Sbabial carta yu’un Pedro

1 Joʼon Pedroon, te jpuk-kʼopon yuʼun te Jesucristo, ya jtsʼibay ta atojolik te carta ini, jaʼex te pujkemex bael ta skʼinal Ponto, Galacia, Capadocia, Asia sok Bitinia, jaʼex te tsabilex yuʼun te Diose 2 jaʼ te Tatil te ay ta chʼulchan te la stsaex jich te bitʼil snopojix ta yoʼtan ya spas-ae, la yakʼbeyex te chʼul espíritu* yuʼun jich chʼultesbil ya xkʼoex, jich la spas yuʼun ya achʼuunbeyik te smantale sok te manchuk ayuk awabakulik* ta swenta te schʼichʼel te Jesucristoe:

Bejbe* toyukxan ta atojolik te slekil yoʼtan Dios te ma snujpʼuk ya kichʼtik sok te lamalkʼinal.

3 Akʼa yichʼ albeyel yutsil skʼoplal te Dios, te sTat te Kajwaltik Jesucristo, ta skaj te kʼaxto la snaʼ yoʼbolil jbatik la yakʼ te chaʼayinukotikxan* yuʼun jich kuxul kʼot te bin yakotik ta smaliyel ta swenta te chaʼkuxaj te Jesucristo ta yolil te machʼatik lajemike, 4 sok te ya kichʼtik akʼbeyel te bin ay ta jwentatik yichʼel te ma xlaj, te maba boloben sok te maba ya xtakije. Jaʼ te bin kʼejbil ta atojolik ta chʼulchane, 5 kanantaybilex ta swenta te yuʼel te Dios ta skaj te schʼuunel awoʼtanike, yuʼun jich ya ataik te kolel te ya yichʼ akʼel ta ilel ta slajibal kʼajkʼal. 6 Jaʼ yuʼun, te jaʼexe bayal stseʼelil awoʼtanik, manchukme ya skʼan ya atsʼikikxan jtebuk te bayal ta chajp pruebaetik ya xtal ta atojolike, 7 jich ya xkʼot ta pasel ini yuʼun jich ya yichʼ ilel te bantito kʼalal ay yip te schʼuunel awoʼtanike —te chʼuunel oʼtanil te yichʼoj yip te jaʼ jich kʼax mukʼ skʼoplal ya xkʼot te bin-utʼil te oro te ya xlaj, manchukme la yichʼ pasel ta prueba ta kʼajkʼ—, jich te chʼuunel oʼtanil-abi ya yichʼ albeyel yutsil skʼoplal, ya yichʼ yutsilal sok ya yichʼ ichʼel ta mukʼ te kʼalal ya xchiknaj tal te Jesucristo. 8 Manchukme maʼyuk bin-ora la awilik, kʼux ta awoʼtanik. Manchukme maba ya awilik ta ora ini, ya awakʼ schʼuunel awoʼtanik ta stojol sok kʼax bayal stseʼelil awoʼtanik te ma xjuʼ ta albeyel skʼoplal sok te bayal yutsilal, 9 jich ya yakʼ xkʼot ta pasel te bin ya yakʼ te chʼuunel oʼtanil: jaʼ te akolelike.

10 Ta swenta te bin-utʼil ay te kolel ini, te j-alwanejetik te la yalbeyik skʼoplal te slekil yoʼtan Dios te ay ta jtojoltik te ma snujpʼuk ya kichʼtike, jaʼik te machʼatik la stʼunbeyik ta lek skʼoplal sok te la yilbeyik lek skʼoplale. 11 Maba la skom sbaik ta stʼunbeyel skʼoplal te bintik ya xkʼot ta pasel sok te bin-ora te bin albotik yuʼun te chʼul espíritu* ta swenta te Cristo, kʼalal akʼbotik snaʼ te j-alwanejetik te wokoliletik te ya xkʼax ta stojol te Cristo sok te yutsilal te ya yichʼ akʼbeyel ta patile. 12 Te bin akʼbot snaʼik ma jaʼuk ta swenta slekilalik, jaʼ ta swenta alekilalik, jaʼ te bin la awichʼikix albeyel ta ora ini jaʼ te lek yachʼil kʼop ta swenta te chʼul espíritu* te tikunbil tal ta chʼulchan. Jaʼ te bintik yoʼtanukik ya skʼan ya yilik te chʼul-abatetik te bin yak ta albeyel skʼoplale.

