Levítico

25 Te Jehová kʼopojxan sok te Moisés ta wits Sinaí, jich la yalbey: 2 «Albeya yaʼiy te israeletik ini: ‹Kʼalal ya x-ochex ta kʼinal te ya kakʼbeyex, te lumkʼinal yame skʼan ya skux yoʼtan jun sábado ta stojol te Jehová. 3 Wakebme jaʼbil ya awaʼiy tsʼunbajel ta akʼinal sok ya asetʼbey skʼabkʼab te tsʼusubiltik awuʼun sok te ya atsobey te site. 4 Pero, ta sjukebal jaʼbil yame skʼan ya skux yoʼtan te lumkʼinal jaʼ jun sábado ta stojol te Jehová. Mame skʼan ya awaʼiy tsʼunbajel ta akʼinal sok mame xa asetʼbey skʼabkʼab te tsʼusubiltik awuʼune. 5 Mame xa atsobey sit te bin stukelnax chʼi te chʼay koel te kʼalal la atsobey sit te awal tsʼunubil awuʼun sok mame xa atsobey sit te tsʼusubiltik awuʼun te maba la asetʼbey skʼabkʼabe, yame skʼan ya skux yoʼtan jun jaʼbil te lumkʼinale. 6 Pero ya xjuʼ ya aloʼbeyik sit te bintik ya xchʼi ta lumkʼinal ta sábado-abi. Pero te jaʼat, te j-abatetik awuʼun, te jle-aʼtel awuʼun sok te jbeom te sjokinojat ta nainel yame xjuʼ ya sweʼik te bintik ya xchʼi ta lumkʼinal te jayeb tiempo ya xjalaj te sábado-abi. 7 Te alakʼil chambalametik* sok te jtiʼawal chambalametik te ayik ta akʼinal yame xjuʼ ya sweʼik-euk. Spisil te bintik ya yakʼ te lumkʼinal yame xjuʼ ta weʼel.

8 »›Yame awajtay jukeb jaʼbil yuʼun sabadoetik, jukeb buelta te jukeb jaʼbil, jichme 49 jaʼbil ya xlokʼ ta spisil. 9 Yame skʼan ya awokʼesin ta tulan te xulubil ta slajunebal kʼajkʼal yuʼun te sjukebal u ta Skʼajkʼalel stael perdón. Yame awakʼik te ya yichʼ aʼiyel skʼop te xulubil ta stojol spamal te kʼinal awuʼunike. 10 Yame skʼan ya achʼultes te jaʼbil 50 sok ya apuk ta alel te libre ya xjil spisil te ants winiketik. Jaʼ jun jaʼbil yuʼun Jilel ta libre ta atojolik, jich ta jujuntul yame sujt ta stojol te bintik ay yuʼun sok ta jujuntul yame sujt bael sok te sfamiliae. 11 Te jaʼbil 50 jaʼme jun jaʼbil yuʼun Jilel ta libre ta atojolik. Maba ya stsʼunbajex, maba ya atsobeyik sit te bintik stukelnax chʼi yuʼun te chʼay koel sok maba ya atsobeyik sit te tsʼusubiltik awuʼunik te maba la asetʼbeyik skʼabkʼab. 12 Melel jaʼ jun jaʼbil yuʼun Jilel ta libre. Yame skʼan te chʼultesbil ya xkʼot awuʼunik. Jaʼnaxme ya xjuʼ ya aweʼik te bintik stukel ya yakʼ te lumkʼinale.

13 »›Ta jaʼbil yuʼun Jilel ta libre ta jujuntul yame skʼan ya sujt ta stojol te bintik ay yuʼun. 14 Teme ay bin ya achonbeyik o ya amanbeyik te apatxujk, mame xa aloʼlay abaik. 15 Te machʼa ay bin ya smanbey te spatxujk yame skʼan ya yichʼ ta wenta te jayeb jaʼbil kʼaxem jaʼto tal te jaʼbil yuʼun Jilel ta libre, jaʼnix jich te machʼa ya xchonbaj ya skʼan ya yichʼ ta wenta te jayebxan jaʼbil ya skʼan yuʼun ya stsobey sit te awal tsʼunubil. 16 Teme bayaltoxan jaʼbil ya skʼane, yame xjuʼ ya stoyesbey te stojole, pero teme maʼyukix bayal jaʼbil ya skʼane, yame skʼan ya spejkʼanbey te stojole, melel jaʼ ya schon te jayebxan buelta ya yakʼ sit te awal tsʼunubile. 17 Mame ayuk machʼa ya sloʼlay te spatxujk, yame skʼan ya axiʼik* te Dios awuʼunik, melel joʼon Jehovaon te Dioson awuʼunike. 18 Teme ya akʼotesik ta pasel te bintik yaloj sok te ya akʼotesik ta pasel te bintik jchapoj, junme awoʼtan ya xnainex ta kʼinal. 19 Yame yakʼ sit te lumkʼinal, yame aweʼbeyik sit jaʼto te kʼalal ya xnoj achʼujtik sok junme awoʼtan ya xnainex tey-a.

