Te lek yachʼil kʼop ya yal te Lucas

4 Te Jesús noj ta yoʼtan te chʼul espiritue,* la yijkitay jilel te Jordán sok ikʼot bael yuʼun te chʼul espíritu ta jochol takin kʼinal. 2 Jil 40 kʼajkʼal tey-a sok pasot ta prueba yuʼun te Pukuj.* Maba weʼ te jayeb kʼajkʼal tey ay-ae, jich yuʼun ayix bayal swiʼnal-a. 3 Jich albot yuʼun te Pukuje:* «Teme sNichʼanat Dios, kʼatpʼuna ta pan te ton ini». 4 Pero, jich la yal te Jesús: «Jich tsʼibaybil: ‹Mame jaʼuknax ta pan ya xkuxin te winike›».

5 Te Pukuje* la yikʼ bael te Jesús ta jun lugar te toyol aye, ta jtsʼin-nax* la yakʼbey yil spisil te nacionetik ay ta balumilale. 6 Jich albot yuʼun te Pukuje:* «Yame kakʼbat te yutsilal te nacionetik ini sok ya kotsesat ta ajwalil ta stojolik, melel spisil ini jaʼ akʼbil ta jkʼab sok joʼon ya kil te machʼa ya jkʼan ya kakʼbeye. 7 Jaʼnax teme ya akejan aba junuknax buelta ta jtojole, ya kakʼbat spisil ini». 8 Jich la yal te Jesús: «Jich tsʼibaybil: ‹Jaʼnaxme xa awichʼ ta mukʼ te Jehová* te Dios awuʼune sok jaʼnaxme xa awakʼ aba ta abatinel ta stojol›».

9 Jich te Pukuje* la yikʼ bael te Jesús ta Jerusalén te banti kʼax toyolxan te temploe, sok jich la yalbey: «Teme sNichʼanat Dios, chʼoja aba koel, 10 melel jich tsʼibaybil: ‹Te Diose yame spas ta mantal te chʼul-abatetik yuʼune swenta ya xtal skoltayat› 11 sok ‹Ya xtal stsakat yuʼun maba ya alajin awok ta tonetik›». 12 Jich la yal te Jesús: «Jichnix albil: ‹Mame xa apas ta prueba te Jehová* te Dios awuʼune›». 13 Kʼalal te Pukuj* la yil te ma juʼ yuʼun sloʼlayel te Jesuse, jich bajt. La smaliy te bin-ora ya xjuʼ ya sloʼlaye.

14 Ta swenta yip te chʼul espiritue,* te Jesús sujt bael ta Galilea. Pujk skʼoplal ta spamal te kʼinal-abi. 15 Jaʼnix jich jajch ta nojpteswanej ta sinagogaetik, sok ichʼbil ta mukʼ yuʼun te ants winiketike.

16 Patil sujt bael ta Nazaret te banti chʼie. Jich bitʼil kʼayem ta spasel ta jujun sabadoe, och ta sinagoga, la stejkʼan sba ta skʼoponel te sJun Diose. 17 La skʼasesbeyik te balbil jun yuʼun te j-alwanej Isaías. La sjam sok la sta te banti jich tsʼibaybile: 18 «Ay ta jtojol te chʼul espíritu* yuʼun te Jehová,* melel la stsaon ta yalbeyel yaʼiyik te lek yachʼil kʼop te pobreetike. La stikunon yuʼun ya kakʼ ta libre te machʼatik chukulik sok te ya jambey sit te machʼatik ma xyilik kʼinal, sok ya kakʼ ta libre te machʼatik mosoinbilike, 19 jaʼnix jich ta yalbeyel skʼoplal te yorailix te ya xkʼuxultaywan te Jehová».* 20 La sbal te balbil june, la yakʼbey te machʼa ya xkoltaywan ta sinagogae, ta patil la snajkan sba. Spisil te machʼatik tey ayik-ae la stʼojan sitik ta stojol te Jesuse. 21 Te Jesús jich jajch yalbey yaʼiy te ants winiketike: «Kʼotix ta pasel ta kʼajkʼal ini te bin la awaʼiyik stojol te tsʼibaybil ta sJun Dios».

