Génesis

7 Ta patil-abi, te Jehová jich la yalbey te Noé: «Ochan ta arca* sok spisil te afamiliae, melel kiloj te tojil winikat sok te ma pajal atalel sok te yantik ants winiketik te yakik ta kuxinel ta balumilal ta ora ini. 2 Ta jujunchajp chambalametik te lek skʼoplalik yame skʼan ya awikʼ ochel juk-kojt:* stat sok smeʼ. Yan stukel te chambalametik te bolobenik skʼoplal jaʼnax ya skʼan ya awikʼ ochel chaʼkojt ta jujunchajp: stat sok smeʼ. 3 Jaʼnix jich ya skʼan ya awikʼ ochel juk-kojt* jaʼmal mutetik* te ya xwilik ta sjamalul chʼulchan —stat sok smeʼ— yuʼun jich ma xtupʼ stsʼumbal ta balumilal. 4 Melel liʼ ta sjukebal kʼajkʼal ya kakʼ tal jaʼal 40 kʼajkʼal sok 40 ajkʼabal ta balumilal sok ya jlajin ta jkʼaxel spisil te bintik kuxajtik te ay ta sba balumilal te jpastiklanoje». 5 Jich te Noé la spas spisil te bin albot ta mantal yuʼun te Jehová.

6 Kʼalal tal te Pulemal* te la snojes te balumilal, 600 yaʼbilal-a te Noé. 7 Te kʼalal mato xtal-a te Pulemale,* te Noé och ta arca* sok te snichʼnab, te yinam sok te yalibtak. 8 Te chambalametik te lek skʼoplalik sok te chambalametik te boloben skʼoplalik, te jaʼmal mutetik* te ya xwilik sok spisil te bintik ya stij sba ta lumkʼinal 9 bajtik ta stojol te Noé sok chaʼchaʼkojt ochik ta arca,* stat sok smeʼ, jich te bitʼil pasot ta mantal yuʼun Dios te Noé. 10 Ta sjukebal kʼajkʼal tal te Pulemal* ta balumilal.

11 Kʼalal 600 yaʼbilal-a te Noé ta 17 ta schebal u, tʼom tal spisil te jaʼetik ta chʼulchan sok jam tal tulan jaʼal ta chʼulchan. 12 Ta 40 kʼajkʼal sok 40 ajkʼabal tulan la yakʼ te jaʼal ta balumilal. 13 Ta kʼajkʼalnix-abi, te Noé och ta arca* sok te snichʼnab —Sem, Cam sok Jafet—, te yinam sok te oxtul yalibtak. 14 Jich ochik sok spisil te jtiʼawal chambalametik jaʼ chikan te bin yilel ta jujunchajp stsʼumbal, spisil te alakʼil chambalametik* jaʼ chikan te bin yilel ta jujunchajp stsʼumbal, spisil te chambalametik te staslajan ya xbeenik ta lum jaʼ chikan te bin yilel ta jujunchajp stsʼumbal sok spisil te jaʼmal mutetik* te ya xwilik jaʼ chikan te bin yilel ta jujunchajp stsʼumbal, te jaʼ smakojbey skʼoplal te jaʼmal mutetik sok spisil te chʼin chanetik te ya xwilike. 15 Sok spisil ta chajp chambalametik te ya yichʼik ikʼ bajtik ta stojol te Noé, chaʼchaʼkojt ochik ta arca.* 16 Jich spisil ta chajp chambalametik ochik, stat sok smeʼ, jich te bitʼil pasot ta mantal yuʼun Dios te Noé. Ta patil, te Jehová la smakbey spuertaul te arcae.*

17 Jalaj 40 kʼajkʼal te Pulemal* ta balumilal. Toy moel te jaʼe, jajch slik moel te arcae.* 18 Bejbe* yak ta nojel ta jaʼ te balumilale, pero te arca* xkajajet ta sba jaʼ stukel. 19 Bayal toy te jaʼ ta balumilal te jich mukot spisil te witsetike. 20 Jaʼ 15 xujkʼubil* jelawxan kʼaxel-a te jaʼ ta sba te witsetik.

21 Jich laj spisil te bintik kuxajtik ta balumilal: te jaʼmal mutetik* te ya xwilik, te alakʼil chambalametik,* te jtiʼawal chambalametik, te chʼin chambalametik* te ayik ta balumilal sok spisil te ants winiketike. 22 Laj spisil te bintik kuxajtik ta lumkʼinal sok te bintik ya yichʼik ikʼ. 23 Te Dios la slajin spisil te bintik kuxajtik te ayik ta sba te balumilale, jaʼnix jich la slajin-euk te ants winiketik, te chambalametik te chaneb yok, te chambalametik te staslajan ya xbeenik ta lum sok te jaʼmal mutetik* te ya xwilik ta sjamalul chʼulchan. Ta spisilik la yichʼik lajinel. Jaʼxanix kol jilel te Noé sok te machʼatik sjokinoj ta arca.* 24 Jalajxan 150 kʼajkʼal te nojel ta jaʼ te balumilale.