Apocalipsis

16 Tey-abi la kaʼiy lokʼ tal tulan kʼop ta chʼul awilal te jich yak ta yalbeyel te juktul chʼul-abatetik: «Baanik sok malaik ta balumilal te jukeb tazaetik te nojelik ta yilinba te Diose».

2 Jich bajt te sbabial chʼul-abate sok la smal ta balumilal te bin yichʼoj te taza yuʼune. Chiknaj kʼaʼel chamel te kʼax kʼux sok te kʼax chopol* te la yakʼbey swokol te machʼatik yichʼojbeyik smarca te chambalam te xiʼbantik sba sok te la yichʼbeyik ta mukʼ te slokʼombae.

3 Te schebal chʼul-abat la smal ta mar te bin yichʼoj te taza yuʼune. Kʼatpʼuj ta chʼichʼ te mar jich te bin-utʼil te schʼichʼel te machʼa lajeme, jich lajik spisil te bintik kuxajtik tey-ae.

4 Te yoxebal chʼul-abat la smal ta mukʼul jaʼetik sok ta slokʼib jaʼetik te bin yichʼoj te taza yuʼune, jich kʼatpʼujik ta chʼichʼ. 5 Tey-abi, jich la kaʼiy te la yal te chʼul-abat te jaʼ swentainoj te jaʼetike: «Jaʼat —te machʼa ay ta ora ini, te machʼa ay ta namey, te Machʼa jun yoʼtane— toj awoʼtan, melel la awalix te bin-utʼil ya xchajpanwanate. 6 Ta skaj te la smalbeyik schʼichʼel te machʼatik chʼultesbilik sok te j-alwanejetike, la awakʼtiklanbey yuchʼ chʼichʼ. Snujpʼ te jich ya xkʼot ta stojolike». 7 Jich la kaʼiy te la yal te skajtajib chikʼbil majtanil: «Yuʼun-nix jich-a, Jehová* Dios, jaʼat te Machʼa spisil ya xjuʼ awuʼune, smelelil sok stojil te bin-utʼil ya xchajpanwanate».

8 Te schanebal chʼul-abat la smal ta kʼajkʼal te bin yichʼoj te taza yuʼune. Te kʼajkʼale akʼbot schikʼ ta kʼajkʼ te ants winiketike. 9 Jich chikʼotik yuʼun te tulan kʼajkʼe. Pero la sbolkʼoptaybeyik sbiil te Diose —jaʼ te machʼa swentainoj te wokoliletik ini—, maba la sujtes yoʼtanik sok maba la yalbeyik yutsil skʼoplal.

10 Te yoʼebal chʼul-abat la smal te bin yichʼoj te taza yuʼun ta stojol te smukʼul naktajib te chambalam te xiʼbantik sba. Ijkʼub te wentainel yuʼune. Te ants winiketik jajch stiʼ yakʼik yuʼun te skʼuxul te swokolike, 11 pero la sbolkʼoptayik te Dios te ay ta chʼulchan ta skaj te skʼuxul te swokolik sok te kʼaʼel chamel tsakotike, maba la sujtes yoʼtanik yuʼun te bintik yakik ta spasele.

12 Te swakebal chʼul-abat la smal ta mukʼul jaʼ Éufrates te bin yichʼoj te taza yuʼune. Jich takij te yaʼlel yuʼun ya schajpanbey sbe te ajwaliletik te yakik ta talel te banti ya xlokʼ tal te kʼajkʼale.

13 La kil oxeb aʼiyejetik te bolobenik skʼoplal te jichik yilel te bin-utʼil chʼuchʼetik te lokʼik tal ta ye te dragón, ta ye te chambalam te xiʼbantik sba sok ta ye te lotil j-alwaneje. 14 Ta melel, jaʼ aʼiyejetik te talem ta stojol te pukujetik sok ya spasik señailetik; ya xbajtik ta stojol te ajwaliletik te ayik ta swolol balumilal yuʼun ya yichʼik tsobel ta guerra ta smukʼul kʼajkʼalel te Diose, te Machʼa spisil ya xjuʼ yuʼune.

15 «¡Aʼiya awaʼiy stojol! Jichme ya xtalon te bin-utʼil j-elekʼ. Tseʼelme yoʼtan te machʼa wikʼil sit sok te slapoj te skʼuʼe, yuʼun jich ma tʼanal ya xbeen sok ma sta kʼexlal ta stojol te ants winiketike».

16 La yichʼik tsobel te ajwaliletik ta jun lugar te Armagedón* sbiil ta hebreo.

17 Te sjukebal chʼul-abat la smal ta ikʼ te bin yichʼoj te taza yuʼune. Te kʼalal jich kʼot ta pasele, lokʼ tal tulan kʼop ta chʼul awilal, kʼalalto ta mukʼul naktajibal, sok jich la yal: «¡Juʼix ta pasel!». 18 Chiknaj tsantsewal, chawuk sok ay machʼatik la kaʼiy te tulan kʼopojik soknix tal tulan nijkel te maʼyuk jich kʼaxem jaʼto kʼalal te chiknaj te ants winiketik ta balumilale. Kʼax mukʼ sok kʼax tulan te nijkel kʼaxe. 19 Ox-xejtʼ lokʼ-a te mukʼul lum sok jinik koel te mukʼul lumetik yuʼun te nacionetike; te Dios jul ta yoʼtan te Mukʼul Babilonia yuʼun ya yakʼbey yuchʼ te tulan yilinba te ay ta scopail vino yuʼune. 20 Jaʼnix jich lokʼik bael ta anel spisil te sejp kʼinal te ayik ta yolil mar sok ma chikanuk banti bajt te witsetike. 21 Jaʼnix jich chʼay koel tal mukʼul batetik ta chʼulchan ta stojol te ants winiketik —te jujun bat ayniwan jun talento* yalal—. Te ants winiketik la sbolkʼoptayik te Dios ta skaj te wokolil la staik yuʼun te bate, melel kʼax tulan te wokolil la yakʼe.