Carta ta stojol te Hebreoetik

11 Te chʼuunel oʼtanil jaʼ te ya jnaʼtik te yananix xkʼot ta pasel-a te bin yakotik ta smaliyele, jaʼ ya yakʼ jnaʼtik te yuʼun-nix smelelil-a te bin ma chikanuk ta ilele. 2 Ta swenta schʼuunel yoʼtanik, lek la yichʼik ilel yuʼun Dios te antiguo jmeʼ jtatike.

3 Ta swenta schʼuunel koʼtantik, ya jtatik ta ilel te la yichʼtiklan chajpanel yuʼun Dios te bintik ay ta chʼulchan sok ta balumilal, jaʼ yuʼun spisil te bin chikan ta ilele chiknaj ta swenta te bin ma chikanuk ta ilele.

4 Ta swenta schʼuunel yoʼtan te Abel, la yakʼ milbil majtanil ta stojol Dios te kʼaxemtoxan jich yutsil-a te bin-utʼil la yakʼ te Caín. Ta swenta te schʼuunel yoʼtan-abi toj la yichʼ ilel yuʼun te Diose, melel lek ilbot yuʼun te majtaniletik la yakʼe. Manchukme laj te Abel, yato xkʼopoj ta swenta te schʼuunel yoʼtane.

5 Ta swenta schʼuunel yoʼtan te Enoc, la yichʼ ikʼel bael ta yan lugar yuʼun jich ma xyil-a te lajele sok maʼyuk machʼa taot ta leel yuʼun, melel ikʼot bael ta yan lugar yuʼun te Diose. Te kʼalal mato xyichʼ ikʼel bael-ae, akʼbot snaʼ te lek ilot yuʼun te Diose. 6 Teme maʼyuk schʼuunel koʼtantike, ma xjuʼ te lek ya yilotik te Diose, melel te machʼa ya xnoptsaj* ta stojol te Diose ya skʼan ya schʼuun te yuʼun-nix ay-a te Diose sok te ya yakʼbey smajtan te machʼatik sok spisil yoʼtanik ya xleot yuʼune.

7 Ta swenta schʼuunel yoʼtan te Noé, la yakʼ ta ilel te la xiʼ* te Dios sok la spas jun mukʼul arca yuʼun jich ya sta skolel sok te machʼatik ay yuʼune, jich la spas ini te kʼalal akʼbot snaʼ yuʼun Dios te bintik mato chikanuk ta ilel-ae. Ta swenta te schʼuunel yoʼtan-abi la yalbey ta jamal smul te ants winiketike sok jich ilot yuʼun Dios te toj yoʼtan te Noé ta swenta te schʼuunel yoʼtane.

8 Ta swenta schʼuunel yoʼtan te Abrahán, la schʼuunbey smantal te Dios te kʼalal ikʼot yuʼune, sok bajt ta jun lugar te ya x-akʼbot yichʼ ta patile, manchukme maba snaʼoj-a te banti ya xkʼote. 9 Ta swenta schʼuunel yoʼtan jich nain te bin-utʼil jyanlum ta kʼinal te albot yuʼun Dios te ya xbajt yichʼe. Nain ta nailpakʼ sok te Isaac sok te Jacob, te pajal ya yichʼik te bin albilik ta jamal yuʼun te Diose. 10 Melel jaʼ la smaliy te lum te tulan yiptajib yichʼoje, te jaʼnix la schajpan te Diose sok te jaʼnix la spase.

11 Ta swenta schʼuunel yoʼtan te Sara, la yichʼ akʼbeyel yip yuʼun ya sta yal, manchukme kʼaxemix yaʼbilal-a te ya sta yale, melel la yakʼ smukʼul yoʼtan ta stojol te machʼa ay bin jamal albot yuʼun te ya x-akʼbote. 12 Jaʼ swentail te jtulnax winik te lajemix kʼoeme ayin* bayal snichʼnab, kʼax bayalik jich te bin-utʼil ekʼetik ta chʼulchan, jich te bin-utʼil sjiʼal stiʼil mar te ma xjuʼ ta ajtayele.

