Carta ta stojol te Romanoetik

6 ¿Bin ya kaltikix-a jiche? ¿Yabal skʼan te ya jleulantikxan jmultik yuʼun ya xtoyxan ta jtojoltik te slekil yoʼtan Dios te ma snujpʼuk ya kichʼtike? 2 ¡Maʼuk! Te bitʼil lajemotikix ta swenta te mulile, ¿bin-utʼil ay-a te ya kakʼ jbatikxan ta wentainel yuʼune? 3 ¿Yuʼunbal maba anaʼojik te jpisiltik te la kichʼtik jaʼ* ta swenta te Cristo Jesús pajal lajotik sok? 4 Jaʼ yuʼun, pajal la kichʼtik mukel sok te kʼalal laje, jich te bin-utʼil la yichʼ chaʼkuxajtesel te Cristo ta yolil te machʼatik lajemik ta swenta yutsilal te Tatile, jichotik-euk yachʼiluk te jkuxlejaltike. 5 Melel, teme jich lajemotikix te bin-utʼil te Cristoe, jichnixme ya kichʼtik chaʼkuxajtesel te bin-utʼil la yichʼ chaʼkuxajtesele. Te kʼalal jich ya xkʼot ta pasel-abi, jichme jun ayotik sok. 6 Melel jnaʼojtik te pajal la yichʼ jijpanel ta teʼ sok te Cristo te pokoʼ jtaleltik swenta jich ya xpejkʼaj yip te mulil te ay ta jbakʼetaltike sok maba ya smosoinotikix-a te mulile. 7 Melel te machʼa ya xlaje libre ya xjil yuʼun te smule.

8 Jaʼnix jich, teme pajal lajotik sok te Cristo, jchʼuunojtik te pajal ya xkuxinotik sok. 9 Jich bitʼil jnaʼojtik te la yichʼix chaʼkuxajtesel te Cristo ta yolil te machʼatik lajemike maʼyuk bin-ora ya xlajix; maba wentainbilix yuʼun te lajele. 10 Melel, te kʼalal laje, jun-nax buelta la yakʼ sba ta lajel ta swenta te mulile,* pero te bitʼil kuxule, kuxul ta swenta spasbeyel skʼanojel yoʼtan te Diose. 11 Jaʼnix jichex-euk, lajemukexme ta swenta te mulile, pero kuxulukexme ta spasbeyel skʼanojel yoʼtan te Dios ta swenta te Cristo Jesús.

12 Jich yuʼun mame xa awakʼ swentainex te mulil te ay ta abakʼetalik te ya xlaje, jich maba ya achʼuunik spasel te bin ya skʼan te abakʼetalike. 13 Mame xa awakʼik ta tuuntesel yuʼun mulil te abakʼetalik ta spasel te bin ma stojiluke. Jaʼ lekxan te ya awakʼ abaik ta stojol Dios jich bin-utʼil te machʼatik chaʼkuxajemikix tale, jaʼme xa awakʼik ta tuuntesel yuʼun Dios te abakʼetalik ta spasel te bin toje. 14 Mame xa awakʼ swentainex te mulile, melel maba ayex ta swenta te ley, jaʼ ayex ta swenta te slekil yoʼtan Dios te ma snujpʼuk ya kichʼtike.

15 Jich yuʼun, ¿bin ya jpastikix-a? ¿Yabal jpastikxan mulil ta skajnax te maba ayotik ta swenta te ley, te jaʼ ayotik ta swenta te slekil yoʼtan Dios te ma snujpʼuk ya kichʼtike? ¡Ma jichuk stukel-abi! 16 ¿Yuʼunbal maba anaʼojik teme ya awakʼ abaik ta mosoinel ta stojol jtul ants winik ta schʼuunbeyel smantal, jaʼ moso ya xkʼoex yuʼun te kʼalal ya achʼuunbeyik smantale? Chikan teme jaʼ te mulil te ya x-ikʼawan bael ta lajel, o jaʼ te schʼuunel mantal swenta toj ya yilex te Diose. 17 Pero ya kalbeytik wokol te Diose, manchukme smosoinojex-a te mulile, spisil awoʼtan la achʼuunik te nojptesel la awichʼik akʼbeyele. 18 Jich, te bitʼil libre jilex yuʼun te mulile, jaʼ j-abat kʼoex yuʼun te bin toj ta pasele. 19 Ta skʼop ants winiketik yak jkʼoponbelex, melel chʼichʼbakʼetex. Jich te bin-utʼil la awakʼik ta mosoinel te abakʼetalik ta spasel te bintik ilobtik sba sok ta spasel te bintik chopole,* ta ora ini akʼaik ta abatinel te abakʼetalik ta spasel te bin toj ta pasel sok te bin chʼultesbile. 20 Melel te kʼalal mosoinbilex yuʼun-a te mulile, maba wentainbilex yuʼun te bintik toj ta pasel-ae.

21 ¿Bin lokʼ awuʼunik-a te kʼalal jich ayex-ae? Jaʼ te bintik ya xkʼexawex yuʼun ta ora ini. Melel te bintik la apasike jaʼ ya yakʼex ta lajel. 22 Pero, ta ora ini jich bitʼil te libre ayexix yuʼun te mulil sok te la awakʼix abaik ta abatinel yuʼun te Dios, te bin ataojik yuʼune jaʼ te chʼultesbilexix yuʼun Dios sok te ya ataik kuxlejalil ta sbajtelkʼinale. 23 Melel te stojol te mulile jaʼ te lajele, yan stukel te majtanil ya yakʼ te Diose jaʼ te kuxlejalil sbajtelkʼinal ta swenta te Kajwaltik Cristo Jesús.