Te lek yachʼil kʼop ya yal te Mateo

10 Jich yuʼun, te Jesús la stsob tal te 12 ta tul jnopojeletik yuʼun sok la yakʼbey tulan yaʼtelik ta slokʼesel pukujetik soknix ta slekubtesel spisil te machʼatik ayik ta chamel sok te machʼatik ay bintik kʼux ya yaʼiyike.

2 Jich sbiil te 12 ta tul jpuk-kʼopetik yuʼun te Jesuse: Te Simón te naʼbil sba bitʼil Pedro sok te Andrés te jun smeʼ statike; te Santiago sok te Juan te jaʼ snichʼnab Zebedeo; 3 te Felipe sok te Bartolomé; te Tomás sok te Mateo te jkʼanpatane; te Santiago snichʼan Alfeo, sok te Tadeo; 4 te Simón te Cananita* sok te Judas Iscariote (te machʼa la yakʼ ta kʼabal te Jesuse).

5 Te Jesús la stikunlan bael te 12 ta tul jpuk-kʼopetik, jich la yaltiklanbey ta mantal: «Mame xbaex ta skʼinal jyanlumetik sok mame x-ochex ta skʼinal Samaria. 6 Jaʼnaxme xa aleik te ants winiketik yuʼun Israel te chʼayemik jich bin-utʼil tuminchijetik. 7 Jichme xa awalik ta scholel te skʼop Diose, ‹Nopol* ayix te Wentainel* yuʼun te chʼulchane›. 8 Lekubtesaik te jchameletik sok te machʼatik yichʼojik kʼaʼel chamele, chaʼkuxajtesaik te machʼatik lajemik, lokʼesaik pukujetik. Ta majtanil la awichʼik, jaʼnix jich ta majtanil xa awakʼik. 9 Mame xa awichʼik bael oro, plata o cobre ta schujkil achʼujtik,* 10 mame xa awichʼik bael aweʼelik, yan akʼuʼik, yan atepik o axanabik, ni anabateʼik; melel te machʼa ya x-aʼteje yame sta sweʼel.

11 »Te kʼalal ya xkʼoex ta jpam mukʼul lum o ta chʼin lum, leaik jaʼto teme la ataik te machʼa ya smulan te skʼop Diose, jilanik ta sna jaʼto teme lokʼex bael ta lugar-abi. 12 Te kʼalal ya xkʼoex ta jun na, patbeyaikme yoʼtan te machʼatik tey ayik-ae. 13 Teme la smulanik te skʼop Diose, ayukme lamalkʼinal tey-a; pero teme ma la smulanik te skʼop Diose, akʼa sujtuk ta atojolik te lamalkʼinale. 14 Te kʼalal ya xkʼoex ta jun na o ta jpam mukʼul lum te ma skʼan ya yakʼex ochele sok te ma skʼan ya yaʼiyik stojol te akʼopike, tijtinaik jilel te stanul awokik te kʼalal ya xlokʼex bael tey-a. 15 Jamal ya kalbeyex: ta Skʼajkʼalel ichʼel ta kʼop* kʼaxtoxan ya yil swokol te mukʼul lum ini te bin-utʼil te Sodoma sok Gomorra.

16 »Ilawilik, yame jtikunex bael jich bin-utʼil tuminchijetik ta yolil jtiʼawal jaʼmal tsʼiʼetik. Jich yuʼun ayukme apʼijilik jich bin-utʼil te chane, pero mansoukme awoʼtanik jich bin-utʼil te stsumute.* 17 Tsajtayame* abaik ta stojol te ants winiketik, melel yame yakʼex ta skʼab te juecetik sok yame yakʼbeyex nujkul* ta sinagogaetik yuʼunik. 18 Jich bitʼil jnopojelex kuʼun yame yikʼex bael ta stojol gobernadoretik sok ajwaliletik. Jichme testigo ya xkʼoex kuʼun ta stojolik sok ta stojol te nacionetike. 19 Pero, te kʼalal ya awichʼik akʼel ta kʼabale, mame xa amel awoʼtanik yuʼun te bin ya awalike o te bin-utʼil ya awalike, melel ta yorail-abi yame x-akʼbotex anaʼik te bin ya awalike. 20 Mame atukeluk ya xkʼopojex: te chʼul espíritu* yuʼun te aTatike jaʼme ya xkʼopoj ta atojolik. 21 Jaʼ yuʼun ay jtul te ya yakʼ ta milel te sbankil o te yijtsʼine; te tatile yame yakʼ ta milel te snichʼane; te alnichʼanetik yame skontrainik te smeʼ statik sok yame yakʼik ta milel. 22 Ta swenta te jbiile yame spʼajex spisil te ants winiketike. Pero, te machʼa ya xkujch yuʼun kʼalalto ta slajibal kʼajkʼal yame xkol stukel. 23 Te kʼalal ya yutsʼinex ta jpam mukʼul lum, ananik bael ta yan; melel jamal ya kalbeyex te mato lajem awuʼunik sbeentayel-a te mukʼul lumetik yuʼun Israel kʼalal ya xjul te sNichʼan te Winike.*

