Génesis

18 Ta patil, te Jehová la yakʼ sba ta ilel ta stojol te Abrahán te banti ay te mukʼul teʼetik yuʼun Mamré. Mero kʼux kʼajkʼal-a kʼalal te Abrahán nakal ta yochibal te snailpakʼe. 2 Te kʼalal la stoy sit, la yil oxtul winiketik te tekʼajtike. Jaʼnax te kʼalal la yiltiklane, animalnax bajt statiklan tal, tey-abi la spajkan sba ta lum. 3 Ta patil, jich la yal: «Jehová, teme lek ya awilone, ya jkʼanbat wokol te manchuk toj ya xkʼaxat bael ta sna te j-abat awuʼune. 4 Ya kakʼ te ya yichʼik talel jtebuk jaʼ swenta ya spoktiklanbeyex awokik. Ta patil ya xjuʼ ya akux awoʼtanik ta yeʼtal teʼ. 5 Te bitʼil talex ta stojol te j-abat ini, ya xbajt kichʼ tal jtebuk pan yuʼun ya atsakxan awipik. Ta patil ya xjuʼ ya xbaex». Jich la yalik te winiketik: «Lek ay. Pasa te bin la awalixe».

6 Jich te Abrahán oranax bajt sle te Sara ta nailpakʼ sok jich la yalbey: «¡Suja aba! Tsaka tal oxpʼis* lekil harina, wotsʼa sok pasa chaʼoxpejchuk pan». 7 Ta patil, te Abrahán animal bajt te banti ay te wakaxetike, la stsak jkojt jkolel* toro, te unin-nax te stiʼbalule, la yakʼbey te yabate, te oranax bajt schajpane. 8 Ta patil la yichʼ tal mantequilla,* leche sok te jkolel* toro te pasbilix-a, jich la yakʼtiklanbey sweʼelik. Te Abrahán tekʼel jilel te banti nopol* yakik ta weʼel te winiketik tey ta yeʼtal teʼ.

9 Jich jojkʼoybot yuʼun te winiketik: «¿Banti ay te Sara te awiname?». «Liʼ ay ta yutil te nailpakʼ», xchi te Abrahán. 10 Ay jtul te jich la yal: «Yananixme sujton tal ta yan jaʼbil ta jich ora ini, melel te awinam Sara ya x-ayin* jtul skerem-al». Te Sara yak ta yaʼiyel stojol tey ta yochibal te nailpakʼ te ay ta spat te winike. 11 Ta yorail-abi, meʼel mamalikix-a te Abrahán sok te Sara. Kʼaxix yorail-a te ya xjuʼ ya sta yalatak* te Sarae. 12 Jaʼ yuʼun, te Sara tseʼejin ta yoʼtan sok jich la yal: «Te bitʼil meʼelonix sok mamalix te kajwal, ¿yatobal kaʼiybeyxan yutsilal?». 13 Te Jehová jich la yalbey te Abrahán: «¿Bin yuʼun tseʼejin te Sara? ¿Bin yuʼun la yal te maba ya staix jtul skerem-al te bitʼil ayix yaʼbilale? 14 ¿Yuʼunbal ay bin ma xjuʼ yuʼun spasel te Jehová? Ya sujton tal ta yan jaʼbil ta jich ora ini, melel te Sara ya x-ayin* jtul skerem-al». 15 Pero, ta skaj te xiw te Sarae, jich la yal: «¡Maʼuk! ¡Maba tseʼejinon!». Te Dios jich la yal: «Ma jichuk, tseʼejinat».

16 Jajchik te winiketik yuʼun ya xbajtik. Kʼalal jokinbilik bael yuʼun-a te Abrahán, la yilik koel te Sodoma. 17 Te Jehová jich la yal: «¿Yabal jmuk ta stojol Abrahán te bin ya xbajt jpase? 18 Te Abrahán yananix xkʼot ta jun mukʼul nación te bayal yip, sok spisil te nacionetik ta balumilal yame staik bendición ta swenta. 19 Ya jnaʼ te ya xbajt spas ta mantal te yal snichʼnab sok spisil te stsʼumbal te ya skʼan ya stʼunik te be yuʼun Jehová yuʼun ya spasik te bin toj sok te bin leke. Teme jich ya spasike, joʼon, te Jehovaon, yame jkʼotes ta pasel te bin kalojbey ta jamal te Abrahán».

