Te lek yachʼil kʼop ya yal te Lucas

17 Te Jesús jich la yalbey te jnopojeletik yuʼun: «Ta melel, aynanix-a te bintik ya yak’ xyalotik ta mulile. Pero ayme swokol te machʼa ya yak’ xyal ta mulil te yane. 2 Jaʼ lek te ya yichʼ chukbeyel ta snukʼ te jsejp ton yuʼun molino sok te akʼa yichʼ chʼojel ochel ta mar te machʼa ya yakʼ xyal ta mulil jtuluk te machʼatik pekʼel yakʼoj sbaik. 3 Tsajtayame* abaik te jaʼexe. Teme ay la sta smul ta atojol te awermanoe, baan, kʼopojan sok. Teme la sujtes yoʼtane, pasbeya perdón. 4 Manchukme jukeb buelta ya sta smul ta atojol ta jun kʼajkʼal sok teme jukeb buelta ya xtal yalbat ‹Pasbon perdón› teme xchie, ya skʼan ya apasbey perdón».

5 Tey-abi, te jpuk-kʼopetik jich la skʼanbeyik te Kajwaltike: «Akʼbotikxan schʼuunel koʼtankotik». 6 Jich albotik yuʼun te Kajwaltik: «Te jichuk smukʼul schʼuunel awoʼtanik te bitʼil jpʼij sbakʼ mostaza,* ya xjuʼ ya awalbeyik te jpejt* teʼ* ini ‹¡Bula aba lokʼel liʼi, baan tsʼuna aba ta mar!›, jichme ya schʼuunbeyex te akʼopike.

7 »Teme ay jtul awabat te yak ta sjokʼel lum o te yak ta skanantayel tuminchijetik, ¿yabal awalbey te kʼalal ya sujt tal ‹Laʼ ta oranax, weʼan›? 8 ¿Mabal jichuk ya awalbey ‹Chajpanbon te jweʼele, lapa smajkil achʼujt, kʼasesbon tal te jweʼele, jaʼto teme laj koʼtan ta weʼel uchʼele, patil ya xweʼ x-uchʼat te jaʼate›? 9 ¿Yabal awalbey wokol yuʼun te awabat te la spas te bin la awalbey ta mantale? Maʼuk. 10 Jaʼnix jich-euk te jaʼexe, te kʼalal la apasikix spisil-a te bin la awichʼik albeyel ta mantal te ya apasike, jichme xa awalik: ‹Jaʼnax j-abatotik te ma xtuunotike. Jaʼnax la jpastik te bin-nix ay ta jwentatik spasel-ae›».

11 Te kʼalal yak ta bael ta Jerusalén te Jesús, kʼax ta stiʼ mojon yuʼun Samaria sok Galilea. 12 Te kʼalal yak ta ochel bael ta chʼin lum, la sta sba sok lajuntul winiketik te yichʼojik kʼaʼel chamele, pero namalto* tekʼajtik jilel stukelik. 13 Jich la yawtayik: «¡Jesús, Maestro, naʼa yoʼbolil jbakotik!». 14 Te kʼalal ilotik yuʼun te Jesuse, jich albotik yuʼun: «Baan, akʼa abaik ta ilel ta stojol te sacerdoteetike». Te kʼalal yakik ta bael-ae, chʼay te skʼaʼel chamelike. 15 Ay jtul te kʼalal la yil te lekubixe, sujt tal sok tulan yak ta yalbeyel yutsil skʼoplal te Diose. 16 La spajkan sba kʼalal ta lum ta yok te Jesús sok la yalbey wokol. Jaʼ jtul samaritano. 17 Jich la yal te Jesús te kʼalal la yil ini: «¿Mabal lajuntuluk te lekubike? ¿Banti jilikix-a te baluntulxane? 18 ¿Bin-utʼil ay-a te jaʼnax sujt tal ta yalbeyel yutsil skʼoplal Dios te winik ini te talem ta yan lume?». 19 Jich la yalbey te winike: «Jajchan, baan; lekubatix ta swenta te schʼuunel awoʼtane».

20 Te fariseoetik la sjojkʼoybeyik te Jesús te bin-ora ya xtal te Wentainel* yuʼun te Diose, jich albotik yuʼun: «Ma chikanuk ta ilel te bitʼil ya xtal te Wentainel yuʼun te Diose. 21 Sok ma jichuk ya yal te ants winiketik ‹¡Ilawilik, liʼ ay ini!› o ‹¡Lum ay ini!›. Ilawilik, liʼ ayix ta awolilik te Wentainel* yuʼun te Diose».

22 Tey-abi, jich la yalbey te jnopojeletike: «Yame sta yorail te awoʼtanuk ya akʼan ya awilik te sNichʼan te Winik* manchukme junuknax kʼajkʼal, pero maba ya awilik. 23 Jichme ya yalbeyex te ants winiketik ‹¡Ilawilik, liʼ ay ini!› o ‹¡Ilawilik, lum ay ini!›. Mame xlokʼex sok mame xa atʼunik bael. 24 Melel jich te bin-utʼil tsantsewal te ya xjajch tal kʼalalto ta jujunjejch stiʼil te chʼulchane, jaʼnixme jich te skʼajkʼalel te sNichʼan te Winike.* 25 Pero, nail ya xkʼax bayal swokol sok ya yichʼ p’ajel yuʼun te jkaj tsʼumbalil ini. 26 Jichnix bin-utʼil ta skʼajkʼalel te Noé, jichnix ya xkʼot ta pasel ta skʼajkʼalel te sNichʼan te Winike.* 27 Te ants winiketik yakik ta weʼel uchʼel, te winiketik yakik ta nujpunel, te antsetik yakik ta akʼel ta nujpunel... jaʼto te kʼalal och ta arca te Noé, tal te Pulemal,* spisil lajik yuʼun. 28 Jaʼnixme jich ya xkʼot ta pasel te bin-utʼil ta skʼajkʼalel te Lot: te ants winiketik yakik ta weʼel uchʼel, ta manbajel, ta chonbajel, ta tsʼunbajel, ta spasel snaik... 29 Pero, te bin kʼajkʼalil lokʼ ta Sodoma te Lot, ko tal kʼajkʼ sok azufre ta chʼulchan, spisil lajik yuʼun. 30 Jaʼnixme jich ya xkʼot ta pasel ta skʼajkʼalel te sNichʼan te Winik* te kʼalal ya yakʼ sba ta ilele.

31 »Ta kʼajkʼal-abi, te machʼa ay ta sba sna, mame xkoix tal ta slokʼesel sbiluk ta yutil sna; jaʼnix jich te machʼa baem ta aʼtel ta skʼinale, mame sujtix ta sleel te bintik la yijkitay jilele. 32 Julukme ta awoʼtanik te yinam Lot. 33 Te machʼa ma skʼan ya yakʼ sba ta lajele yananix xlaj-a, yan te machʼa ya yakʼ sba ta lajel yame sta skuxlejal yan buelta. 34 Ya kalbeyex, ta ajkʼabal-abi ay chaʼtul te wayalik ta jun-nax wayibal: jtul ya yichʼ ikʼel bael, pero jtul ya yichʼ ijkitayel. 35 Ay chaʼtul antsetik te ay bin yakik ta sjuchʼel ta jun-nax molino: jtul ya yichʼ ikʼel bael, pero jtul ya yichʼ ijkitayel». 36 * 37 Te kʼalal la yaʼiyik stojol ini, jich la sjojkʼoybeyik: «¿Banti, Kajwal?». Jich albotik yuʼun: «Te banti ay te chamen bakʼete, tey ya stsob sbaik-a te mukʼul xiketik».*