13 Jaʼ yuʼun chajpaname awoʼtanik yuʼun jich ya anaʼik te bin ya apasike, ayukme spʼijil awoʼtanik sok akʼa smukʼulin awoʼtanik te slekil yoʼtan Dios te ma snujpʼuk ya kichʼtik te ya awichʼik akʼbeyel awilik te kʼalal ya xchiknaj tal te Jesucristo. 14 Te bitʼil alnichʼanex te ya achʼuunik mantale, mame jichuk xa apasik te bin la skʼan awoʼtanik te kʼalal mato anaʼojbeyik sba-a te Diose; 15 jaʼ lekxan te jichuk chʼultesbilukex ta spisil te bintik ya apasik jich te bin-utʼil chʼultesbil te machʼa la yikʼexe, 16 melel jich tsʼibaybil: «Ya skʼan chʼultesbilex jich te bin-utʼil chʼul Dioson te joʼone».

17 Teme ya akʼoponik te Tatil te maba ya xtsaawan te kʼalal ya yichʼtiklan ta kʼop ta jujuntul jaʼ chikan te bin yilel te yaʼtelike, sokukme xiwel* ya xkuxinex te jayeb kʼajkʼal jbeomex ta kʼinale. 18 Melel anaʼojik te ma jaʼuk ta swenta te bintik ya xlaj —jich te bin-utʼil oro o plata— te bitʼil libre jilex yuʼun te akuxlejalik te ma xtuun-a te la skʼasesbeyex jilel te antiguo ameʼ atatike. 19 Maʼuk, te bitʼil la kichʼtik akʼel ta libre jaʼ ta swenta chʼichʼ te kʼax mukʼ skʼoplale, jich te bin-utʼil schʼichʼel tuminchij te maʼyuk schopolil sok te maʼyuk bin boloben yuʼune, jaʼ te schʼichʼel te Cristo. 20 Ta melelnix-a, jaʼ la yichʼ tsael te kʼalal mato xchiknaj tal-a te ants winiketike, pero chiknaj ta awentaik ta slajibal kʼajkʼal. 21 Jaʼ ta swenta te ya achʼuunik te Diose, jaʼ te machʼa la schaʼkuxajtes ta yolil te machʼatik lajemik sok la yakʼbey yutsilal yuʼun jich ya xjuʼ ya awakʼ schʼuunel awoʼtanik sok smukʼul awoʼtanik ta stojol te Diose.

22 Te bitʼil lekubtesbilexix ta swenta te ya achʼuunik te smelelil kʼop sok te bin lek lokʼem-ae jaʼ te kʼux ya awaʼiy abaik ta smelelil jich te bin-utʼil kʼux ya yaʼiy sbaik te machʼatik jun-nax smeʼ statike, talel kʼaxel kʼuxme xa awaʼiy abaik sok spisil awoʼtanik. 23 Melel maba chaʼayinex* ta swenta sit awal tsʼunubil* te ma xkʼaʼe, jaʼ ta swenta te skʼop te Dios te kuxul sok te sbajtelkʼinal ay stukele. 24 Melel «spisil te ants winiketik jich kʼoemik te bin-utʼil te ak, sok spisil te yutsilalik jich kʼoem te bin-utʼil te jaʼmal nichimetik; te ak ya xtakij sok ya xlubaj koel te nichime, 25 yan te skʼop te Jehová* stalel ay ta sbajtelkʼinal». Ta melel, te «kʼop» ini jaʼ te lek yachʼil kʼop te la yichʼix cholel ta atojolike.