Yaʼtel te Jpuk-kʼopetik

9 Pero, te Saulo maba la skom sba ta yutsʼinel te jnopojeletik yuʼun te Kajwaltike sok yoʼtan ya smiltiklan. Jich bajt skʼopon te mukʼul sacerdote 2 sok la skʼanbey bael cartaetik ta stojol te sinagogaetik te ay ta Damasco yuʼun chukul ya yikʼtiklan tal ta Jerusalén machʼauk-a te ay ta Be ini, chikan teme winik o ants.

3 Te kʼalal yak ta bael ta Damasco sok te nopol* ya xkʼotix-ae, ta repentenax chiknaj xojobil kʼinal te tal ta chʼulchan te potsot yuʼune, 4 jich yal ta lum te Saulo sok la yaʼiy te ay machʼa jich kʼopoje: «Saulo, Saulo, ¿bin yuʼun te yak anutsbelone?». 5 Jich la yal te Saulo: «¿Machʼaat-a, Kajwal?». Jich albot yuʼun: «Joʼon te Jesuson te yak anutsbelone. 6 Pero jajchan, ochan bael ta mukʼul lum, tey ya awichʼ albeyel-a te bin ya skʼan ya apase». 7 Te winiketik te jokinbil yuʼune tekʼajtik jilel sok ma juʼ kʼopojik, melel la yaʼiyik stojol te ay machʼa kʼopoje pero maʼyuk machʼa la yilik. 8 La stejkʼan sba jajchel te Saulo, manchukme wikʼil te site ma xyil kʼinal. Jich yuʼun la snitik bael kʼalal ta Damasco. 9 Oxeb kʼajkʼal ma la yil kʼinal, maba weʼ sok maʼyuk bin la yuchʼ.

10 Ay jtul jnopojel ta Damasco te Ananías sbiile, jich albot ta najalsitil* yuʼun te Kajwaltike: «¡Ananías!». «Liʼ ayon, Kajwal», xchi te Ananías. 11 Jich albot yuʼun te Kajwaltike: «Jajchan, baan ta calle te Toj sbiile, lea ta sna Judas jtul winik tey-a te Saulo sbiil te talem ta Tarso. Tey yak ta skʼoponel Dios-a 12 sok la yilix ta jun najalsitil* te ay jtul winik ya xkʼot te Ananías sbiil sok te ya skajan skʼab ta stojol yuʼun ya xjam te site». 13 Pero, jich la yal te Ananías: «Kajwal, kaʼiyoj stojol te bayal machʼa ya yalbey skʼoplal te winik-abi sok te bayal yutsʼinoj te machʼatik chʼultesbil awuʼun ta Jerusalén. 14 Sok akʼbil tal mantal yuʼun te jwolwanej sacerdoteetik yuʼun ya schuktiklan* bael spisil te machʼatik ya yalbat te abiile». 15 Pero, jich albot yuʼun te Kajwaltike: «Baan, melel te winik-abi jaʼ jun vaso te tsabilix kuʼun yuʼun ya yichʼbon bael te jbiil ta stojol te nacionetik, ajwaliletik soknix ta stojol te snichʼnab Israel. 16 Joʼon ya kakʼbey yil ta jamal spisil te wokolil ya xkʼax ta stojol ta swenta te jbiile».

17 Jich bajt te Ananías, och ta na, la skajan skʼab ta stojol sok jich la yalbey: «Hermano, Saulo, te Kajwaltik Jesús te la yakʼ sba ta ilel ta atojol ta be te banti yakat ta talel-ae jaʼ la stikunon tal yuʼun ya xjam te asite sok te ya xnoj ta awoʼtan te chʼul espíritu».* 18 Oranax chʼay koel te bin makbil-a te site, jich yilel te bin-utʼil sulil chay. Jich la yil kʼinal. Jich jajch te Saulo sok akʼbot yichʼ jaʼ,* 19 weʼ jtebuk, jich la staxan yip.

Jil cheʼoxeb kʼajkʼal sok te jnopojeletik te ay ta Damasco 20 sok oranax jajch ta yalel ta sinagogaetik te jaʼ sNichʼan Dios te Jesús. 21 Spisil te machʼatik la yaʼiybeyik te skʼope chamnax yoʼtanik* yuʼun sok jich la yalik: «¿Mabal jaʼuk te winik ini te kʼaxto la yutsʼin ta Jerusalén te machʼatik ya yalbeyik skʼoplal te biilil ini? ¿Mabal jaʼuk talem liʼi yuʼun ya schuktiklan bael te jnopojeletik sok te ya yikʼtiklan bael ta stojol te jwolwanej sacerdoteetik?». 22 Pero, te Saulo kʼunkʼun la stsakxan yip yoʼtan ta kʼop, jich yuʼun te judioetik te nainemik ta Damasco ma la snaʼik te bin la spasik te kʼalal akʼbot yilik sok pruebaetik te yuʼun-nix jaʼ Cristo-a te Jesuse.

