1 Reyes

17 Te Elías* te talem ta Tisbe ta skʼinal Galaad, jich la yalbey te Acab: «¡Jamal ya kal ta stojol Jehová te kuxul Dios, te Dios yuʼun Israel, jaʼ te machʼa ya x-abatinon ta stojol,* ta cheʼoxeb jaʼbil bael maba ya x-ayin tsʼujul sok jaʼal jaʼto te kʼalal bin-ora ya kal ta mantal te joʼone!».

2 Te Elías jich la yichʼ albeyel yuʼun te Jehová: 3 «Lokʼan bael liʼi, baan ta stojol bael slokʼib kʼajkʼal sok nakʼa aba ta stsʼeel te spamlej yuʼun Kerit te ay ta stojol slokʼib kʼajkʼal yuʼun Jordán. 4 Teyme ya awuchʼ jaʼ ta be jaʼ sok yame jpas ta mantal te jojetik* yuʼun ya yichʼbatik bael aweʼel tey-a». 5 Oranax bajt, jich la spas te bitʼil albot yuʼun te Jehová. Bajt sok tey jil ta stsʼeel te spamlej yuʼun Kerit te ay ta stojol slokʼib kʼajkʼal yuʼun Jordán. 6 Ichʼbot bael pan sok tiʼbal yuʼun te jojetik* ta jujun sab sok ta jujun mal kʼajkʼal soknix tey la yuchʼ jaʼ ta be jaʼ. 7 Pero, jun cheb kʼajkʼal ta patil takij te be jaʼ, melel maba la yakʼ jaʼal ta kʼinal.

8 Tey-abi, jich la yichʼ albeyel yuʼun te Jehová: 9 «Baan ta Sarepta te ay ta skʼinal Sidón sok jilan tey-a. Joʼon ya jpas ta mantal jtul meʼba ants tey-a yuʼun ya yakʼbat aweʼel». 10 Jich bajt te Elías ta Sarepta. Te kʼalal kʼot ta yochibal te mukʼul lum, la sta jtul meʼba ants te yak ta stsobel siʼ. La yikʼ tal sok jich la yalbey: «Awokoluk, ichʼbon tal jtebuk jaʼ kuchʼ». 11 Te kʼalal bajt yichʼ tal jaʼ te antse, te Elías jich la yalbeyxan: «Awokoluk, jaʼnix jich ichʼbon tal jxejtʼuk pan». 12 Jich la yal te antse: «Jamal ya kalbat ta stojol Jehová te kuxul Dios awuʼun te maʼyukix pan kuʼune. Te binxanix ay kuʼune jaʼ jojp harina ta mukʼul jarra sok jtebuk aceite ta chʼin jarra. Ta ora ini yakon ta stsobel siʼ yuʼun ya jpas jtebuk pan yuʼun ya jweʼ sok te kale. Jaʼxanix slajibal-a te bin ya jweʼ soke, tey-abi yame xlajonkotik».

13 Jaʼ yuʼun, te Elías jich la yalbey te antse: «Mame xiwat. Baan, pasa te bin la awalixe. Pero, ta nail pasbon chʼin jsejpuk pan sok te bin jtebxanix ay awuʼune sok ichʼbon tal lokʼel. Ta patil ya xjuʼ ya apas te bin ya aweʼ sok te awale. 14 Melel jich ya yal te Jehová te Dios yuʼun Israel: ‹Te harina te ay ta mukʼul jarra maba ya xlaj sok te aceite te ay ta chʼin jarra maba ya xlaj jaʼto te bin kʼajkʼalil ya yakʼ tal jaʼal te Jehová ta lumkʼinal›». 15 Jich yuʼun la spas te bin albot yuʼun te Eliase. Bayal kʼajkʼal ayin sweʼel te Elías, te meʼba ants sok te sfamiliae. 16 Te harina te ay ta mukʼul jarra maba laj sok te aceite te ay ta chʼin jarra maba laj-euk jich te bitʼil la yal te Jehová ta swenta te Elías.

17 Ta patil, te skerem-al te yajwal te na tsakot ta chamel, kʼax batsʼej te jich maba la yichʼix ikʼ. 18 Jich yuʼun, te ants jich la yalbey te Elías: «¿Bin ma lek jpasoj ta atojol winik yuʼun te smelelil Dios?* ¿Yuʼunbal tal ajultesbon ta koʼtan te jmul sok te tal amilbon te jkerem-ale?». 19 Pero, te Elías jich la yalbey te antse: «Akʼbon tal te akerem-ale». Jich la spet te kerem te ay ta skʼab te snane* sok la yikʼ moel ta cuarto te ay ta ba na, jaʼ te banti yak ta jilel, sok la smejtsʼan ta swayib. 20 Jich la skʼanbey wokol te Jehová: «Kajwal, Jehová Dios kuʼun, ¿yuʼunbal ya awakʼbey swokol te meʼba ants te banti yakon ta jilel ta nainel te jich ya awakʼ xlaj te skerem-ale?». 21 Jich yuʼun la spajkan sba oxeb buelta ta sba te chʼin kerem sok jich la yalbey te Jehová: «Kajwal, Jehová Dios kuʼun, awokoluk, akʼa kuxinuk yan buelta te chʼin kereme». 22 Te Jehová la yaʼiybey skʼop te Elías, jich kuxin yan buelta te chʼin kereme. 23 Te Elías la spet koel tal te chʼin kerem ta cuarto te ay ta ba na sok la yikʼ ochel ta na. La yakʼbey te snan* sok jich la yalbey: «Ilawil, kuxul te akerem-ale». 24 Te kʼalal jich la yil te antse, jich la yalbey te Elías: «Ta ora ini la jnaʼix te yuʼun-nix jaʼat-a te winik yuʼun te smelelil Dios* sok te smelelil te bin ya awal, melel jaʼ skʼop te Jehová».