Éxodo

20 Te Dios la yakʼ te mantaliletik ini:

2 «Joʼon Jehovaon te Dioson awuʼun te la jlokʼesat tal ta skʼinal Egipto te banti mosoinbilat-ae. 3 Mame ayuk yantik diosetik awuʼun, joʼon-naxme.

4 »Mame xa apasbey slokʼomba o chikan te bintik pajal sok te ay ta chʼulchan, te bintik ay ta balumilal o te bintik ay ta jaʼ. 5 Mame xa akejan aba ta stojolik sok mame xjajch awichʼik ta mukʼ, melel joʼon Jehovaon te Dioson awuʼun. Joʼon te Dioson te ya jkʼan te jaʼnax ya kichʼ ichʼel ta mukʼe. Ta swenta te meʼil tatiletik yame kakʼbey castigo te alnichʼanetik ta yoxkajal sok ta schankajal te machʼatik ya spʼajonike, 6 pero yame kakʼbey yil skʼuxul koʼtan te ma x-ijkitaywan ta stojol jmil kajalkaj stsʼumbal te machʼatik kʼuxon ta yoʼtanik sok te ya schʼuunbonik te mantaliletik kuʼune.

7 »Mame tojolnax ya awalbey sbiil te Jehová te Dios awuʼun, melel te Jehová yananix yakʼbey castigo-a te machʼa tojolnax ya yalbey te sbiile.

8 »Naʼame te skʼajkʼalel sábado swenta chʼultesbiluk awuʼun. 9 Ayme wakeb kʼajkʼal awuʼun yuʼun ya x-aʼtejat sok yuʼun ya apas spisil te bintik ya skʼan ya apase, 10 pero te sjukebal kʼajkʼal jaʼ jun sábado ta swenta te Jehová te Dios awuʼun. Mame skʼan ya x-aʼtejat te jaʼat, akerem, awantsil nichʼan, amoso, acriada, achambalam o jyanlum te yak ta nainel te banti ayate. 11 Melel ta wakeb kʼajkʼal te Jehová la spas te chʼulchan, balumilal, te mar sok spisil te bintik ay tey-a, pero ta sjukebal kʼajkʼal la skux yoʼtan. Jaʼ yuʼun, te Jehová la yakʼbey bendición te skʼajkʼalel sábado sok la schʼultes.

12 »Ichʼa ta mukʼ te atat sok te anan* yuʼun jal ya xkuxinat ta lumkʼinal te ya yakʼbat te Jehová te Dios awuʼun.

13 »Mame xa awaʼiy milaw.

14 »Mame xa awaʼiy antsiwej sok mame xa awakʼ aba ta antsinel.

15 »Mame xa awaʼiy elekʼ.

16 »Mame xa awal lot ta stojol te apatxujk te kʼalal ya awichʼ akʼel ta testigo.

17 »Mame xbikʼtaj awoʼtan yuʼun te sna te apatxujke. Mame xbikʼtaj awoʼtan yuʼun te yinam te apatxujk o te smoso, scriada, storo, sburro o chikan te bintik ay yuʼun te apatxujke».

18 Spisil te lum la yaʼiy te chawuk, tsantsewal sok te yokʼel te xulubil sok la yilik te wits te yak ta lokʼel schʼailele. Kʼalal la yilik sok la yaʼiyik stojol-abi, jajchik ta nijkel yuʼun xiwel sok namal* la yakʼ sbaik jtebuk. 19 Jaʼ yuʼun, jich la yalbeyik te Moisés: «Jaʼat xa akʼopononkotik, joʼotik ya jchʼam kaʼiytik stojol, pero mame jaʼuk ya skʼoponotik te Diose yuʼun jich maba ya xlajotik-a». 20 Te Moisés jich la yalbey te lume: «Mame xiwex, melel te smelelil Dios* tal spasex ta prueba yuʼun spisil-ora ya axiʼik* sok yuʼun maba ya ata amulik ta stojol». 21 Jaʼ yuʼun, te lume namal* la yakʼ sbaik jtebuk, yan stukel te Moisés noptsaj* bael ta stojol te ijkʼal tokal te banti ay te smelelil Diose.*

22 Te Jehová jich la yalbey te Moisés: «Jichme ya skʼan ya awalbey te israeletik: ‹Jaʼexnix la awilikix te la jkʼoponex tal kʼalalto ta chʼulchan. 23 Mame xa apasik diosetik te pasbilik ta plata yuʼun ya awichʼik ta mukʼ, joʼon-naxme Dioson awuʼunik. Jaʼnix jich mame xa apasik diosetik te pasbilik ta oro. 24 Pasbon jun skajtajib chikʼbil majtanil ta puro lum. Ta sba yame awakʼbon chikʼbil majtaniletik, milbil majtaniletik ta swenta lamalkʼinal, tuminchijetik sok te wakaxetik awuʼune. Ta bayuk te banti ya jkʼan ya yichʼ naʼel te jbiile, ya xboon ta atojol sok ya kakʼbat bendición. 25 Teme ya apasbon jun skajtajib chikʼbil majtanil ta ton, mame xa apas ta tonetik te setʼbilik ta aʼtejibaletik. Melel yame abolobtesbey skʼoplal teme ya atuuntes cincel. 26 Te skajtajib te chikʼbil majtanile, mame kajalkajuk moel xa apas yuʼun jich te kʼalal ya xmoat baele, maba ya xchiknaj ta ilel te abakʼetale›.