Carta ta stojol te Hebreoetik

6 Jich te bitʼil jilix kuʼuntik te bintik kʼun ta nopel ta swenta te Cristo, bejbeukotikme* ta mukʼubel, mame sujtotik ta yakʼbeyel yiptajib te bin jnopojtikix-ae, jaʼ te sujtesel oʼtanil ta swenta te aʼteliletik te maʼyuk swentaile, te chʼuunel oʼtanil ta stojol Dios, 2 te nojptesel ta swenta ichʼjaʼ,* te skajanel kʼabal ta stojol yantik, te chaʼkuxajel yuʼun te machʼatik lajemik sok te ichʼel ta kʼop te maʼyuk bin-ora ya xlaj skʼoplale. 3 Jaʼme jich ya jpastik ini teme jich ya skʼan te Diose.

4 Melel te machʼatik la yilik jun buelta te sakal kʼinale la yaʼiybeyik sbujtsʼ te majtanil te talem ta chʼulchan, la yichʼik akʼbeyel te chʼul espiritue* 5 sok la smulanbeyik yutsil te skʼop Dios te kʼax leke sok te bendicionetik* te ya yichʼ tal te achʼ balumilal te yato xtale, 6 pero la yijkitayik te schʼuunel yoʼtanike, jaʼik ini ma xjuʼix ta chaʼkuxajtesel swenta ya sujtes yoʼtanik yan buelta, melel jaʼiknix te ya sjijpanik ta teʼ yan buelta te sNichʼan te Diose sok ya yakʼik ta kʼexlal ta komonsitil. 7 Melel te lumkʼinal ya yichʼ te bendición yuʼun Dios te kʼalal ya yuchʼ te jaʼal te jujun buelta te ya xtale, jich ya yakʼ chʼiuk te awal tsʼunubil te ya xtuun yuʼun te machʼa ya stsʼune. 8 Pero, teme ya yakʼ xchʼi chʼixetik sok jaʼmal chʼixetik, ma xtuun sok ya yichʼ albeyel chopol* skʼoplal, ta patil ya yichʼ chikʼel.

9 Pero, kermanotak te kʼuxex ta koʼtan, manchukme jich ya kalbeytik skʼoplal-abi, schʼuunoj koʼtantik te ay bintikxan lek ya apasik te jaʼexe, jaʼ te bintik ya yakʼ jkoleltike. 10 Melel toj yoʼtan stukel te Diose sok ma xchʼay ta yoʼtan te awaʼtelik sok te skʼuxul awoʼtanik la awakʼik ta ilel ta swenta te sbiil te kʼalal abatinex ta stojol te machʼatik chʼultesbilik sok te maba akomoj abaik ta spasele. 11 Pero koʼtantikuk te ya awoʼtantayik spasel ta jujuntul te aʼtelil ini kʼalalto ta slajibal, yuʼun jich ay smukʼul awoʼtanik te ya awichʼik te bin yakex ta smaliyele, 12 swenta maba ya xchʼajubex, jaʼ xa anopbeyik stalel te machʼatik ta swenta schʼuunel yoʼtanik sok slamalil yoʼtanik ya yichʼik te bintik jamal yaloj te Diose.

13 Kʼalal te Dios ay bin jamal la yalbey te Abrahán, jaʼnix jamal la yalbey sba stukel te ya skʼotes ta pasele, melel maʼyuk machʼa toyolxan yuʼun. 14 Jich la yalbey: «Ta melel ya kakʼbat bendición sok ya kakʼ te ya xpʼol te atsʼumbale». 15 Te kʼalal yakʼojix ta ilel-a te Abrahán te la snaʼ smaliyel, la yichʼ te bin jamal albot yuʼun te Diose. 16 Melel te ants winiketik jaʼ ya yakʼik ta testigo te machʼa toyolxan yuʼunik te kʼalal ya yalik ta jamal te ay bin ya skʼotesik ta pasel, jich maʼyuk bin ya yichʼix alel yuʼun-a, melel ya yakʼ ta naʼel te ya xkʼot ta pasel te bin la yichʼ alele. 17 Jaʼnix jich la spas-euk te Diose, te kʼalal ay bin mukʼxan la yakʼbey yil te machʼatik ya yichʼik te bin jamal yaloj te maba ya xjelon te bin ya skʼan te yoʼtane, jich la yakʼ ta ilel te smelelil te skʼope. 18 Jich la spas yuʼun ma xjelon te bin chaʼchajp skʼoplal ini te ma xjuʼ ya spas lot te Dios ta swenta-abi, yuʼun jich te machʼatik jleojtik te anibale ayuk bayal smukʼul koʼtantik yuʼun jich maba ya kijkitaytik te bin yakotik ta smaliyele. 19 Smelelil sok yichʼoj yip te bin yakotik ta smaliyel ini te jich kʼoem te bin-utʼil jun ancla* yuʼun te jkuxlejaltike sok te ya x-och kʼalalto ta lugar te ay ta spat te cortinae, 20 jaʼ te banti ochemix te Jesús te la sjambotikix te sbelale, te la yichʼix yaʼtel ta mukʼul sacerdote ta sbajtelkʼinal jich bin-utʼil te Melquisedec.