Génesis

3 Ta spisil te jtiʼawal chambalametik la spas te Jehová Diose, jaʼ kʼax pʼijxan te chane. Te chan jich la sjojkʼoybey te antse: «¿Yuʼun-nixbal jich la yalbeyex-a te Dios te ma xjuʼ ya aloʼbeyik sit spisil te teʼetik te ay ta tsʼunbil kʼinal?». 2 Jich la yal te ants: «Ya xjuʼ ya jloʼbeytik sit te teʼetik ay ta tsʼunbil kʼinale. 3 Pero, te Dios jich la yal ta swenta te teʼ te ay ta yolil te tsʼunbil kʼinal: ‹Mame xa aloʼbeyik sit, maʼuk, mame xa apikik. Teme ya aloʼike, yananixme xlajex-a›». 4 Ta swenta-abi, te chan jich la yalbey te antse: «Maba ya xlajex yuʼun. 5 Melel te Dios snaʼoj te bin-ora ya aloʼbeyik sit te teʼe, ya xjam asitik sok jich ya xkʼoex te bin-utʼil Dios: yame anaʼik te bin lek sok te bin ma leke».

6 Te ants la yil te lek ta loʼel te sit te teʼe sok te tʼujbil ta ilele. Yuʼun-nix jich-a, mero tʼujbil ta ilel te teʼe. Jich te ants la skʼok te sit te teʼe sok la sloʼ. Ta patil, te kʼalal sjokinojix-a te smamalale, la yakʼbey te sit teʼ, jich la sloʼ. 7 Jich jam te sitike, la yilik te tʼanalike. Jaʼ yuʼun la stsʼisik yabinal higuera yuʼun la smak sbaik-a.*

8 Ta patil, te kʼalal sikubenix-a te mal kʼajkʼale, te winik sok te yinam la yaʼiybeyik skʼop te Jehová Dios kʼalal yak ta kʼaxel ta tsʼunbil kʼinal. Jich yuʼun la snakʼ sbaik ta sit te Jehová Dios ta yolil te teʼetik te ay ta tsʼunbil kʼinal. 9 Te Jehová Dios bayal buelta la skʼopon te winike, jich la yalbey: «¿Banti ayat?». 10 Jaʼto te jich la yal te winik: «La kaʼiy te akʼop ta tsʼunbil kʼinal, pero ta skaj te tʼanalone, xiwon. Jaʼ yuʼun la jnakʼ jba». 11 Jaʼ yuʼun, jich la sjojkʼoy te Dios: «¿Machʼa la yalbat te tʼanalate? ¿Mabal yuʼunuk la aloʼ te sit te teʼ te la kalbat te ma skʼan ya aloʼe?». 12 Te winik la yal: «Te ants te la awakʼbone jaʼ la yakʼbon te sit te teʼe, jaʼ yuʼun la jloʼ». 13 Te Jehová Dios jich la yalbey te antse: «¿Bin-a te la apase?». Te ants jich la yal: «Jaʼ la sloʼlayon te chane, jaʼ yuʼun la jloʼ».

14 Jich yuʼun, te Jehová Dios jich la yalbey te chane: «Ta swenta te bin la apase, yame xbolob akʼoplal ta yolil spisil te alakʼil chambalametik* sok ta yolil spisil te jtiʼawal chambalametik, yame atas aba sok jaʼme aweʼel ya xkʼot te tsʼubil lum te jayeb kʼajkʼal kuxulate. 15 Jaʼnix jich yame kakʼ te ya akontrain aba sok te antse; ya skontrain sba te atsʼumbal sok te stsʼumbale; jaʼme ya stsʼoʼbat* ta tekʼel ajol sok jaʼatme ya awejchentesbey te yit yok».

16 Jich la yalbey te ants: «Yame jtoyesbat bayal awokol te kʼalal awikʼoj te awal ta achʼujte sok yame ata bayal awokol te kʼalal ya x-ayin* te awale. Jaʼme ya skʼan awoʼtan te ya x-ayinat sok te amamalale, sok jaʼme ya swentainat».

17 Jich la yalbey te Adán:* «Te bitʼil la achʼuunbey skʼop te awinam sok te la aloʼbey sit te teʼ te la kalbat ‹Mame xa aloʼbey sit›, te xchione, jaʼ amul te boloben skʼoplal ya xkʼot te lumkʼinal. Te jayeb kʼajkʼal kuxulate yame awil bayal awokol ta stael aweʼel ta lumkʼinal. 18 Yame xchʼi tal chʼixetik sok chopol jaʼmaletik ta lumkʼinal. Te jaʼate jaʼme ya aweʼ te bintik ya yakʼ te lumkʼinale. 19 Ta swenta achikʼ yame ata te aweʼel jaʼto te kʼalal ya sujtat ta tsʼubil lum. Melel tey talemat-a. Pasbilat ta tsʼubil lum sok teynix ya sujtat-a».

20 Ta patil, te Adán la yakʼbey sbiilin Eva* te yiname, melel jaʼ snan* ya xkʼot spisil te ants winiketike.* 21 Te Jehová Dios la spasbey snajtil skʼuʼ te Adán sok te yiname. La spasbey ta snujkulel chambalam. 22 Ta patil, jich la yal te Jehová Dios: «Te winik jaʼ jich kʼotix te bitʼil te joʼotik te ya snaʼ te bin lek sok te bin ma leke, jich yuʼun swenta maba ya stsak sloʼ te sit te teʼ yuʼun kuxlejalil sok te ya xkuxin ta sbajtelkʼinal...». 23 Jich yuʼun, te Jehová Dios la sten lokʼel te Adán ta tsʼunbil kʼinal Edén yuʼun ya xtsʼunbaj ta lumkʼinal te jaʼnix la yichʼ tuuntesel yuʼun la yichʼ pasel-ae. 24 Jich la sten lokʼel te winik, la yakʼ querubinetik te banti ya xlokʼ tal kʼajkʼal ta tsʼunbil kʼinal Edén sok la yakʼ jun espada te spisil-ora sututet sok te yak ta tilel skʼajkʼalel. Jich la yichʼ makel te sbelal te banti ay te teʼ yuʼun kuxlejalil.