Apocalipsis

21 Tey-abi la kil yachʼil chʼulchan sok yachʼil balumilal, melel chʼayix bael te chʼulchan sok te balumilal te ayik ta nailal sok maʼyukix te mare. 2 Jaʼnix jich la kil te chʼul mukʼul lum, jaʼ te Yachʼil Jerusalén, yak ta koel tal ta chʼulchan te banti ay te Diose. Sok chapalix jich te bin-utʼil jtul achʼix te ya xnujpun sok te machʼa smamalal ya xkʼote. 3 Ta patil la kaʼiy te ay machʼa tulan kʼopoj ta banti te mukʼul naktajibal te jich yak ta yalele: «¡Ilawil! Te nailpakʼ yuʼun te Dios ayix ta stojol te ants winiketik. Te Dios yame xnain ta yolil te ants winiketik sok jaʼme lum ya xkʼot yuʼun. Jaʼnixme ya xjokinotik yuʼun te Diose. 4 Sok yame xkustiklanbot yaʼlel sitik yuʼun te Diose, maʼyukix lajel, maʼyukix mel-oʼtan,* okʼel sok te bin kʼux. Te bintik ay ta nailal chʼayix bael spisil».

5 Te machʼa nakal ta mukʼul naktajibal jich la yal: «¡Ilawil! Yakon ta spasel ta yachʼil spisil te bintik aye». Jich la yalxan: «Tsʼibaya te kʼopetik ini, melel ya xjuʼ ya schʼuun koʼtantik sok jaʼ smelelil». 6 Sok jich la yalbon: «¡Kʼoemix ta pasel! Joʼon te Alfa sok te Omega,* te sjajchibal sok te slajibal. Spisil te machʼa takin yoʼtan smajtanme ya kakʼbey yuchʼ te slokʼib jaʼ yuʼun kuxlejalil. 7 Spisil te machʼa ya yaʼiy tsalaw yame x-akʼbot yuʼunin spisil ini, joʼon Dioson ya xkʼoon yuʼun sok jaʼ jnichʼan ya xkʼot. 8 Pero, te jxiwel-oʼtanetik, te machʼatik maʼyuk schʼuunel yoʼtanik, te machʼatik ay yabakulik* sok te ya spasik te bintik ilobtik sba, te jmilawaletik, te machʼatik ya spasik mulwej,* te machʼatik ya spasik espiritismo,* te machʼatik ya yichʼik ta mukʼ lokʼombaetik sok spisil te machʼatik ya spasik lot jaʼme ya smaliyik te pamal kʼajkʼ te yak ta tilel sok azufre, te jaʼ señail te schebal buelta lajele».

9 Tal ta jtojol jtul ta sjuktulul te chʼul-abatetik te yichʼojik te jukeb tazaetik te nojelik ta slajibal te jukchajp wokoliletik sok jich la yalbon: «Laʼ, ya kakʼbat awil te achʼix te ya xnujpun, jaʼ te machʼa yinam ya xkʼot te Jkolel* Tuminchije». 10 Jich yuʼun, ta swenta te chʼul espíritu,* la yikʼon bael ta jun mukʼul wits te kʼax toyole, sok la yakʼbon kil te chʼul mukʼul lum yuʼun Jerusalén te yak ta koel tal ta chʼulchan te banti ay te Diose, 11 sok yichʼojbey te yutsilal te Diose. Te xojobil jaʼ jich te bin-utʼil ton te kʼax tʼujbilnax ta ilele, jich te bin-utʼil jaspe-ton te xlemetnax jich bin-utʼil cristal. 12 Kʼax mukʼ sok kʼax toyol te stsʼajkʼule, ay 12 tiʼnail yuʼun sok ay jtul chʼul-abat ta jujun tiʼnail, ta jujun tiʼnail tsʼibaybil sbiilik tey-a te 12 ta chajp stsʼumbal Israel. 13 Ta slokʼib kʼajkʼal ay oxeb tiʼnail, ta norte ay oxeb tiʼnail, ta sur ay oxeb tiʼnail, sok ta smalib kʼajkʼal ay oxeb tiʼnail. 14 Jaʼnix jich, te stsʼajkʼul te mukʼul lum yichʼoj yiptajib ta 12 ta pʼij tonetik sok tey tsʼibaybil sbiilik-a te 12 ta tul jpuk-kʼopetik yuʼun te Jkolel* Tuminchij.

