2 Reyes

6 Te snichʼnab te j-alwanejetik jich la yalbeyik te Eliseo: «¡Ilawil! Kʼax tenelotik te banti jokinojatkotik ta nainele. 2 Awokoluk, akʼawotik bael ta Jordán yuʼun ya jletik teʼetik swenta ya jpas jnatik yuʼun ya xkuxinotik tey-a». Jich la yal te Eliseo: «Baanik». 3 Ay jtul te jich la yale: «Awokoluk, ¿yabal xjuʼ ya ajokin bael te j-abatetik awuʼun ini?». Te Eliseo jich la yal: «Yak, ya jokinex bael». 4 Jich la sjokinlan bael. Te kʼalal kʼotik ta Jordán, jajch stsʼetik te teʼetike. 5 Ay jtul te k’alal yak ta stsʼetel-a te teʼe, chʼay koel ta mukʼul jaʼ te sjol yecheje, jich tulan jajch ta aw: «¡Aay, kajwal! ¡Jmajanoj-a!». 6 Te winik yuʼun te smelelil Dios* jich la sjojkʼoybey: «¿Banti chʼay koel?». La yakʼbey yil te banti chʼay koele. Jich yuʼun, te Eliseo la sboj tal jmajkʼuk teʼ, la schʼoj koel tey-a, jich likot moel tal te sjol te echej. 7 Te Eliseo jich la yalbey: «Tsaka lokʼel tal». Jich te winike la stsak lokʼel tal.

8 Te ajwalil yuʼun Siria bajt yakʼbey guerra te lum Israel. La yalbey te j-abatetik yuʼun te banti ya spas te scampamentoe. 9 Jich yuʼun, te winik yuʼun te smelelil Dios* jich la stikun ta albeyel te ajwalil yuʼun Israel: «Tsajtayame* aba, mame xkʼaxat bael ta lugar-abi, melel tey yakik ta koel bael-a te sirioetike». 10 Tey-abi, te ajwalil yuʼun Israel la stikun ta albeyel te soldadoetik te manchuk ya xkʼaxik ta lugar te la yalbey skʼoplal te winik yuʼun te smelelil Dios.* Te Eliseo la yalulanbey te ajwalil te banti ma xjuʼ ya xkʼaxe, jich maba kʼax tey-a. Jich kʼot ta pasel cheʼoxeb buelta.

11 Kʼax bayal ilin te ajwalil yuʼun Siria, jich yuʼun la stsob tal te j-abatetik yuʼun sok jich la yaltiklanbey: «¡Alaik ta jamal! ¿Machʼa ta koliltik te yak ta skʼasesbeyel kʼop te ajwalil yuʼun Israel?». 12 Ay jtul yabat te jich la yale: «¡Ma joʼukotik, kajwal! Jaʼ te Eliseo, te j-alwanej yuʼun Israel. Jaʼ te machʼa ya scholbey yaʼiy te ajwalil yuʼun Israel te bin muken ya awal te banti ya xwayate». 13 Jich la yal te ajwalil: «Baan, baan lea awilik te banti aye yuʼun ya jtikun ta tsakel tal». Ta patil, jich albot yaʼiy: «Ay ta Dotán». 14 Jich yuʼun, ta oranax la stikun caballoetik, carretaetik yuʼun guerra sok bayal ta tul soldadoetik. Ajkʼabalix-a te kʼalal kʼotike sok la sjoytayik te mukʼul lume.

15 Te kʼalal jajch ta buen sab sok lokʼ bael ta na te yabat te winik yuʼun te smelelil Dios,* la yil te joytaybil te mukʼul lum ta soldadoetik te kajajtik ta caballoetik sok carretaetik yuʼun guerra. Jich bajt yalbey ta oranax te Eliseo: «¡Aay, kajwal! ¿Bin ya jpastikix-a?». 16 Pero, jich la yal te Eliseo: «¡Mame xiwat! Jaʼ bayalxan te machʼatik sjokinojotik, yan stukelik ma bayalik». 17 Jaʼ yuʼun, te Eliseo jajch skʼopon Dios sok jich la yal: «Kajwal, Jehová, ya jkʼanbat wokol te yakuk ajambey sit yuʼun ya yil-a». Te Jehová ta oranax la sjambey sit te j-abat, jich la yil... ¡Te witstikil nojel ta caballoetik sok carretaetik te jichik yilel te bin-utʼil kʼajkʼ te ayik ta sjoyobal te Eliseo!

