Apocalipsis

22 Tey-abi, te chʼul-abat la yakʼbon kil te mukʼul jaʼ yuʼun kuxlejalil, jich yilel te bin-utʼil cristal te ya sol kʼaxel jsitik-a te yak ta lokʼel ta stojol te smukʼul naktajib te Dios sok ta stojol te Jkolel* Tuminchij, 2 yak ta okinel ta yolil te mukʼul calle yuʼun te mukʼul lume. Ta jujunjejch stiʼil te mukʼul jaʼ ay teʼetik yuʼun kuxlejalil te 12 buelta ya sitin ta jun jaʼbil, ta jujun u ya yakʼ sit. Te yabinal te teʼetike jaʼ spoxil spisil te nacionetike.

3 Maʼyukix bin chopol* skʼoplal, melel te smukʼul naktajib te Dios sok te Jkolel* Tuminchij yame x-ayinik ta mukʼul lum. Te j-abatetik yuʼun Dios yame spasik chʼul aʼtelil ta stojol, 4 yame yilbeyik te sit yelaw sok tsʼibaybil ta stiʼbaik te sbiile. 5 Jaʼnix jich, maʼyukix ajkʼabal sok maba ya xtuunix yuʼunik te sakal kʼinal ya yakʼ te tsumbil kʼajkʼ ni jaʼuk te sakal kʼinal ya yakʼ te kʼajkʼale, melel te Jehová* Dios ya yakʼ sakal kʼinal ta stojolik, sok yame xwentainwanik ta sbajtelkʼinal.

6 Jich la yalbon te chʼul-abat: «Te kʼopetik ini ya xjuʼ ya schʼuun koʼtantik sok jaʼ smelelil. Jich, jaʼ te Jehová,* te Dios te la yakʼbey snaʼ te j-alwanejetik te bin ya yalike, la stikun te chʼul-abat yuʼun swenta ya yakʼbey yil te j-abatetik yuʼun te bintik nopol* ya xkʼot ta pasele. 7 ¡Ilawil!, nopol* ya xtalonix. Tseʼelnaxme yoʼtan te machʼa ya schʼuun spasel te bin ya yal te albilkʼop te ay ta balbil jun ini».

8 Joʼon Juanon, te la kaʼiy stojol sok te la kil spisil ini. Te kʼalal kilojix-a sok kaʼiyojix stojol-a, la jkejan jba ta yok te chʼul-abat te la yakʼbon kil spisil ini yuʼun kʼan kichʼ ta mukʼ. 9 Pero, jich la yalbon: «¡Tsajtayame* aba! ¡Ma xa apas jich ini! Jaʼnax j-abaton jich te bin-utʼil jaʼat sok te awermanotak, jaʼ te j-alwanejetik, sok te machʼatik ya schʼuunik spasel te bin ya yal te balbil jun ini. Jaʼ xa awichʼ ta mukʼ te Diose».

10 Sok jich la yalbonxan: «Mame xa amuk ta awoʼtan te bin ya yal te albilkʼop te ay ta balbil jun ini, melel nopolix* te tiempo te albil skʼoplale. 11 Te machʼa ma tojuk yoʼtan, akʼa spasxan te bin ma tojuk ta pasele, te machʼa ay yabakul* jich akʼa ayinuk yabakul. Pero, te machʼa toj yoʼtan akʼa spasxan te bin toj ta pasele sok te machʼa chʼultesbil, chʼultesbil akʼa jiluk.

12 »‹¡Aʼiya awaʼiy stojol! Nopol* ya xtalonix, sok kichʼoj tal te majtanil ya kakʼe, yuʼun ya kakʼbey stojol ta jujuntul jaʼ chikan te bin yilel te yaʼtelike. 13 Joʼon te Alfa sok te Omega,* te sbabial sok te slajibal, te sjajchibal sok te slajibal. 14 Tseʼelnaxme yoʼtanik te machʼatik ya sakʼik te snajtil kʼuʼik yuʼun jich ya xjuʼ ya sloʼbeyik sit te teʼetik yuʼun kuxlejalil sok jich ya xjuʼ ya x-ochik ta tiʼnailetik yuʼun te mukʼul lume. 15 Yan stukel te tsʼiʼetik,* te machʼatik ya spasik te espiritismo,* te machʼatik ya spasik mulwej,* te jmilawaletik, te machʼatik ya yichʼik ta mukʼ lokʼombaetik sok spisil te machʼatik ya smulanik sok kʼayemik ta spasel lot, ayik ta fuera›.

16 »‹Joʼon Jesuson, la jtikun te chʼul-abat kuʼun yuʼun ya yalbeyex awaʼiyik ini ta swenta slekilal te congregacionetike. Joʼon slojpʼon o yisimon* te David sok stsʼumbalon, sok joʼon te ekʼ te xlemetnax te ya xlokʼ tal ta sabe›».

17 Te chʼul espíritu* sok te achʼix te ya xnujpune ma xkomik ta yalel jich ini «¡Laʼ!». Sok spisil te machʼa ya yaʼiy stojol ini jich akʼa yal «¡Laʼ!». Sok spisil te machʼa takin yoʼtan akʼa taluk. Spisil te machʼa jich ya skʼan yoʼtane smajtan akʼa yuchʼ te jaʼ yuʼun kuxlejalil.

18 «Spisil te machʼatik ya yaʼiyik stojol te bin ya yal te albilkʼop te ay ta balbil jun ini jich ya kaltiklanbey: teme ay machʼa ya yakʼbey jpʼal kʼop te bintik tsʼibaybil liʼi, te Dios yame stikunbey ta stojol te wokoliletik te tsʼibaybil ta balbil jun ini; 19 teme ay machʼa ya slokʼesbey jpʼaluk te bin ya yal ta albilkʼop te tsʼibaybil ta jun ini, te Dios yame spojbey te bin ay ta stojol yichʼel ta swenta te teʼetik yuʼun kuxlejalil sok maba ya x-akʼot ochel ta chʼul mukʼul lum, jaʼ te bintik tsʼibaybil ta balbil jun ini.

20 »Te machʼa ya yalbey skʼoplal spisil ini jich ya yal: ‹Jich, nopol* ya xtalonix›».

«¡Jichuk! Laʼ, Kajwal Jesús».

21 Ayukme ta stojolik te machʼatik chʼultesbilik te slekil yoʼtan te Kajwaltik Jesús te ma snujpʼuk ya kichʼtike.