20 »›Pero, teme jich ya ajojkʼoyik «¿Bin ya jweʼtik ta sjukebal jaʼbil teme ma xjuʼ ya kaʼiytik tsʼunbajel sok ma xjuʼ ya jtsobeytik sit te awal tsʼunubil kuʼuntike?», 21 naʼaikme te ya jtikunbeyex te bendición kuʼun ta swakebal jaʼbil, jich te lumkʼinal yame yakʼ bayal sit ta swenta oxeb jaʼbil. 22 Jaʼme ya aweʼbeyik sit te awal tsʼunubil te la yakʼ ta swaxakebal jaʼbil jaʼto ta sbalunebal jaʼbil. Jaʼme ya aweʼik te bin kʼejbil awuʼunik jaʼto te kʼalal ya yakʼ sit te awal tsʼunubil awuʼunike.

23 »›Mame xa achonik ta jkʼaxel te kʼinal, melel joʼon kuʼun. Te jaʼexe jyanlumex sok jbeom kʼoemex kuʼun. 24 Spamal te kʼinal te awuʼuninojik yame skʼan te ya awakʼik derecho yuʼun ya yichʼ chaʼmanel.

25 »›Teme jil ta pobre te awermano sok ya skʼan ya schon jsejpuk te skʼinale, te jchaʼmanbajel te ay bin yutoj sba soke jaʼme ya skʼan ya xtal schaʼman te kʼinale. 26 Teme ay machʼa te maʼyuk machʼa ya xchaʼmanbot yuʼun te skʼinal te kʼulejub sok la sle bitʼil ya schaʼman sujtel te skʼinale, 27 yame skʼan ya stʼun te jayeb stojol jaʼ chikan te jayebix jaʼbil la schone sok ya sujtesbey te machʼa la sman te jayebxan takʼin ya xlokʼ ta ajtayel te stojole. Jichme ya xchaʼsujt ta stojol te skʼinale.

28 »›Pero, teme maʼyuk stojol yuʼun ya schaʼman, jaʼ yuʼun ya xkʼot te machʼa la sman jaʼto te kʼalal ya xkʼot te jaʼbil yuʼun Jilel ta libre. Yame yuʼunin yan buelta ta jaʼbil yuʼun Jilel ta libre; yame xchaʼsujt ta stojol te skʼinale.

29 »›Teme ay machʼa ya schon sna ta mukʼul lum te joytaybil ta tsʼajkʼe, junme jaʼbil ay sderecho yuʼun ya schaʼman jaʼtonix te kʼalal la schap skʼop yuʼun ya schon; jun jaʼbilme ay sderecho yuʼun ya schaʼman. 30 Pero, teme maba juʼ ta manel te na ta jun jaʼbil, jaʼme yuʼun ya xkʼot te machʼa la sman ta kajalkaj stsʼumbal. Maba ya sujtes ta jaʼbil yuʼun Jilel ta libre. 31 Yan te naetik te ayik ta lumetik te maʼyuk stsʼajkʼul, jaʼnixme jich ya yichʼ ilel te bin-utʼil te skʼinalike. Ayme sderechoik yuʼun ya schaʼmanik sok yame skʼan ya yichʼ sujtesel ta jaʼbil yuʼun Jilel ta libre.

32 »›Pero, te snaik te levitaetik te ay ta mukʼul lumetik yuʼunik, spisil-ora ay sderechoik yuʼun ya schaʼmanik. 33 Teme jtul levita maba ya schaʼman te sna te ay ta mukʼul lumetik yuʼunike, yame yichʼ sujtesbeyel ta jaʼbil yuʼun Jilel ta libre, melel te naetik te ay ta mukʼul lumetik yuʼun te levitaetik jaʼme yuʼunik ta yolil te israeletik. 34 Jaʼnix jich, te akiltik te ay ta sjoyobal te mukʼul lum awuʼunike ma xjuʼ ta chonel, melel jaʼme awuʼunik spisil-ora.

