Apocalipsis

18 Ta patil la kil yan chʼul-abat te yak ta koel tal ta chʼulchan te yichʼoj tulan yaʼtel, sok xojobajnax jilel te balumilal ta swenta te yutsilale. 2 Jich tulan awun: «¡Jinix! ¡Jinix te Mukʼul Babilonia! Nainbilix yuʼun te pukujetik, jaʼ te banti snakʼoj sbaik spisil te chopol* espirituetik sok spisil te jaʼmal mutetik te boloben skʼoplalik sok te ilaybilike. 3 Melel spisil te nacionetik la yuchʼik te vino yuʼun te spasel mulwej* yuʼune, te ajwaliletik ta balumilal la spasik mulwej sok, te jchonbajeletik sok te jmanbajeletik te ayik ta balumilal kʼulejubik ta swenta te mukʼul lum te la smulan te kʼulejalil te jkʼaxel ma xkʼexaw yuʼune».

4 La kaʼiy te ay yan machʼa kʼopoj ta chʼulchan te jich yak ta yalel: «Lokʼanik tal ta stojol, lum kuʼun, teme ma pajaluk ya akʼan ya ata amulik soke, jaʼnix jich teme maba ya akʼan te pajal ya ata awokolik soke. 5 Melel kʼoemix kʼalalto ta chʼulchan te smule sok jul ta yoʼtan te Dios te bintik chopol* spasoje. 6 Sutbeyaik spakol jich te bin-utʼil spasojbey yantik. Jich, cheb buelta akʼbeyaik stoj te bintik spasoje. Teynix ta copa te banti la schajpan te uchʼbalile, chajpanbeyaik cheb buelta te uchʼbalile. 7 Akʼbeyaik swokol sok akʼbeyaik smel yoʼtan jich yipal te bin-utʼil la stoy sbae sok ta swenta te kʼulejalil te la smulan te jkʼaxel ma snaʼ kʼexlal yuʼune. Melel jich ya yalulan ta yoʼtan: ‹Jich nakalon te bin-utʼil ajwalil ants; maba meʼba antson sok maʼyuk bin-ora ya xbajt jmel koʼtan yuʼun te ay machʼa ya xlaj kuʼune›. 8 Jaʼ yuʼun, ta jun-nax kʼajkʼal ya xtal te wokoliletik yuʼune —lajel, mel-oʼtan sok wiʼnal— sok jkʼaxelme ya schikʼik ta kʼajkʼ. Melel ay yuʼel te Jehová* Dios te la yichʼ ta kʼope.

9 »Te ajwaliletik ta balumilal te la spasik mulwej* sok te j-antsinel* ants pajal la smulanik te kʼulejalil te ma snaʼikix kʼexlal yuʼune yame x-okʼik sok yame smajulan yoʼtanik te kʼalal ya yilik te xtomet schʼailel yuʼun te la yichʼ chikʼele. 10 Namaltome* ya stejkʼan sbaik ta yilel ta skaj te ya xiʼik te wokolil yak ta kʼaxel ta stojole. Jichme ya yalik: ‹¡Oʼbol aba! ¡Oʼbol aba, jaʼat mukʼul lum Babilonia, te bayal awipe! ¡Melel ta jun-nax ora jul te castigo ta atojole!›.

11 »Jaʼnix jich, te jchonbajeletik sok te jmanbajeletik te ayik ta balumilal yame x-okʼik sok yame smel yoʼtanik ta stojol te j-antsinel* antse, melel maʼyuk machʼa ya xmanbotikix yuʼun spisil te schonbajelik, 12 jaʼ te oro, plata, tʼujbil tonetik, perlaetik, lekil lino-pakʼ, kuxul morado pakʼ, seda-pakʼ sok tsajal pakʼ, spisil ta chajp te bintik pastiklanbil ta teʼetik te sumet* yikʼ sok spisil ta chajp te bintik pastiklanbil ta sbakel ye elefante sok spisil te bintik pastiklanbil ta tʼujbil teʼetik, ta cobre, ta takʼin o ta mármol-ton; 13 jaʼnix jich, maʼyuk machʼa ya xmanbotikix yuʼun te canela, te bin sumet* yikʼ te talem ta India, pom, aceite te yichʼoj perfume, olíbano, vino, aceite yuʼun oliva, lekil harina, trigo, wakaxetik, tuminchijetik, caballoetik, carretaetik, mosoetik sok ants winiketik. 14 Te bintik lek amulanoj sok spisil te lekil weʼeliletik soknix spisil te bintik tʼujbiliknax maʼyukix awuʼun spisil. Maʼyuk bin-ora ya ataxan.

