Te lek yachʼil kʼop ya yal te Mateo

7 »Mame xa alebeyik smul te yantike, yuʼun jich maba ya awichʼ lebeyel amulik-euk. 2 Jich bitʼil ya alebeyik smul te yantike, jaʼnixme jich ya awichʼ lebeyel amulik-euk, te bitʼil ya apʼisbeyik smul te yantike, jichnixme ya awichʼik pʼisbeyel-euk te amulike. 3 ¿Bin yuʼun ya awilbey te chʼin ak te ay ta sit te awermano, pero maba ya awil te tsʼamteʼ kʼatal ta asite? 4 ¿Bin-utʼil ay-a te jich ya awalbey te awermano ‹ya jlokʼesbat te chʼin ak ay ta asite›, te bitʼil kʼatal tsʼamteʼ ta asit te jaʼate? 5 ¡Jchaʼlam-oʼtan!* Lokʼesa nailuk te tsʼamteʼ kʼatal ta asite, jich ya xjuʼ ya awil te bin-utʼil ya alokʼesbey te chʼin ak ay ta sit te awermano.

6 »Mame xa awakʼbeyik te tsʼiʼetik te bin chʼultesbile. Mame xa abuskʼinbeyik perlaetik te chitametik, mame jaʼuk te ya spechʼtiklan ta tekʼel sok te ya xtal ta atojolik yuʼun ya stiʼex.

7 »Teme ma xa akom abaik ta skʼanele, yame awichʼik akʼbeyel; teme ma xa akom abaik ta sleele, yame ataik; teme ma xa akom abaik ta stijel te tiʼnaile, yame awichʼik jambeyel. 8 Melel spisil te machʼa ay bin ya skʼane yananix x-akʼbot-a, spisil te machʼa ay bin ya slee yananix sta-a, spisil te machʼa ya stij te tiʼnaile yananix xjambot-a. 9 Teme ya skʼanbat pan te anichʼane, ¿tonbal ya awakʼbey? 10 Jaxan teme ya skʼanbat jkojt chaye, ¿yabal awakʼbey jkojtuk chan? 11 Jich yuʼun, manchukme jmulawilex ya anaʼik yakʼbeyel lekil majtaniletik te awal anichʼnabike, ¡jaʼuktobalix-a te aTatik te ay ta chʼulchane! ¿Mabal yakuk yakʼbey te bintik lek te machʼatik ya xkʼanbot yuʼune?

12 »Jichme xa apas ta stojol yantik spisil te bin ya amulan te ya spasik ta atojole. Yuʼun jich ya yal te Ley sok te J-alwanejetike.

13 »Ochanik te banti chʼin-nax sjamalel te tiʼnail, melel mukʼ sjamalel te tiʼnail sok mukʼ sjamalel te be te ya x-ikʼawan bael ta lajele, sok bayal te machʼatik ya x-ochik tey-ae; 14 pero chʼin-nax sjamalel te tiʼnail sok chʼin-nax sjamalel te be te ya x-ikʼawan bael ta kuxlejalile, sok ma bayaluk te machʼatik ya x-ochik tey-ae.

15 »Tsajtayame* abaik yuʼun te lotil j-alwanejetik te ya xnoptsaj* ta atojolik jich bin-utʼil tuminchijetik, pero pajalik sok jtiʼawal jaʼmal tsʼiʼetik. 16 Yame anaʼbeyik sba ta swenta te site.* ¿Yabal xjuʼ ta tulel* tsʼusubetik ta chʼixetik o higoetik ta jaʼmal chʼixetik? 17 Spisil te lekil teʼe lek sit ya yakʼ, yan te teʼ te ma lekuke, maba lek te sit ya yakʼ. 18 Spisil te teʼ te leke ma xjuʼ te ma lekuk sit ya yakʼe, jaʼnix jich te teʼ te ma lekuke, ma xjuʼ te lek sit ya yakʼe. 19 Spisil te teʼ te ma lekuk sit ya yakʼe, ya yichʼ tsʼetel sok ya yichʼ otsesel ta kʼajkʼ. 20 Jaʼ yuʼun, te winiketik-abi yame anaʼbeyik sba ta swenta te yaʼtelike.

21 »Ma spisiluk te machʼatik ya yalbonik ‹Kajwal, Kajwal› ya x-ochik ta banti te Wentainel* yuʼun te chʼulchane. Jaʼnaxme ya x-ochik te machʼatik ya spasik te skʼanojel yoʼtan* te jTat te ay ta chʼulchane. 22 Ta yorail-abi, bayalme machʼatik jich ya yalbonik: ‹Kajwal, Kajwal, ¿yuʼunbal ma la kalkotik albilkʼopetik ta abiil, sok ta swenta abiil la jlokʼestik pukujetik soknix ta swenta abiil la jpaskotik bayal milagroetik?›. 23 Pero, jichme ya kaltiklanbey: ‹¡Maʼyuk bin-ora la jnaʼbeyex abaik! ¡Lokʼanik bael ta jtojol, jaʼex te la apasik te bintik ma leke!›.

24 »Jaʼ yuʼun, spisil te machʼa ya yaʼiy te bin ya kale sok te ya spas ta skuxlejale jaʼ pajal sok te pʼijil winik te la spas sna ta sba mukʼul ton. 25 Tal tulan jaʼal sok noj te mukʼul jaʼe, jaʼnix jich tal tulan ikʼ te la syukʼilan te nae, pero maba jin te nae, melel yichʼoj yiptajib ta mukʼul ton. 26 Yan te machʼa ya yaʼiy te bin ya kale, pero maba ya spas ta skuxlejal, jaʼ pajal sok te winik te maʼyuk spʼijil te la spas sna ta jiʼileltik. 27 Tal tulan jaʼal sok noj te mukʼul jaʼe, jaʼnix jich tal tulan ikʼ te la syukʼilan te nae, pero oranax jin koel tal te nae. Ta melel, jin ta jkʼaxel».

28 Kʼalal laj yoʼtan ta nojpteswanej te Jesuse, chamnax yoʼtanik* yuʼun te ants winiketike, 29 melel jich nojpteswan te bin-utʼil machʼa yichʼoj tulan yaʼtel, ma jichuk te bin-utʼil te escribaetike.