20 Jich la yal te Jehová: «Kʼax tulanix te bin ya yichʼ alel ta stojol te Sodoma sok te Gomorra sok kʼax toyemix te smulike. 21 Ya xkoon bael ta yilel teme smelelil te bin yakik ta yalel ta stojolike sok teme smelelil te kʼax chopol* te bin yakik ta spasele. Teme ma jichuke, yame jnaʼ stojol».

22 Ta patil, te winiketik lokʼik bael tey-a, jich bajtik ta Sodoma, pero te Jehová jil sok te Abrahán. 23 Tey-abi, te Abrahán noptsaj* ta stojol sok jich la yalbey: «¿Pajalbal ya alajin te machʼatik chopol* yoʼtanik sok te machʼatik toj yoʼtanike? 24 Jnop kaʼiytik te ay 50 ta tul te machʼatik toj yoʼtanik ta mukʼul lum. ¿Yananixbal alajin spisil-a te ants winiketike? ¿Mabal yakuk apasbey perdón te mukʼul lum ta swenta te 50 ta tul te machʼatik toj yoʼtanike? 25 ¡Maniwan jichuk ya apas te jaʼate, te pajal ya alajin te machʼatik chopol* yoʼtanik sok te machʼatik toj yoʼtanike! ¡Maʼyuk bin-ora ya awakʼ te pajal te bin ya xkʼot ta stojolik! Maniwan jichuk ya apas te jaʼate. ¿Yuʼunbal ma spas te bin toj ta pasel te Juez yuʼun swolol te balumilal?». 26 Jich yuʼun, te Jehová jich la yalbey: «Teme ay 50 ta tul te machʼatik toj yoʼtanik ta mukʼul lum Sodoma, ya jpasbey perdón te mukʼul lum ta swentaik». 27 Manchukme jich albot, te Abrahán jich la yal: «Jehová, pasa perdón te ya jwulwultayate. Ya jnaʼ te tsʼubilumon sok te tanon. 28 Jnop kaʼiytik te ayto skʼan joʼtul te machʼatik toj yoʼtanik yuʼun ya stsʼakaj te 50 ta tule. ¿Yabal alajin te mukʼul lum jaʼnax yuʼun te ayto skʼan joʼtule?». Te Dios jich la yal: «Maba ya jlajin teme ya jta 45 ta tul te machʼatik toj yoʼtanik tey-a».

29 Jich la yalxan te Abrahán: «¿Jaxan teme ay 40 ta tule?». «Teme ay 40 ta tule, maba ya jlajin», xchi te Diose. 30 Te Abrahán jich la yalxan: «Jehová, ma x-ilinat, awokoluk, ay binxan ya jkʼan ya kalbat. ¿Jaxan teme jaʼnax ay 30 ta tule?». «Teme ay 30 ta tule, maba ya jlajin», xchi te Diose. 31 Jich kʼopojxan te Abrahán: «Jehová, pasa perdón te ya jwulilanate. ¿Jaxan teme jaʼnax ay 20 ta tul te machʼatik toj yoʼtanike?». «Teme ay 20 ta tule, maba ya jlajin», xchi te Diose. 32 Ta slajibal, jich kʼopojxan te Abrahán: «Jehová, ma x-ilinat, awokoluk, ayto binxan ya jkʼan ya kalbat. ¿Jaxan teme jaʼnax ay lajuntule?». «Teme ay lajuntule, maba ya jlajin», xchi te Diose. 33 Jich bajt te Jehová te kʼalal laj yoʼtan ta kʼop* sok te Abrahán, yan te Abrahán sujt bael ta snailpakʼ.