Carta ta stojol te Filipenseetik

4 Jich yuʼun, kermanotak te kʼuxex ta koʼtan sok te koʼtanuk ya kilexe, jaʼex te ya awakʼbonik stseʼelil koʼtan sok te jcorona kʼoemexe, junukme awoʼtanik ta stojol te Kajwaltik jich te bin-utʼil kalojbeyexe, jaʼex te kʼuxex ta koʼtane.

2 Ya jkʼanbey wokol te Evodia sok te Síntique te junuknax te snopojibal yuʼunik jich te bitʼil jun-nax ayik sok te Kajwaltike. 3 Jaʼat, te lekil jkoltaywanejat, jaʼnix jich ya jkʼanbat wokol te yakuk akoltaylan te antsetik ini, jaʼik te la spasik tulan te la sjokinonik ta aʼtel ta swenta te lek yachʼil kʼop sok te Clemente soknix te yantikxan joʼtak ta aʼtel te tsʼibaybil sbiilik ta libro yuʼun te kuxlejalile.

4 Tseʼelukme awoʼtanik ta spisil-ora ta swenta te Kajwaltike. Ya jchaʼkalbeyex-xan: ¡tseʼelukme awoʼtanik! 5 Akʼame chiknajuk ta stojol spisil ants winiketik te ma jaʼuk ya awakʼik ta chʼuunel te bin ya awalike. Nopol* ay ta jtojoltik te Kajwaltike. 6 Mame ayuk bin ya amel awoʼtanik yuʼun. Chikan bin wokolil yak ta kʼaxel ta atojolik, jaʼ lek albeyaik Dios te bin ya skʼan awoʼtanik ta swenta oración, ta swenta skʼanel wokol sok ta yalel wokol, 7 jich te lamalkʼinal te ya yakʼ te Dios te kʼax mukʼ, te maʼyuk jtuluk ants winik te ya xjuʼ ya xkʼot ta yoʼtan, jaʼme ya skanantaybeyex te awoʼtanik sok te snopojibal awuʼunik ta swenta te Cristo Jesús.

8 Ta slajibal, kermanotak, jaʼme xa anopilan ta awoʼtanik spisil-ora spisil te bintik smelelil, spisil te bintik mukʼ skʼoplal, spisil te bintik stojil ta pasel, spisil te bintik ma kapaluk ta mulil, spisil te bin ya stij oʼtanil ta yakʼel ta ilel kʼuxul oʼtanil, spisil te bintik lek skʼoplal, spisil te lekil taleliletik sok spisil te bintik ya yichʼ albeyel yutsil skʼoplal. 9 Pasaik te bin la kakʼbeyex anopik sok te la achʼuunike, jich te bin-utʼil la awaʼiyik stojol sok te la awilik te bin-utʼil la jpase, jichme ya sjokinex te Dios te ya yakʼ lamalkʼinal.

10 Bayal stseʼelil koʼtan ta stojol te Kajwaltik ta swenta te ya amel awoʼtanik yan buelta ta jtojole. Manchukme ameloj awoʼtanik ta jtojol-a, maba juʼem awuʼunik yakʼel ta ilel-a. 11 Ma jaʼuk ya kalbeyex yuʼun ini ta skaj te ay bin ya xtuun kuʼune, melel jnopojix te bin-utʼil tseʼel koʼtan ya kaʼiy jba chikan te bin ya xkʼax ta jtojole. 12 Jnaʼoj te bin-utʼil ya xkuxinon manchukme jtebnax o bayal te bin ay kuʼune. Ta spisil sok chikan biluk-a te ya xkʼax ta jtojole jnaʼojix te bin-utʼil ya xkuxinon teme nojel jchʼujt o teme ay jwiʼnale, chikan teme bayal bin ay kuʼun o teme maʼyuk bin ay kuʼune. 13 Spisil ya xjuʼ kuʼun spasel ta swenta te machʼa ya yakʼbon yip koʼtane.

14 Pero, kʼax lek te la akoltayonik te kʼalal ayon ta tulan wokol-ae. 15 Ta melel, jaʼex filipenseetik, anaʼojik te kʼalal la awaʼiyik stojol ta sbabial buelta te lek yachʼil kʼope sok te kʼalal lokʼon bael ta Macedonia, maʼyuk junuk congregación te la skoltayon sok te la skʼanik te koltayel kuʼune, jaʼnax te jaʼexe; 16 melel te kʼalal ayon ta Tesalónica-ae, te jaʼexe ay bin la atikunbonik tal ta swenta te bin tuun kuʼune, ma junuknax buelta jich la apasik, cheb buelta jich la apasik. 17 Ma yuʼunuk yakon ta skʼanel jmajtan, jaʼ ya jkʼan te ya xpʼol te akʼulejalik te banti ya yichʼ kʼejele. 18 Pero ay kuʼun spisil te bin ya xtuun kuʼune, kʼax bayalxan-a. Maʼyuk bin ya spasbon falta, melel te Epafrodito la yakʼbon te bintik la atikunbonik tal te jich kʼoem te bin-utʼil milbil majtanil te sumet* yikʼ te lek yoʼtan yuʼun te Diose. 19 Pero, te Dios kuʼun te jelawen yutsil te skʼulejale jaʼme ya yakʼbeyex te bintik ya xtuun awuʼunik ta swenta te Cristo Jesús. 20 Akʼame yichʼ albeyel yutsil skʼoplal ta sbajtelkʼinal te jTatik Diose. Jichuk.

21 Akʼbonik spatjibal yoʼtan spisil te machʼatik chʼultesbilik te jun yoʼtan ayik sok te Cristo Jesús. Ya stikunbeyex spatjibal awoʼtanik te hermanoetik te sjokinojonike. 22 Jaʼnix jich ya stikunbeyex spatjibal awoʼtanik spisil te machʼatik chʼultesbilik, kʼaxemtoxan te machʼatik ayik ta sna te César.

23 Ayukme ta atojolik te slekil yoʼtan te Kajwaltik Jesucristo te ma snujpʼuk ya kichʼtik ta swenta te awakʼojik ta ilel te jun-nax ayexe.