Te lek yach’il k’op ya yal te Juan

17 Te kʼalal laj yoʼtan ta yalel ini, te Jesús la stoy moel sit ta chʼulchan sok jich la yal: «Jtat, kʼotix yorail. Akʼbeya yutsilal te anichʼan yuʼun jich ya yakʼbat awutsilal-euk te anichʼane, 2 jich bitʼil la awakʼbey ta skʼab spisil te ants winiketik yuʼun jich ya yakʼtiklanbey skuxlejal ta sbajtelkʼinal spisil te machʼatik la awakʼbey ta stojole. 3 Jichme ya sta skuxlejalik sbajtelkʼinal te ants winiketik: te ya snaʼbat aba te jaʼatnax te smelelil Diosate, sok te ya snaʼbeyik sba-euk te Jesucristo te tikunbil tal awuʼune. 4 Te joʼone la kalbatix awutsilal ta balumilal; juʼix ta pasel kuʼun te aʼtelil la awakʼbon jpase. 5 Ta ora ini, jTat, akʼbon kutsilal ta atsʼeel jich te bin-utʼil ay kutsilal ta atsʼeel-a te kʼalal mato ayuk-a te ants winiketike.

6 »La kakʼbeyix snaʼik te abiil te machʼatik la awakʼbon te ayik ta balumilal. Jaʼik awuʼun-a, pero la awakʼbon, sok schʼuunojik te akʼope. 7 Ta ora ini la snaʼikix te jaʼ talem ta atojol spisil te bintik la awakʼbone; 8 melel la kakʼbeyix snaʼik te akʼop te la awalbone, schʼuunojikix sok snaʼojikix te talemon ta swenta abiile, sok schʼuunojik te jaʼat la atikunon tale. 9 Ya jkʼanbat wokol ta stojolik; ma jaʼuk ya jkʼanbat wokol ta stojol te ants winiketik ta balumilale, jaʼ ya jkʼanbat wokol ta stojol te machʼatik la awakʼbone, melel jaʼik awuʼun; 10 spisil te bintik ay kuʼun jaʼ awuʼun, sok spisil te bintik ay awuʼun jaʼ kuʼun-euk, sok la kichʼ akʼbeyel kutsilal ta swentaik.

11 »Te joʼone maba ayonix ta balumilal, pero ayik ta balumilal stukelik, sok ya xboonix ta atojol. Chʼul jTat, kanantaylana ta swenta te abiil te la awakʼbon kichʼe, yuʼun jich jun-nax ya xkʼotik, jich te bin-utʼil jun-nax ayotik te joʼotike. 12 Te kʼalal jokinlanej-ae, la jkanantaylan ta swenta te abiil te la awakʼbon kichʼe; jkanantaylanoj, ni jtuluk yichʼoj lajinel, jaʼnax te machʼa ya yichʼ lajinele, swenta jich ya xkʼot ta pasel te bin tsʼibaybil jilele. 13 Pero ya xboonix ta atojol, sok jich ya kal ini te bitʼil ayonto ta balumilale yuʼun jich ay ta stojolik te stseʼelil koʼtane. 14 La kakʼbeyix snaʼik te akʼope, pero ya xpʼajotik yuʼun te balumilal, melel maba uʼuninbilik yuʼun te balumilal, jich te bin-utʼil maba yuʼunon te balumilale.

15 »Maba ya jkʼanbat te ya alokʼeslan bael ta balumilal, jaʼ ya jkʼanbat te ya akanantaylan ta stojol te Satanás.* 16 Maba uʼuninbilik yuʼun te balumilal, jichnix te bin-utʼil maba yuʼunon te balumilal. 17 Chʼulteslana* ta swenta te smelelil kʼope; jaʼ smelelil te akʼope. 18 Jich te bin-utʼil la atikunon tal ta balumilal, jaʼnix jich la jtikunlan bael ta balumilal. 19 Ya jchʼultes jba ta swentaik yuʼun jich chʼultesbil ya xkʼotik-euk ta swenta te smelelil kʼope.

20 »Mame jaʼuknax ya jkʼanbat ta stojolik, jaʼnix jich ya jkʼanbat ta stojol te machʼatik ya yakʼ schʼuunel yoʼtanik ta jtojol ta swenta skʼopik te machʼatik schʼuunojonixe, 21 yuʼun jich jun-nax ya xkʼotik ta spisilik. Jich te bin-utʼil jun ayat ta jtojole, jTat, sok te jun ayon ta atojol-euke, te jaʼuknix jich jun ayik ta jtojoltik-euke; jichme ya schʼuunik te machʼatik ayik ta balumilal te jaʼat la atikunon tale. 22 La kakʼbeyix ta stojolik te kutsilal te la awakʼbone, yuʼun jich jun-nax ya xkʼotik jich te bin-utʼil jun-nax ayotik te joʼotike: 23 jich jun ayon ta stojolik sok jun ayat ta jtojol yuʼun jich jun-nax ya xkʼotik ta jkʼaxel-euk. Jichme ya snaʼik te machʼatik ayik ta balumilal te jaʼat la atikunon tal sok te kʼux ya awaʼiytiklan ta awoʼtan jich te bin-utʼil kʼux ya awaʼiyon ta awoʼtane. 24 Jtat, ya jkʼanbat te yakuk sjokinonik te banti ya x-ayinon te machʼatik la awakʼbone yuʼun jich ya yilik te kutsilal te awakʼojbone, melel kʼuxon ta awoʼtan te kʼalal mato ayuk-a te ants winiketike. 25 Jtat te toj awoʼtan atukele, te machʼatik ayik ta balumilal maba ya snaʼbatik aba, pero te joʼone ya jnaʼbat aba sok te machʼatik la awakʼbone ya snaʼikix te jaʼat la atikunon tale. 26 La kakʼbeyix snaʼik te abiile sok yame kakʼxan ta naʼel, swenta yuʼun te skʼuxul awoʼtan te ay ta jtojol jaʼnix jich ayuk ta stojolik-euk soknix te junuk ayon ta stojolike».