13 Ta spisilik tulan schʼuunel yoʼtanik-a te kʼalal lajik baele, manchukme maba la yichʼik te bin jamal albotik yuʼun te Diose. Pero la yilik ta namal* sok stseʼelil yoʼtanik la schʼuunik, la yalik ta jamal te jaʼik jyanlumetik sok te jbeometiknax ta kʼinale. 14 Te machʼatik jich jamal ya yalike ya yakʼik ta ilel te sok spisil yoʼtanik yakik ta sleel jun lugar te banti ya xnainike. 15 Ta spisil-abi, te lajuk snaʼulanik te slumalik te la yijkitayike, la sleik te bin-utʼil ya sujtik bael te jichuke. 16 Pero la spasik tulan ta sleel te bin lekxane, jaʼ ya skʼan ya yal jun lugar te wentainbil yuʼun te chʼulchane. Jaʼ yuʼun, te Dios maba ya xkʼexaw ta stojolik ni jaʼuk ya skʼex te ya x-albotik yuʼun te jaʼ Dios yuʼunike, melel schajpanoj jpam mukʼul lum ta stojolik.

17 Ta swenta schʼuunel yoʼtan te Abrahán, la yichʼ pasel ta prueba te kʼalal kʼan yakʼ ta majtanil te Isaac —jich, jaʼ te winik te spisil yoʼtan la schʼuun te bin albot ta jamal yuʼun te Diose, kʼan yakʼ ta majtanil te jip jtul snichʼane—, 18 manchukme jich albilix yuʼun-a te Diose: «Te atsʼumbal te albil skʼoplale yame xchiknaj tal ta stojol te Isaac». 19 Pero, te Abrahán kʼot ta yoʼtan te ya xjuʼ yuʼun te Dios te ya schaʼkuxajtes tal te Isaac ta yolil te machʼatik lajemike, jich kʼoem te chaʼkuxaj tal ta yolil te machʼatik lajemik te jich la yikʼ ta stojol te snichʼane.

20 Ta swenta schʼuunel yoʼtan te Isaac, la yakʼbey bendición te Jacob sok te Esaú ta swenta te bintik yato xkʼot ta pasele.

21 Ta swenta schʼuunel yoʼtan te Jacob, te kʼalal nopol* ya xlajix-ae, la yakʼbey bendición ta jujuntul te snichʼnab te José sok la yichʼ ta mukʼ te Dios te kʼalal stsakoj-a te snabateʼe.

22 Ta swenta schʼuunel yoʼtan te José, la yalbey skʼoplal te ya xlokʼik bael ta Egipto te israeletike sok te kʼalal nopol* ya xlajix-ae, la yal mantal te bin ya skʼan ya spasik sok te sbakele.*

23 Ta swenta schʼuunel yoʼtan te smeʼ stat te Moisés, la snakʼik oxeb u te Moisés te kʼalal ayine,* melel la yilik te kʼax tʼujbil alal sok maba la xiʼik te mantalil yakʼoj te ajwalile. 24 Ta swenta schʼuunel yoʼtan te Moisés, te kʼalal winikix-ae, maba la skʼan te ya x-albot te jaʼ skerem-al te yantsil nichʼan faraón. 25 Jaʼ la skʼan te pajal ya yichʼ utsʼinel sok te lum yuʼun te Diose, ma jaʼuk te la smulan cheʼoxebuk kʼajkʼal te bin swenta mulile, 26 melel jaʼ mukʼul kʼulejalil la yil te bin-utʼil la yichʼ bolkʼoptayel te Cristo, ma jaʼuk te kʼulejalil yuʼun te Egipto, melel jaʼ la yakʼ sit ta majtanil te ya yichʼe. 27 Ta swenta schʼuunel yoʼtan, la yijkitay jilel te Egipto, maba la xiʼ te yilinba te ajwalile, melel jun yoʼtan la yakʼ sba jich kʼoem te yak ta yilel te machʼa ma chikanuk ta ilele. 28 Ta swenta schʼuunel yoʼtan, la spas te Kʼin yuʼun Pascua sok la stsijtsinbey chʼichʼ te stiʼil te tiʼnaetike, yuʼun jich te machʼa ya xlajinwan maba ya smil te ba-alaletike.