35 »›Teme jil ta pobre jtul awermano te nopol* ay ta atojol sok te ma sta te bintik ya xtuun yuʼun, yame skʼan ya awentain jich bin-utʼil ya apas ta stojol te jyanlum o jbeom swenta ya sjokinatxan ta nainel. 36 Mame xa akʼanbey sjol te atakʼin sok mame ayuk binxan ya alokʼesbey te awermanoe. Yame skʼan ya axiʼ* te Dios awuʼun, jichme ya sjokinatxan ta nainel. 37 Mame xa awakʼbey smajan atakʼin yuʼun-nax ya akʼanbey sjol sok mame xa awakʼbey weʼelil swenta yuʼun-nax ay bin ya ata-a. 38 Joʼon Jehovaon te Dioson awuʼunik te la jlokʼesex tal ta skʼinal Egipto swenta ya kakʼbeyex te skʼinal Canaán yuʼun jaʼ Dioson ya xkʼoon awuʼunik.

39 »›Teme jil ta pobre jtul awermano te nopol* yak ta nainel te banti ayat te ya schon sba ta atojol, mame xa asuj ta spasel aʼtelil te jaʼ ya spas jtul moso. 40 Jichuk ya skʼan ya awil te bin-utʼil jle-aʼtel o jbeom. Yame skʼan ya x-aʼtej ta atojol jaʼto te kʼalal ya xkʼot yorail te jaʼbil yuʼun Jilel ta libre. 41 Tey-abi yame yijkitayat. Ya xlokʼ bael sok te snichʼnab yuʼun ya xbajt te banti ay te sfamilia, jich ya schaʼyichʼ te bintik ay yuʼun te antiguo smeʼ state. 42 Melel jaʼ j-abatetik kuʼun te la jlokʼes tal ta skʼinal Egipto. Ma xjuʼ ya schon sbaik jich bitʼil moso. 43 Mame tulanuk xa awakʼ aba ta stojol sok yame skʼan ya axiʼ* te Dios awuʼune. 44 Te moso sok te criada awuʼun yame xtalik ta yantik nacionetik te ayik ta ajoyobal; tey ya xjuʼ ya amanik-a te moso o te criada awuʼunike. 45 Jaʼnix jich ya xjuʼ ya amanbey snichʼnab te jbeometik te yakik ta nainel ta awolilik yuʼun ya amosoinik soknix te machʼatik ay bin yutoj sbaik te ayinik* ta akʼinalik, sok jaʼme awuʼunik ya xkʼotik. 46 Ya xjuʼ ya awakʼbeyik jilel te mosoetik awuʼunik te awal anichʼnabik yuʼun jaʼ yuʼunik ya xkʼotik ta spisil-ora. Ya xjuʼ ya x-aʼtejik ta stojolik. Pero mame tulanuk xa awakʼ abaik ta stojol te awermanotak te jaʼik israeletik.

47 »›Teme jaʼ kʼulejub te jyanlum o jbeom te nopol* ay ta atojol, pero pobre ya xjil te awermano sok te ya skʼan ya schon sba ta stojol te jyanlum, te jbeom o ta stojol te machʼa ay bin yutoj sba sok te jyanlum. 48 Ayme sderecho yuʼun ya yichʼ chaʼmanel. Yame xjuʼ ya xmanot yuʼun jtul yermano. 49 Jaʼnix jich ya xjuʼ ya xchaʼmanot yuʼun te stajun,* snichʼan stajun o machʼauk-a te ay bin yutoj sba sok, o sfamilia.

»›Jaʼnix jich ya xjuʼ ya sman sba teme kʼulejube. 50 Yame skʼan ya yil ta lek sok te machʼa manot yuʼun te bin-ora la schon sba jaʼto ta jaʼbil yuʼun Jilel ta libre, jaʼme jich stojol te jayeb jaʼbil la sjokine. Te jayeb stojol ya yichʼ tojel yuʼun te yaʼtele, jaʼ ya yichʼ tʼunel te jayeb ya yichʼ tojel jtul jle-aʼtel. 51 Teme bayaltoxan jaʼbil ya skʼan, yame skʼan ya stoj jaʼ chikan te jayebxan jaʼbil ya skʼan ya xjil ta libre. 52 Pero, teme jtebxanix ya skʼan yuʼun ya sta te jaʼbil yuʼun Jilel ta libre, yame skʼan ya stʼun te jayeb stojol ya xlokʼ jaʼ chikan te jayebxan jaʼbil ya skʼane. 53 Yame skʼan ya x-abatin ta jujun jaʼbil ta stojol te machʼa manot yuʼun jich te bin-utʼil jle-aʼtel; yame skʼan ya awil te manchuk ya yichʼ utsʼinel* yuʼun te yajwale. 54 Pero, teme maba juʼ yuʼun smanel sba jich te bitʼil la yichʼix alel, jaʼtome ya xjil ta libre sok te snichʼnab ta jaʼbil yuʼun Jilel ta libre.

55 »›Melel jaʼ j-abatetik kuʼun te israeletik. Jaʼ j-abatetik kuʼun te la jlokʼes tal ta skʼinal Egipto. Joʼon Jehovaon te Dioson yuʼunik.