Sbabial carta yu’un Pedro

5 Jich bitʼil te ancianoon-euke, sok te la kil te kʼax swokol te Cristo sok te ya kichʼ-euk te utsilal te ya xchiknaj tale, jichme ya jkʼanbey wokol te ancianoetik te ay ta awolilike: 2 kanantayaikme te tuminchijetik yuʼun te Dios te ay ta awentaik skanantayel jich te bitʼil ayex ta abatinel ta ancianoil;* mame sujbiluk xa awaʼiy abaik te kʼalal ya apasike, spisilukme awoʼtanik ya apasik ta stojol te Diose; mame jaʼuk xa apasik ta swenta sbikʼtal awoʼtanik yuʼun stael takʼin te ma stojiluke, jaʼ lek te junuk awoʼtanik ya apasik, 3 mame xa akuy abaik te jaʼ yajwalex te machʼatik yuʼun te Diose, jaʼukme ejemplo ya xkʼoex yuʼun te tuminchijetike. 4 Jich yuʼun, te kʼalal chiknajemix-a te mukʼul jkanantuminchij, yame awichʼik te corona te ay yutsilal te maba ya xlaje.

5 Jaʼnix jichex-euk, jaʼex keremetik, akʼa abaik ta wentainel yuʼun te winiketik te ayix yaʼbilalike. Jich yuʼun lapaik ta apisilik te pekʼel oʼtanil te kʼalal talel kʼaxel ya akʼopon abaike. Melel te Dios ya skontrain te machʼatik mukʼ skʼoplal ya skuy sbaik, yan stukel te machʼatik pekʼel yoʼtanik ya yakʼbey yil te slekil yoʼtan te ma snujpʼuk ya kichʼtike.

6 Pejkʼana abaik ta stojol skʼab Dios te bayal yuʼele, yuʼun jich ya smukʼubtesbeyex akʼoplalik te kʼalal ya sta yorail yuʼune, 7 akʼbeyaik ta stojol spisil te bintik ya amel awoʼtanik yuʼun, melel ayex ta yoʼtan stukel. 8 ¡Ayukme apʼijilik sok wikʼilukme asitik! Melel te akontraik, jaʼ te Pukuje,* yak ta beel ta ajoyobalik jich te bin-utʼil león-choj te yak ta aw sok te yak ta sleel te machʼa ya slajine. 9 Pero, jaʼ xa akontrainik te Pukuje,* tulanukme te schʼuunel awoʼtanik, melel anaʼojik te pajal yak ta kʼaxel awokolik sok te awermanotakik te ayik ta swolol balumilal te pajal schʼuunel awoʼtanik soke. 10 Te kʼalal kʼaxix awuʼunik-a te awokolik junchebuk kʼajkʼal, te Dios te bayal slekil yoʼtan te ma snujpʼuk ya kichʼtik te la yikʼex ta yutsilal ta sbajtelkʼinal ta skaj te jun ayex sok te Cristo, jaʼnixme ya slajin te pʼijubtesel ya yakʼbeyexe. Jaʼme ya yakʼ te jun awoʼtanik, jaʼme ya yakʼbeyex te awipik sok jaʼme ya skoltayex yuʼun tulanuk awoʼtanik ya xkʼoex. 11 Ayukme yuʼel sbajtelkʼinal. Jichuk.

12 Ta swenta te Silvano* te ya kil te jaʼ jtul hermano te jun yoʼtan, la jtsʼibaybeyex chaʼoxpʼal kʼop yuʼun ya kakʼbeyex smukʼul awoʼtanik sok yuʼun ya kakʼbeyex anaʼik ta jamal te smelelil slekil yoʼtan Dios te ma snujpʼuk ya kichʼtike. Junukme awoʼtanik ta swenta ini. 13 Ya stikunbeyex spatjibal awoʼtanik te kermanatik ants* te ay ta Babilonia —te tsabil, jich te bin-utʼil te jaʼexe—, jaʼnix jich ya stikunbeyex spatjibal awoʼtanik te Marcos, te jnichʼane. 14 Te kʼalal ya apatbey aba awoʼtanik, talel kʼaxel ujtsʼuya* abaik ta swenta kʼuxul oʼtanil.

Ayukme ta atojolik te lamalkʼinal, jaʼex te jun ayex sok te Cristoe.