Carta ta stojol te Colosenseetik

4 Jaʼex, te yajwalex te mosoetike, lekukme sok pajalukme xa awiltiklanik te mosoetik awuʼunike, melel anaʼojik te ay Awajwalik-euk ta chʼulchan.

2 Mame xa akom abaik ta skʼoponel Dios, te kʼalal jich ya apasike, kuxulukme awoʼtanik sok alaik wokol. 3 Jaʼnix jich kʼoponaik Dios ta jtojolkotik-euk sok kʼanbeyaik te Dios te yakuk sjambotik jun tiʼnail yuʼun ya jcholbeytik te skʼope sok jich ya kakʼtik ta naʼel te bin mato yakʼoj ta naʼel-a te Dios ta swenta te Cristo, jaʼ ta swenta te chukulon ta cadena. 4 Jaʼnix jich kʼanbeyaik te Dios te yakuk xjuʼ kuʼun te jamal ya jcholbey skʼoplal jich te bin-utʼil ya skʼan ya jpase.

5 Ayukme spʼijil awoʼtanik ta stojol te machʼatik maba jchʼuunjeletike sok naʼaikme stuuntesel ta lek te atiempoik. 6 Spisilukme-ora ayuk yutsil te bitʼil ya xkʼopojexe, ayukme yatsʼamul, yuʼun jich ya anaʼik te bin-utʼil ya asutbeyik skʼop ta jujuntul te ants winike.

7 Te kermanotik Tíquico te kʼux ta koʼtantike, j-abat te jun yoʼtan sok te pajal yakotik ta abatinel ta stojol te Kajwaltike, jaʼme ya yalbeyex awaʼiyik te bin-utʼil ayone. 8 Ya jtikun ta atojolik yuʼun jich ya anaʼik te bin-utʼil ayonkotik sok yuʼun ya yakʼbeyex smukʼul kʼinal awaʼiyik. 9 Yame xjokinot bael yuʼun te Onésimo, te kermanotik te kʼux ta koʼtantik sok te jun yoʼtan te teynix talem ta awolilike, jaʼme ya scholbeyex awaʼiyik te bin yak ta kʼoel ta pasel liʼi.

10 Ya stikunbeyex spatjibal awoʼtanik te Aristarco te joy ta chukel, jaʼnix jich ya stikunbeyex spatjibal awoʼtanik te Marcos te jaʼ sprimo te Bernabé (jaʼ te machʼa ya skʼan te lek ya awilik teme bajt yilexe jich te bin-utʼil la awichʼik albeyel ta mantale), 11 sok ya stikunbeyex spatjibal awoʼtanik te Jesús, te jaʼnix jich naʼbil sba bitʼil Justo, te yichʼoj circuncisión-euke.* Jaʼiknax te machʼatik skoltayojonik ta aʼtel ta swenta te Wentainel* yuʼun te Diose, sok yakʼojbonik bayal smukʼul kʼinal kaʼiy. 12 Ya stikunbeyex spatjibal awoʼtanik-euk te Epafras te j-abat yuʼun te Cristo Jesús, te teynix talem ta awolilike. Ta spisil yoʼtan ya skʼopon Dios ta atojolik ta spisil-ora, yuʼun jich jun awoʼtanik ta swenta te yijuben te schʼuunel awoʼtanik sok te kʼoem ta awoʼtanik ta lek spisil te skʼanojel yoʼtan te Diose. 13 Schʼuunoj koʼtan te bayal bin ya spas ta atojolik sok ta stojol te machʼatik ayik ta Laodicea sok ta Hierápolis.

14 Jaʼnix jich ya stikunbeyex spatjibal awoʼtanik te Lucas te jpoxtaywanej te kʼux ta koʼtantike, soknix te Demas ya stikunbeyex spatjibal awoʼtanik. 15 Akʼbonik spatjibal yoʼtan te hermanoetik ta Laodicea sok te Ninfa soknix te congregación te ya stsob sba ta snae. 16 Te kʼalal la akʼoponikix-a te carta ini, akʼa yichʼ kʼoponel-euk ta congregación te ay ta Laodicea, jaʼnix jich kʼoponaik-euk te carta te la yichʼ tikunel ta Laodicea. 17 Jaʼnix jich, jichme xa awalbeyik te Arquipo: «Pasa tulan ta sjuʼtesel te aʼtelil te la yakʼbat te Kajwaltike».

18 Joʼon Pabloon, te la jtsʼibaybeyex ta jkʼab te spatjibal oʼtanil ini. Julukme ta awoʼtanik te chukulon ta cadenae. Ayukme ta atojolik te slekil yoʼtan Dios te ma snujpʼuk ya kichʼtike.