Te lek yachʼil kʼop ya yal te Lucas

13 Ta yorail-abi ay chaʼoxtul te machʼatik tey ayik-ae la yalbeyik yaʼiy te Jesús te bin la spas te Pilatoe, jaʼ te la skapbey schʼichʼel chaʼoxtul galileoetik sok schʼichʼel te milbil majtanil yuʼunike. 2 Te kʼalal jich la yaʼiy te Jesús, jich la yal: «¿Yuʼunbal ya akuyik te jaʼ bayalxan smulik te galileoetik ini te bitʼil yantik galileoetik te jich kʼot ta stojolike? 3 Jkʼaxel ma jichuk. Teme maba ya asujtes awoʼtanike, jaʼnixme jich ya awichʼik lajinel-euk. 4 Jaxan te kʼalal lajik te 18 ta tul te jin koel tal ta sbaik te tsʼajkʼ yuʼun Siloam, ¿yuʼunbal ya akuyik te jaʼ bayalxan smulik te bitʼil yantik te nainemikxan ta Jerusalene? 5 Jkʼaxel ma jichuk. Teme maba ya asujtes awoʼtanike, jaʼnixme jich ya awichʼik lajinel-euk».

6 Jich yuʼun, te Jesús la yal te lokʼombakʼop ini: «Ay jtul winik te la stsʼun jpejt* higuera ta tsʼusubiltik yuʼun. Bajt yil teme ay site, pero maʼyuk bin la sta. 7 Ta patil, jich la yalbey te jkanantsʼusubiltik yuʼune: ‹Ilawil, ayix oxeb jaʼbil te ya xtalon ta slebeyel sit te higuera ini, pero maʼyuk sit ya jtabey. ¡Tsʼeta lokʼel!, melel tojolnax smakoj te kʼinale›. 8 Jich la yal te jkanantsʼusubiltik yuʼune: ‹Kajwal, akʼa jilukxan junuk jaʼbil tey-a, yame jokʼbey slumil ta sjoyobal sok ya kakʼbey skʼaʼal lumil. 9 Teme ya yakʼ sit ta patile, kʼax lek; teme maʼuke, tsʼeta lokʼel›».

10 Te Jesús yak ta pʼijubteswanej ta jun sinagoga ta skʼajkʼalel sábado. 11 Ay jtul ants tey-a te ayix 18 jaʼbil te akʼbot jilel chamel yuʼun jtul pukuj. Mero kʼujul spat te ma xjuʼ yuʼun te toj ya stejkʼan sbae. 12 Kʼalal te Jesús la yil te ants, la yikʼ tal ta stojol sok jich la yalbey: «Ants, kolematix yuʼun te achamele». 13 Jich te Jesús la skajan skʼab ta stojol, jich oranax toj la stejkʼan sba te antse sok jajch yalbey yutsil skʼoplal te Diose. 14 Kʼalal la yil te bin kʼot ta pasel te jwolwanej yuʼun te sinagoga, ilin yuʼun te lekubteswan te Jesús ta skʼajkʼalel sábado, jaʼ yuʼun jich la yalbey te ants winiketik te jumulik tey-a: «Ay wakeb kʼajkʼal te ya skʼan ya x-aʼtejotike; jaʼ ya skʼan ya xtal awakʼ abaik ta lekubtesel ta yorail-abi, ma jaʼuk ta skʼajkʼalel sábado». 15 Te Kajwaltik jich la yalbey: «Jchaʼlam-oʼtanex,* ¿mabal yakuk atilik* tal te banti chukul awuʼunik te atoroik sok te aburroik yuʼun ya awakʼbeyik yuchʼ jaʼ ta skʼajkʼalel sábado? 16 Jaxan te ants ini te jaʼ stsʼumbal te Abrahán te ayix 18 jaʼbil chukbil yuʼun te Satanase, ¿mabal yakuk xjuʼ te ya yichʼ akʼel ta libre manchukme skʼajkʼalel sábado?». 17 Te kʼalal jich la yal te Jesuse, kʼexawik spisil te skontratake; yan stukel te ants winiketik tseʼelnax yoʼtanik yuʼun te yutsil yaʼtel te Jesuse.