24 »Te jnopojel ma jaʼuk toyolxan ay ta stojol te smaestroe; te j-abate ma jaʼuk toyolxan ay ta stojol te yajwale. 25 Te jnopojel jich ya yichʼ ilel te bin-utʼil te smaestroe, te j-abate jich ya yichʼ ilel te bin-utʼil te yajwale. Teme Belcebú* ya yichʼ albeyel te yajwal nae, ¿jaʼuktobalix-a te machʼatik ay ta yutil snae? 26 Jaʼ yuʼun mame xa axiʼik, melel maʼyuk bin nakʼbil te ma xjuʼ ta chiknajtesele sok maʼyuk bin muken ay te ma xjuʼ ta naʼbeyel swentaile. 27 Te bin ya kalbeyex ta ijkʼal kʼinale, alaik ta sakal kʼinal; te bin muken ya awichʼik albeyele, alaik tal ta ba naetik. 28 Mame xa axiʼik te machʼatik ya xjuʼ ya smilexe, melel maʼyuk bin ya xjuʼ ya spasik yuʼun ya awichʼik yan buelta te akuxlejalike. Jaʼme xa axiʼik te machʼa ya xjuʼ ya slajinbeyex akuxlejalik ta Gehena.* 29 ¿Mabal jichuk te ya yichʼ chonel chaʼkojt chʼin jaʼmal mutetik ta jsejp takʼin te maʼyuk lek skʼoplale?* Manchukme jich-abi, te aTatik te ay ta chʼulchane snaʼoj teme ay laj jkojtuk te chʼin mutetik ini. 30 ¡Jaʼuktobalix-a te jaʼex te bitʼil ajtaybil yuʼun te jayeb ta lijkʼ te stsotsel ajolike! 31 Jich yuʼun mame xiwex, melel jaʼ bayalxan akʼoplalik-a te bin-utʼil bayal ta kojt chʼin mutetike.

32 »Te machʼa ya yalbey te ants winiketik te ya snaʼbon jbae, jaʼnixme jich ya kalbey te jTat te ay ta chʼulchan te ya jnaʼbey sba-euke. 33 Pero, te machʼa ya spʼajon ta stojol te ants winiketike, jaʼnixme jich ya jpʼaj ta stojol te jTat te ay ta chʼulchane. 34 Mame xa akuyik te tal kakʼ lamalkʼinal ta balumilale, maʼuk; maba tal kakʼ lamalkʼinal, tal kakʼ skontrain sbaik* te ants winiketike. 35 Te kerem ya skontrain te state, te achʼix ya skontrain te snane,* te alibal ya skontrain te yalib meʼele. 36 Te skontra te ants winiketike jaʼnix te machʼatik ay ta yutil snae. 37 Te machʼa jaʼ kʼux-xan ya yaʼiy ta yoʼtan te stat o te snan* te bin-utʼil te joʼone ma snujpʼuk te ya x-och ta jnopojel kuʼune. Te machʼa jaʼ kʼux-xan ya yaʼiy ta yoʼtan te yal snichʼnab te bin-utʼil te joʼone ma snujpʼuk te ya x-och ta jnopojel kuʼune. 38 Te machʼa ma skuch te steʼ yuʼun wokolil* sok te ma skʼan ya stʼunone ma snujpʼuk te ya x-och ta jnopojel kuʼune. 39 Te machʼa ma skʼan ya yakʼ sba ta lajele yananix xlaj-a, yan te machʼa ya yakʼ sba ta lajel ta jwentae ya sta skuxlejal yan buelta.

40 »Te machʼa ya yikʼex ta stojole jaʼnix jich ya yikʼon ta stojol-euk, te machʼa ya yikʼon ta stojole jaʼnix jich ya yikʼ ta stojol-euk te machʼa la stikunon tale. 41 Te machʼa ya yikʼ ta stojol jtul j-alwanej yame yichʼ smajtan jich bin-utʼil jtul j-alwanej ta skaj te j-alwanej te la yikʼ ta stojole. Te machʼa ya yikʼ ta stojol jtul j-abat yuʼun Dios yame yichʼ smajtan jich bin-utʼil jtul j-abat yuʼun Dios ta skaj te j-abat yuʼun Dios te la yikʼ ta stojole. 42 Jamal ya kalbeyex: yananix yichʼ majtantesel-a te machʼa ya yakʼbey junuk vaso sikil jaʼ te machʼatik pekʼel skʼoplalik ini, te jaʼik jnopojeletik kuʼune».