Carta ta stojol te Romanoetik

5 Jich bitʼil toj ya kichʼtikix ilel yuʼun te Dios ta swenta te schʼuunel koʼtantike, akʼa jmulantik te lamalkʼinal* ya kaʼiytik ta stojol Dios ta swenta te Kajwaltik Jesucristoe, 2 te jaʼ ta swenta te schʼuunel koʼtantik ta stojol ya xjuʼ ya xnoptsajotik* ta stojol te Dios sok ya xjuʼ ya jmulanbeytik te slekil yoʼtan Dios te ma snujpʼuk ya kichʼtike. Sok tseʼeluk koʼtantik* yuʼun te yakotik ta smaliyel te ya kichʼtik te yutsilal te Diose. 3 Ma jaʼuknax-abi, jaʼnix jich tseʼelukme koʼtantik* te kʼalal ya xkʼaxotik ta wokoliletik, melel jnaʼojtik te kʼalal ayotik ta wokol jaʼ ya skoltayotik swenta ya xkujch kuʼuntik; 4 teme ya xkujch kuʼuntik jaʼ ya yakʼ te lek ya yilotik te Diose; teme lek ya yilotik te Diose, jaʼ ya yakʼ smukʼul koʼtantik; 5 te smukʼul koʼtantik ma xyakʼotik ta kʼexlal, melel malbilix ta koʼtantik te skʼuxul yoʼtan Dios ta swenta te chʼul espíritu* te kichʼojtikixe.

6 Te kʼalal maʼyuk kiptik-ae, la sta yorail te laj te Cristo ta swenta te jmulawiletike. 7 Wokol te ay machʼa ya yakʼ sba ta lajel ta swenta te machʼa toje, pero ayniwan machʼa ya skʼan ya yakʼ sba ta lajel ta swenta te machʼa lek yoʼtane. 8 Pero, te Diose la yakʼ kiltik te skʼuxul yoʼtan ta jtojoltik te kʼalal laj Cristo ta jtojoltik manchukme jmulawilotikto-ae. 9 Jich bitʼil te toj ya kichʼtikix ilel yuʼun Dios ta swenta te schʼichʼel te Jesuse, kʼaxtoxan ya skoltayotik ta stojol te yilinba te Diose. 10 Melel, teme lek la kilix jbatik sok te Dios ta swenta te laj te sNichʼane manchukme jkontrainoj jbatik sok-a, kʼaxtoxan ya jta jkoleltik ta swenta te skuxlejal jich bitʼil te lek ya kilix jbatik sok te Dios ta ora ini. 11 Ma jaʼuknax-abi, jaʼnix jich tseʼel koʼtantik ta stojol Dios ta swenta te Kajwaltik Jesucristo, te jaʼ ta swenta te lek ya kilix jbatik sok te Diose.

12 Jich yuʼun, ta swenta jtul winik och mulil ta balumilal sok ta swenta te mulil och te lajele, jich te lajele kʼax ta stojol spisil te ants winiketik, melel spisil la sta smulik... 13 Melel ayix mulil ta balumilal-a te kʼalal mato ayuk-a te Leye, pero maʼyuk machʼa ya xjuʼ ta lebeyel smul te kʼalal maʼyuk leye. 14 Pero, te lajele la yuʼunin spisil te ants winiketik jaʼto tal ta Adán kʼalalto ta Moisés, manchukme ma jichuk la sle smulik te bin-utʼil la sle smul* te Adán te jteb ma pajaluk sok te machʼa tal ta patile.

15 Pero, te majtanil yuʼun te Diose ma pajaluk sok te mulil yuʼun te Adane. Melel, teme bayal ta tul ants winiketik lajemik yuʼun ta swenta smul jtul winik, pero ta swenta te slekil yoʼtan te Jesucristo bayal machʼatik la yichʼik te slekil yoʼtan Dios sok te majtanil yuʼune. 16 Te majtanil yuʼun te Dios sok te mulil la spas jtul winik ma pajaluk sok te bin ya jtatik yuʼune, melel tal castigo ta swenta jun-nax mulil te la spas te jtul winike, yan stukel te majtanil yuʼun te Diose ya yakʼ te toj ya x-ilotik yuʼun Dios te ants winiketik, manchukme jmulawiletik. 17 Melel, teme ta swenta smul jtul winik te wentainwan te lajele, ¡kʼaxtoxan te machʼatik ya yichʼik te slekil yoʼtan Dios te ma snujpʼuk ya kichʼtik sok te majtanil te ya yichʼik te ya yakʼ te toj ya x-ilotik yuʼun te Diose, yame xkuxinik sok yame xmantalteswanik jich bitʼil ajwaliletik ta swenta jtul winik, jaʼ te Jesucristoe!

18 Jich bitʼil ta swentanax smul jtul winik jich kʼax ta stojol spisil te ants winiketik te lajele, jaʼnix jich ta swenta stojil yaʼtel jtul winik ya xjuʼ te toj ya yichʼik ilel yuʼun Dios spisil te ants winiketik sok te ya yichʼik skuxlejalike. 19 Jich bitʼil te bayal machʼatik la sta smulik ta swenta te la skʼaxuntay mantal jtul winik, jaʼnix jich bayal machʼatik toj ya x-ilotik yuʼun Dios ta swenta jtul winik te la schʼuun mantal stukele. 20 Te kʼalal la yichʼ akʼel te Ley, toyxan te mulile; pero te banti toyxan te mulile toyxan bayal tey-a te slekil yoʼtan Dios te ma snujpʼuk ya kichʼtike. 21 ¿Bin swentail? Jich te bin-utʼil wentainwan te mulil sok te lajele, jaʼnix jich te slekil yoʼtan Dios ya xwentainwan jich te bin-utʼil ajwalil yuʼun jich toj ya x-ilotik yuʼun Dios te ants winiketik, jaʼ ya x-akʼbotik kuxlejalil ta sbajtelkʼinal ta swenta te Kajwaltik Jesucristoe.