23 Bayal kʼajkʼal ta patil, te judioetik la schapik te bin-utʼil ya smilik. 24 Pero, te Saulo la snaʼ stojol te bin yakik ta schapel ta stojole. Jaʼnix jich, kʼajkʼal ajkʼabal yakik ta skanantayel te tiʼnail yuʼun ya smilik, 25 jich yuʼun ta jun ajkʼabal te jnopojeletik yuʼun la sjijpanik koel ta mukʼul moch ta pat tsʼajkʼ.

26 Te kʼalal kʼot ta Jerusalén te Saulo, la spas tulan yuʼun ya sjokin te jnopojeletike, pero la xiʼik spisilik, melel ma schʼuunik te jaʼix jnopojele. 27 Jich yuʼun, te Bernabé bajt skoltay te Saulo sok la yikʼ bael ta stojol te jpuk-kʼopetik. La yalbey yaʼiyik te bin-utʼil la yil ta be te Kajwaltike sok te kʼoponot yuʼun soknix te la schol skʼop Dios sok yip yoʼtan ta Damasco ta swenta sbiil te Jesuse. 28 Jich yuʼun, te Saulo la sjokinlan jilel te jnopojeletik, sok jun yoʼtan bayuk* been ta Jerusalén sok yip yoʼtan la schol skʼop Dios ta sbiil te Kajwaltike. 29 La skʼoponlan sok la stsal sba ta kʼop sok te judioetik te ya xkʼopojik ta griego. Pero, bayal buelta la sleik te bin-utʼil ya smilik. 30 Te kʼalal la snaʼik stojol te hermanoetike, la yikʼik bael ta Cesarea sok la stikunik bael ta Tarso.

31 Tey-abi ayin jun tiempo lamalkʼinal ta stojol te jchʼuunjeletik te ayik ta spisil skʼinal Judea, Galilea sok Samaria, sok la yichʼxan yipik. Moxan yajtalul te jchʼuunjeletik ta skaj te xiʼojik* te Jehová* sok te akʼbot smukʼul kʼinal yaʼiyik yuʼun te chʼul espiritue.*

32 Te Pedro been ta yilel te jchʼuunjeletik sok bajt yil-euk te machʼatik chʼultesbilik te nainemik ta Lida. 33 Tey la yil jtul winik-a te Eneas sbiil, te chamen yok skʼab sok te ayix waxakeb jaʼbil te ay ta swayibe. 34 Jich albot yuʼun te Pedro: «Eneas, jaʼme ya slekubtesat te Jesucristo. Jajchan sok lima te awayibe». Oranax la stejkʼan sba jajchel. 35 Te kʼalal la yilik te bin kʼot ta pasel, spisil te machʼatik nainemik ta Lida sok ta pamal kʼinal yuʼun Sarón, la sujtes yoʼtanik ta stojol te Kajwaltike.

36 Ta Jope ay jtul jnopojel ants te Tabita sbiil te ya skʼan ya yal Dorcas.* La spas bayal lekil aʼtelil sok la skoltay te machʼatik maʼyuk bin ay yuʼunike. 37 Ta yorailnix-abi tsakot ta chamel, jich laj. Jich yuʼun, la yatintesik sok la yakʼik ta jun cuarto te ay ta schaʼkajal na. 38 Te Lida nopol* yiloj sba sok te Jope, jich yuʼun te kʼalal la yaʼiyik stojol te jnopojeletik te ay ta Lida te Pedroe, la stikunik bael chaʼtul winiketik yuʼun jich ya skʼanbeyik wokol: «Awokoluk, laʼme ta ora liʼ te banti ayotike». 39 Jich la sjokinlan bael ta oranax te Pedro. Te kʼalal kʼot tey-ae, la yikʼik bael ta cuarto te ay ta schaʼkajal na. Spisil te meʼba antsetik yakik ta okʼel te kʼalal talik ta stojol te Pedro sok la yakʼbeyik yil spisil te kʼuʼul pakʼetik sok te najtil kʼuʼuletik te pasbotik yuʼun te Dorcas te kʼalal kuxul-ae. 40 Jich yuʼun, te Pedro la stikun lokʼel spisilik, la skejan sba sok la skʼopon Dios. Tey-abi la sut sba ta stojol te chamen bakʼet sok jich la yal: «Tabita, ¡jajchan!». La swikʼ sit; te kʼalal la yil te Pedro, la snajkan sba. 41 Te Pedro la stsak jajchel ta skʼab. Tey-abi la yikʼtiklan ochel te machʼatik chʼultesbilik sok te meʼba antsetike, kuxulix-a te la yakʼ ta ilel ta stojolike. 42 Spisil te yajwalul te lum Jope la yaʼiyik stojol te bin kʼot ta pasele, jich yuʼun bayal machʼatik la schʼuunik te Kajwaltike. 43 Te Pedro bayal kʼajkʼal jil ta Jope ta sna te Simón te jkʼaʼtesejnujkule.