15 »Te machʼatik la schonik spisil ini kʼulejubik ta swenta te j-antsinel* antse, namaltome* ya stejkʼan sbaik ta yilel ta skaj te ya xiʼik te wokolil yak ta kʼaxel ta stojole. Yame x-okʼik sok yame smel yoʼtanik, 16 jichme yakik ta yalel: ‹¡Oʼbol sba! ¡Oʼbol sba te mukʼul lum te slapoj lekil lino-pakʼ, kuxul morado pakʼ sok tsajal pakʼ, soknix te schʼaloj* sba ta oro, tʼujbil tonetik sok perlaetik! 17 ¡Melel ta jun-nax ora la yichʼ lajinel bayal kʼulejalil!›.

»Spisil te capitanetik yuʼun barco, spisil te machʼatik ya xbeenik ta barco, te j-aʼteletik te swentainojik te bitʼil ya xbeen te barco sok spisil te j-aʼteletik te ya x-aʼtejik ta mar namalto* tekʼajtik jilel. 18 Te kʼalal ya yilik te xtomet schʼailel yuʼun te la yichʼ chikʼele, jich ya yalik ta aw: ‹¡¿Aybal yan lum jich te bin-utʼil te mukʼul lum ini?!›. 19 La sbujkʼiyik tan ta sjolik, yakik ta okʼel sok ta mel-oʼtan te jich yakik ta aw: ‹¡Oʼbol sba! ¡Oʼbol sba te mukʼul lum, te banti kʼulejubik spisil te machʼatik ay sbarcoik ta mar! ¡Melel ta jun-nax ora la yichʼ lajinel!›.

20 »¡Tseʼelukme awoʼtan, chʼulchan, ta swenta te bin kʼot ta stojole! ¡Jaʼnix jich tseʼelukme awoʼtanik, jaʼex te machʼatik chʼultesbilex, te jpuk-kʼopex sok te j-alwanejex! Melel la awichʼikix koltayel yuʼun te Dios kʼalal la yakʼbey castigo te j-antsinel* antse».

21 Ay jtul chʼul-abat te ay bayal yip te la skʼech mukʼul ton te jich yilel te bin-utʼil jsejp mukʼul ton yuʼun molino, jich yak ta yalel te kʼalal la schʼoj ochel ta mar: «Jichme ya yichʼ chʼojel koel ta oranax te Babilonia te mukʼul lume, sok maʼyukix bin-ora ya yichʼ ilel. 22 Maʼyuk bin-ora ya yichʼxan aʼiyel ta atojol te machʼatik ya xkʼayojinik te ya stijik s-arpaik ni jaʼuk te skʼop te aʼtejibaletik yuʼun música ni jaʼuk te machʼatik ya stijik te amay* o te machʼatik ya stijik te trompetaetik. Sok maʼyuk bin-ora te ay machʼa ya x-aʼtejxan ta atojol te ya snaʼ spasel biluk aʼtelil. Sok maʼyuk bin-ora ya yichʼxan aʼiyel ta atojol te skʼop te jsejp ton yuʼun molino. 23 Maʼyuk bin-ora ya xtilxan ta atojol te xojobil te tsumbil kʼajkʼ sok maʼyuk bin-ora ya yichʼxan aʼiyel ta atojol te skʼop te kerem te ya xnujpun o te achʼix te ya xnujpun. Melel te jchonbajeletik sok te jmanbajeletik awuʼun, jaʼik te machʼatik mero jkʼulejetik ta balumilal-ae sok la aloʼlay spisil te nacionetik ta swenta te spasel espiritismo* awuʼune. 24 Jich, tey la yichʼ tael ta stojol te schʼichʼel te j-alwanejetik, te machʼatik chʼultesbilik sok spisil te machʼatik la yichʼik milel ta balumilal».