18 Te kʼalal koik bael te sirioetik ta stojol, te Eliseo jich la skʼopon te Jehová: «Awokoluk, makbeya sit te soldadoetik ini». Jich yuʼun, te Diose la smaktiklanbey sit jich te bitʼil kʼanbot yuʼun te Eliseo. 19 Te Eliseo jich la yaltiklanbey: «Ma jaʼuk te be ini ni jaʼuk te mukʼul lum ini te banti ya akʼan ya xbaexe. Laʼik, ya kikʼex bael ta stojol te winik te yakex ta sleele». Pero la yikʼtiklan bael ta Samaria.

20 Te kʼalal kʼotik ta Samaria, te Eliseo jich la yal: «Kajwal, Jehová, jambeya sitik yuʼun jich ya yilik kʼinal». Jich yuʼun, te Jehová la sjamtiklanbey sit, jich la yilik te ayik ta yolil Samaria. 21 Te kʼalal la yil te ajwalil yuʼun Israel te soldadoetike, jich la yalbey te Eliseo: «¿Yabal jmiltiklan? Jtat, ¿yabal jmiltiklan?». 22 Pero, jich la yal te Eliseo: «Ma xa amiltiklan. ¿Yuʼunbal ya amiltiklan ta espada awuʼun sok ta atʼimalteʼ te machʼatik ya achuktiklan tale? Akʼtiklanbeya sweʼel sok jaʼ yuchʼik. Ta patil, akʼa sujtukik bael sok te yajwale». 23 Jich yuʼun la spasbey bayal sweʼel te soldadoetik, jich weʼ uchʼajik. Ta patil la stikunlan sujtel sok te yajwalike. Jich maʼyuk bin-ora ochikix ta skʼinal Israel te jpojbiluketik te jajchemik tal ta Siria.

24 Ta patil, te Ben-Hadad, te ajwalil yuʼun Siria, la stsob tal te soldadoetik yuʼun,* mo bael ta Samaria sok la sjoytay. 25 Jich tal tulan wiʼnal ta skʼinal Samaria. Ta skaj te jal kʼajkʼal la yichʼik joytayele, 80 ta sejp plata kʼot stojol te sjol burro sok joʼeb ta sejp plata kʼot stojol te jun ta schanebal cab* stsaʼ stsumut.* 26 Te kʼalal yak ta beel ta ba tsʼajkʼ-a te ajwalil yuʼun Israel, jich awtayot yuʼun jtul ants: «¡Aay, kajwal! ¡Koltayawotik!». 27 Jich la yal te ajwalil: «Teme maba ya skoltayat te Jehová, ¿bin-utʼil ya xjuʼ ya jkoltayat te joʼone? ¿Aybal banti ya xjuʼ ya jta sit awal tsʼunubil vino o aceite yuʼun ya kakʼbat?». 28 Jich la sjojkʼoy te ajwalil: «¿Bin-a te awokole?». Jich la yal te antse: «Te ants ini jich la yalbon: ‹Akʼa jmil jweʼtik te akerem-al, te pajele jaʼ ya jmil jweʼtik te kuʼune›. 29 Jich la jpaykotik te jkerem-al sok la jweʼkotik. Ta yan kʼajkʼal, jich la kalbey te antse: ‹Akʼa jmil jweʼtik te akerem-ale›, pero la snakʼ te yale».

30 Jaʼnax te kʼalal la yaʼiy stojol te ajwalil te bin la yal te antse, la schʼiʼ* skʼuʼ yuʼun. Te kʼalal yak ta beel bael ta sba te tsʼajkʼ, te ants winiketik la yilik te slapoj chʼixal pakʼ* ta yeʼtal skʼuʼ te ajwalile. 31 Jich la yal te ajwalil: «¡Akʼa yakʼbon tulan castigo te Dios teme maba ya jxotʼbey* lokʼel sjol yoʼtik te Eliseo snichʼan Safat!».

32 Te Eliseo nakal ta sna-a, jokinbil ta naklej yuʼun te jwolwanejetike. Te ajwalil ay machʼa la stikun bael te jaʼ nailaj bael yuʼun, pero te kʼalal mato xkʼot-a te winike, te Eliseo jich la yalbey te jwolwanejetike: «¿Labal awilik te la yal mantal te snichʼan jmilawal ini te yakuk xotʼbonik* lokʼel te jole? Jich yuʼun chapalukexme te kʼalal ya xjul te machʼa la yichʼ tikunel tale, makaik te tiʼnail sok tenaik yuʼun jich ma x-och-a. ¿Yuʼunbal ma xa awaʼiyik te yak ta talel te yajwal te aynax tal ta spate?». 33 Te k’alal yakto ta kʼop* sok-a te jwolwanejetik, kʼot te winik te tikunbile. Ta patil kʼot te ajwalil sok jich la yal: «Te wokolil ini talem ta stojol Jehová. ¿Bin yuʼun te ya jmaliyxan te koltayel yuʼun te Jehová?».