15 Te machʼa yakon ta kʼop sok-ae yichʼoj jun pʼisojibal, jchʼix jalal* te pasbil ta oro yuʼun ya spʼis te mukʼul lum, te tiʼnailetik sok te tsʼajkʼ yuʼune. 16 Cuadrado pasbil te mukʼul lume, pajal spʼisojibal te sjamlejal sok te snajtile. La spʼis te mukʼul lum sok te jalale:* ayniwan 2,220 kilometrouk; pajal spʼisojibal te snajtil, te sjamlejal sok te stoylejale. 17 Jaʼnix jich la spʼis te tsʼajkʼe: yichʼoj 144 xujkʼubil,* jich te bin-utʼil spʼisojibal yuʼun te ants winike, jich spʼisojibal yuʼun-euk te chʼul-abate. 18 Te tsʼajkʼ pasbil ta jaspe-ton, te mukʼul lume pasbil ta batsʼil oro, jich yilel te bin-utʼil cristal te ya sol kʼaxel jsitik-ae. 19 Te yiptajib te tsʼajkʼ yuʼun te mukʼul lume chʼalbil ta spisil ta chajp tʼujbil tonetik: te sbabial yiptajib jaʼ jaspe-ton, te schebal jaʼ zafiro-ton, te yoxebal jaʼ calcedonia-ton, te schanebal jaʼ esmeralda-ton, 20 te yoʼebal jaʼ sardónica-ton, te swakebal jaʼ sardio-ton, te sjukebal jaʼ crisólito-ton, te swaxakebal jaʼ berilo-ton, te sbalunebal jaʼ topacio-ton, te slajunebal jaʼ crisoprasa-ton, te sbuluchebal jaʼ jacinto-ton sok te slajchayebal jaʼ amatista-ton. 21 Jaʼnix jich, te 12 tiʼnail jaʼ 12 perlaetik; te jujun tiʼnail yichʼoj pasel ta jun-nax perla. Te mukʼul calle yuʼun te mukʼul lume pasbil ta batsʼil oro, jich yilel te bin-utʼil cristal te ya sol kʼaxel jsitik-ae.

22 Maʼyuk la kil ni junuk templo tey-a, melel te Jehová* Dios, te Machʼa spisil ya xjuʼ yuʼun, sok te Jkolel* Tuminchij jaʼ templo kʼoemik. 23 Te mukʼul lum maba ya xtuun yuʼun te sakal kʼinal yuʼun te kʼajkʼal o te xojobil te ue, melel jaʼ ya x-akʼbot sakal kʼinal yuʼun te yutsilal te Diose sok te Jkolel* Tuminchij jaʼ tsumbil kʼajkʼ ta stojol. 24 Ta swenta te sakal kʼinal yuʼun yame xbeenik te nacionetik, sok te ajwaliletik ta balumilal yame yakʼbeyik ta stojol te mukʼul lum te yutsilalike. 25 Te tiʼnailetik yuʼun maʼyuk bin-ora ya yichʼik makel, melel maʼyuk ajkʼabal tey-a. 26 Te yutsilalik sok te ichʼel ta mukʼ yuʼun te nacionetik yame yakʼbeyik ta stojol te mukʼul lume. 27 Pero, maʼyuk bin-ora ya x-och tey-a te bin boloben skʼoplal, te machʼa ya spas te bin ilobtik sba sok te machʼa ya xloʼlaywane. Jaʼnax ya x-ochik tey-a te machʼatik tsʼibaybil sbiilik ta balbil jun yuʼun kuxlejalil yuʼun te Jkolel* Tuminchije.