29 Ta swenta schʼuunel yoʼtanik te israeletik, kʼaxik ta yolil te mar Rojo te jich kʼot te bin-utʼil takin lume. Pero, te kʼalal jich la spasik-euk te egipcioetike, bikʼotik yuʼun te mare.

30 Ta swenta schʼuunel yoʼtanik te israeletik, jukeb kʼajkʼal la sbeentayik ta sjoyobal te tsʼajkʼetik yuʼun te Jericó, jich jin koel te tsʼajkʼetike. 31 Ta swenta schʼuunel yoʼtan te Rahab te j-antsinel* ants, maba laj sok te machʼatik la skʼaxuntayik mantal, melel sok slekil yoʼtan la yikʼ ochel ta sna te jtsajtaywanejetike.

32 ¿Binxan ya xjuʼ ya kalbeyex? Melel maʼyukix tiempo yuʼun ya kalbeyex skʼoplal ta swenta te Gedeón, Barac, Sansón, Jefté sok te David soknix te Samuel sok te yantikxan j-alwanejetike. 33 Ta swenta te schʼuunel yoʼtanik, la stsalik ajwaliletik, toj la yaʼiyik chajpanwanej, ay bin jamal albotik yuʼun Dios te ya x-akʼbotike, la smaktiklanbey ye te león-chojetik, 34 la stupʼbeyik yip te kʼajkʼ, maba la yichʼik milel ta espada, la yichʼ akʼbeyel yipik te kʼalal maʼyuk yipik-ae, la yaʼiyik tsalaw ta guerra sok lokʼ ta anel yuʼunik te soldadoetik te ya xkontrainwanike. 35 Ay antsetik te la schaʼyilik te machʼatik laj yuʼunik ta swenta te chaʼkuxajel, pero ay winiketik te la yichʼik tulan utsʼinel ta skaj te ma la skʼanik te ya yichʼik koltayel yuʼun libre ya xjilik, yuʼun jich ya yichʼik te chaʼkuxajtesel te lekxane. 36 Ay yantik te la yichʼik labanel sok akʼbeyel nujkul,* ay kʼaxtoxan te bin la yichʼik pasbeyele, la yichʼik chukel ta cadena sok la yichʼik chukel. 37 Ay la yichʼik chʼojel ta ton, akʼel ta prueba, la yichʼik xotʼel ta olil ta sierra, la yichʼik milel ta espada, chikan-nax te banti ayik ta beel kʼaxele, skʼuʼinojik snujkulel tuminchij sok snujkulel tentsun, la sta swokolik yuʼun te maʼyuk bin ay yuʼunik, kʼax swokolik sok ay la yichʼik utsʼinel, 38 jaʼik ants winiketik te kʼax lek yoʼtanik te ma snujpʼuk te ya sjokinik te ants winiketik ta balumilal ini. Bayuk beenik ta jochol takin kʼinal, ta witsetik, ta yutil chʼenetik soknix ta yutil mukʼul chʼenetik.

39 Manchukme ta spisilik lek ilotik yuʼun Dios ta swenta te schʼuunel yoʼtanike, maba la yichʼik te bin albotik ta jamal yuʼun Dios te ya yichʼike, 40 melel ay bin kʼax lekxan schajpanoj ta jtojoltik te Diose, yuʼun jich pajal ya kichʼtik lekubtesel yuʼun te Diose.