22 Spisilik leknax la yalbeyik skʼoplal te Jesuse sok chamnax yoʼtanik* yuʼun te tʼujbil kʼopetik la yale. Jich la yalik: «¿Mabal jaʼuk snichʼan José te winik ini?». 23 Jich la yal te Jesús: «Jichniwan ya awalbonik ta jtojol: ‹Jpoxtaywanej, poxtaya aba atukel›. Sok ya awalik: ‹Pasa ta alumal-euk te bin la kaʼiytik stojol te la apas ta Capernaúm›». 24 Sok jich la yalxan: «Jamal ya kalbeyex te maʼyuk jtul j-alwanej te ya yichʼ ichʼel ta mukʼ ta slumal. 25 Jaʼnix jich, jamal ya kalbeyex te ay bayal meʼba antsetik ta skʼinal Israel ta skʼajkʼalel te Elías, ta yorail-abi maba la yakʼ jaʼal oxeb jaʼbil sok olil, jich tal tulan wiʼnal ta kʼinal-abi. 26 Pero, te Elías maba la yichʼ tikunel ta stojol te meʼba antsetik te ayik ta Israel, jaʼnax la yichʼ tikunel ta stojol jtul meʼba ants te ay ta Sarepta ta skʼinal Sidón. 27 Jaʼnix jich, ta skʼajkʼalel te j-alwanej Eliseo ay bayal te machʼatik yichʼoj kʼaʼel chamel ta Israel, pero maʼyuk jtuluk la slekubtes; jaʼnax te Naamán te sirio-winike». 28 Spisil te machʼatik ayik ta sinagoga te la yaʼiyik stojol ini, kʼaxto ilinik yuʼun. 29 La stejkʼan sbaik sok la sjochik lokʼel ta oranax te Jesús ta stiʼil te lume sok la yikʼik bael ta toyol wits te banti jajchem tal te stsʼajkʼul te lume yuʼun teyto ya schʼojik koel-a. 30 Pero, te Jesús kʼax ta yolilik, jich bajt.

31 Te Jesús ko bael ta Capernaúm te ay ta skʼinal Galilea. Ta jujun sábado la snojptes te ants winiketik tey-a. 32 Chamnax yoʼtanik* yuʼun te ants winiketik ta swenta te bin-utʼil nojpteswane, melel jich kʼopoj te bin-utʼil machʼa yichʼoj tulan yaʼtele. 33 Ta yorailnix-abi ay jtul winik te ay ta sinagoga te ochem pukuj ta yoʼtan te jich tulan awun: 34 «¡Aaa! ¿Bin awentaonkotik-a, jaʼat Jesús te talemat ta Nazaret? ¿Yuʼunbal tal alajinonkotik? Jnaʼojtik te jaʼat tikunbilat tal yuʼun te Diose sok te chʼultesbilat yuʼune». 35 Pero, te Jesús la yut te pukuj sok jich la yalbey: «Chʼaban, lokʼan ta yoʼtan te winike». Jich te pukuj la sjip ta lum te winik ta yolil te ants winiketike, jich lokʼ ta yoʼtan, maba la yutsʼin jilel. 36 Te kʼalal jich la yilike, chamnax yoʼtanik* yuʼun sok jich la yalbey sbaik: «Ilawilik te bin-utʼil ya xkʼopoje, yichʼoj tulan yaʼtel sok ay yuʼel ta spasel ta mantal te pukujetike, jich oranax ya xlokʼik ta yoʼtan te ants winiketike». 37 Jich pujk skʼoplal te Jesús ta spamal te kʼinal-abi.

38 Te kʼalal lokʼ bael ta sinagoga te Jesuse, kʼot ta sna te Simone. Te snial meʼel* te Simón tsakbil ta tulan kʼajkʼ, la skʼanbeyik te Jesús te yakuk slamantesbey te kʼajkʼ tsakbile. 39 Jich te Jesús la snijan sba ta stojol, la skom te kʼajkʼ tsakbil-ae. Oranax jajch ta swayib sok och ta makʼlinwanej.

40 Te kʼalal malix-a te kʼajkʼale, spisil te machʼatik ay jchameletik yuʼunik, chikan biluk chamel yichʼojik, la yikʼik bael ta stojol te Jesuse. Te Jesús la skajan skʼab ta stojol ta jujuntul, jich lekubik. 41 Jaʼnix jich, te pukujetik te lokʼik ta yoʼtan bayal ta tul ants winiketik jich yakik ta aw: «¡Jaʼat sNichʼanat te Diose!». Pero ma la yakʼ kʼopojuk te pukujetike, melel snaʼojik te jaʼnix-a te Cristoe.

42 Te kʼalal sakub te kʼinale, te Jesús lokʼ bael sok namal* te banti bajte. Bayal ta tul ants winiketik leot yuʼun, kʼotik tey-a te banti ay te Jesuse, kʼan skomik te manchuk ya x-ijkitayotik yuʼune. 43 Pero, jich albotik yuʼun te Jesús: «Jaʼnix jich ya skʼan ya xbajt jcholbey yaʼiy te yantik lumetik te lek yachʼil kʼop yuʼun te Wentainel* yuʼun te Diose, melel jaʼ swentail te tikunbilon tale». 44 Jich la schol skʼop Dios ta sinagogaetik te ayik ta spamal skʼinal Judea.