jich la yalbeyik te Jesús: «Maestro, mero lek la asut». 40 Jich yuʼun, maʼyuk bin la skʼan la sjojkʼoybeyikix.

41 Jich jojkʼoybotik yuʼun te Jesuse: «¿Bin-utʼil ay-a te ya yalik te jaʼ snichʼan David te Cristoe? 42 Melel jaʼnix te David te jich la yal ta libro yuʼun te Salmos: ‹Te Jehová* jich la yalbey te Kajwale: «Naklan ta jwaʼel kʼab 43 jaʼto te kʼalal ya kakʼbat te akontratak jich te bin-utʼil skajtajib awok», te xchie›. 44 Te David la yalbey Kajwal. Jich yuʼun, ¿bin-utʼil ay-a te jaʼ snichʼane?».

45 Te kʼalal yakik ta yaʼiyel spisil te ants winiketik te bin yak ta yalel te Jesuse, jich la yalbey te jnopojeletik yuʼune: 46 «Kanantayame abaik yuʼun te escribaetik te ya smulanik te ya yakʼ sbaik ta ilel sok te snajtil kʼuʼik sok te ya smulanik te ya yichʼik patbeyel yoʼtanik ta mercado soknix ya xnajkajik ta sjajchibal lugaretik ta sinagogaetik, jaʼnix jich te kʼalal ya xbajtik ta kʼine, jaʼ ya smakik te lugaretik te banti ya xnajkajik te machʼatik ichʼbilik ta mukʼe. 47 Ya spojbeyik te bintik ay yuʼun* te meʼba antsetik sok jalnax ya skʼoponik Dios yuʼun-nax ya yakʼ sbaik ta ilel. Ta swenta-abi yame yichʼik tulan castigo».