Carta ta stojol te Galataetik

6 Kermanotak, teme ay machʼa la sta smul te maba yichʼoj ta wentae, jaʼex te awichʼojik te taleliletik te talem ta stojol te Diose, tojobtesaik sok slamalil awoʼtanik te machʼa la sta smule. Pero tsajtayame* abaik ta jujuntul yuʼun jich maba ya xyalex ta mulil-euk. 2 Talel kʼaxel xa akoltay abaik ta skuchel te awokolike, jichme ya akʼotesik ta pasel te ley yuʼun te Cristoe. 3 Ta melel, teme ay machʼa ya skuy te mukʼ skʼoplal, pero teme ma jichuke, stukel yak ta sloʼlayel sba. 4 Ta jujuntul akʼame stsajtay* yil te bin yilel te yaʼtele, jichme ya sta stseʼelil yoʼtan yuʼun te bin spasoje, mame jaʼuk te ya spaj te yaʼtel sok te yane. 5 Melel ta jujuntul ay ta swenta skuchel te bin ya spase.

6 Jaʼnix jich, machʼauk-a te yak ta yichʼel nojptesel ta swenta te skʼop Diose, akʼame yakʼbey spisil te bintik lek te machʼa ya xnojptesot yuʼune.

7 Mame xa aloʼlay abaik: maʼyuk machʼa ya xjuʼ ya slaban te Diose. Melel te bin ya stsʼun te ants winike jaʼnix ya stsobey sit. 8 Te machʼa jaʼ ya stsʼun te bin ya skʼan te sbakʼetale jaʼnix ya stsobey sit ta swenta sbakʼetal te jaʼ te bin ya xkʼaʼe, pero te machʼa ya stsʼun te bin ya skʼan te chʼul espíritu* jaʼme ya stsobey sit te chʼul espíritu te jaʼ te kuxlejalil sbajtelkʼinal. 9 Jich yuʼun mame jkom jbatik ta spasel te bin leke, melel yame sta yorail te ya jtsobeytik sit te bin la jtsʼuntik teme maba ya xlujbotike. 10 Jich yuʼun, te bitʼil yato xjuʼ kuʼuntike, akʼa jpastik te bintik lek ta stojol spisil te yantike, pero jaʼ kʼaxtoxan ta stojol te kermanotaktik te pajal schʼuunel koʼtantik soke.

11 Ilawilik te bin smukʼul te letraetik te joʼon-nix la jtsʼibaybeyexe.

12 Te machʼatik ya skʼan ya sujex ta yichʼel circuncisión* jaʼ ya skʼanik te lek ya yichʼik ilel yuʼun te ants winiketike. Jich ya spasik yuʼun ma skʼanik te ya yichʼik kontrainel ta swenta te teʼ yuʼun wokolil* yuʼun te Cristoe. 13 Melel ni jaʼuk ya xjuʼ yuʼunik spasel-euk te bin ya yal te Ley te machʼatik yichʼojik circuncisione,* pero jaʼ ya skʼanik te ya awichʼik circuncisión yuʼun jich ya xjuʼ ya stoy sbaik yuʼun te bin ya yichʼ pasbeyel te abakʼetalike. 14 Yan te joʼone maʼyuk bin ya jkʼan ya jtoy jba yuʼun, jaʼnax ta swenta te teʼ yuʼun wokolil* yuʼun te Kajwaltik Jesucristo, te jaʼnix ta swenta te lajemix skʼoplal ta koʼtan te balumilal, jaʼnix jich lajemonix ta sit te balumilal ta swenta te Cristoe. 15 Te bin mukʼ skʼoplale, jaʼ te yachʼil ants winikotik ya xkʼootike, ma jaʼuk teme kichʼojtik circuncisión* o teme maba kichʼojtik circuncisione. 16 Ayukme ta stojolik te lamalkʼinal sok te kʼuxultayel yuʼun Dios spisil te machʼatik jun yoʼtanik yakik ta spasel ta skuxlejalik te mantalil ini, jich, jaʼ ta stojol te Israel yuʼun Dios.

17 Ta ora bael ini mame ayuk machʼa ya yakʼbonxan jwokol, melel kichʼojbey smarcail ta jbakʼetal te j-abaton yuʼun te Jesús.

18 Kermanotak, ayukme ta atojolik te slekil yoʼtan te Kajwaltik Jesucristo te ma snujpʼuk ya kichʼtik ta skaj te lekil taleliletik ya awakʼik ta ilele. Jichuk.