18 Jich la yalxan te Jesús: «¿Bin-a te pajal kʼoem sok te Wentainel* yuʼun te Diose? ¿Bin ya xjuʼ ya jpaj sok-a? 19 Jaʼ jich kʼoem te bin-utʼil jpʼij sbakʼ mostaza* te la stsʼun ta skʼinal jtul winik. Chʼi te sbakʼ awal tsʼunubile, kʼot ta mukʼul teʼ. Tey tal spas spechechik-a te jaʼmal mutetik ta banti te skʼabkʼabe».

20 Jich la yalxan: «¿Bin ya xjuʼ ya jpajbey skʼoplal sok te Wentainel* yuʼun te Diose? 21 Jaʼ jich kʼoem bitʼil levadura te jtul ants la swotsʼ sok bayal harina,* jaʼto te kʼalal la spajubtes skʼolol te harinae».

22 Te kʼalal yak ta bael ta Jerusalén, la sbeentay te mukʼul lumetik sok te chʼin lumetik. Yak ta snojptesel te ants winiketike. 23 Ay jtul winik te jich la sjojkʼoye: «Kajwal, ¿chaʼoxtulnaxbal te machʼatik ya xkolike?». Jich albotik yuʼun te Jesús: 24 «Pasaik tulan te bantito kʼalal ya xjuʼ awuʼunik yuʼun ya x-ochex te banti chʼin-nax sjamalel te tiʼnail, melel bayal te machʼatik ya skʼan ya x-ochik, pero maba ya xjuʼ yuʼunik. 25 Kʼalal te yajwal na ya xbajt smak sok llave te tiʼnaile, te jaʼexe tekʼelme ya xjilex ta fuera ta stijel te tiʼnaile sok jich ya awalik: ‹¡Kajwal, jambonkotik te tiʼnaile!›. Pero, jichme ya yalbeyex: ‹Ma jnaʼ te banti talemexe›. 26 Jichme ya xjajch awalbeyik: ‹Pajal weʼ uchʼotik sok la awaʼiy nojpteswanej ta mukʼul calleetik kuʼunkotik›. 27 Pero, jichme ya yalbeyex: ‹Ma jnaʼ te banti talemexe. ¡Lokʼanik bael ta jtojol, jaʼex te la apasik te bin ma tojuk ta pasele!›. 28 Teyme ya awokʼetay abaik-a sok teyme ya akʼuxuxan aweik-a* te kʼalal ya awilik te ayikix ta Wentainel* yuʼun Dios te Abrahán, Isaac, Jacob sok spisil te j-alwanejetik, pero te jaʼexe awichʼojikix chʼojel lokʼel. 29 Jaʼnix jich yame xtalik ants winiketik te talemik ta slokʼib kʼajkʼal sok ta smalib kʼajkʼal, ta norte sok ta sur, sok ya snajkan sbaik ta weʼel ta banti te Wentainel* yuʼun te Diose. 30 Aʼiya awaʼiyik ini: ayme chaʼoxtul te machʼatik patil ayik te jaʼ nail ya xkʼotik, sok ay yantik te nail ayik te patil ya xkʼotik».

31 Ta yorail-abi tal chaʼoxtul fariseoetik, jich la yalbeyik te Jesús: «Lokʼan bael liʼ ini, melel ya skʼan ya smilat te Herodes». 32 Jich albotik yuʼun: «Baanik, jich xa awalbeyik te wax-abi: ‹Ilawil, yoʼtik sok pajel ya jlokʼeslan pukujetik sok ya jlekubteslan jchameletik. Ta yoxebal kʼajkʼal ya xlaj koʼtan spasel ini›. 33 Pero yatome xbeenon yoʼtik, pajel sok chaʼbej, melel ma xjuʼ ya yichʼ milel jtul j-alwanej teme ma jaʼuk ta Jerusalén. 34 Jerusalén, Jerusalén, te ya smil te j-alwanejetik sok te ya schʼojik ta ton te machʼatik ya xtikunot ta stojole..., ¡bayal buelta kʼan jtsob te awal anichʼnab jich bitʼil ya stsob ta yeʼtal xikʼ te yalatak te meʼ mute! Pero, te jaʼexe ma la akʼanik. 35 Yame yichʼ ijkitayel te templo ini sok jaʼex ya awichʼik jilel. Jamal ya kalbeyex te maba ya awilonikix jaʼto kʼalal ya awalik: ‹¡Bin-naxme yutsil te machʼa yak ta talel ta sbiil te Jehová!›».*