Éxodo

21 »Jaʼik ini te bintik jchapoj te ya skʼan ya awaltiklanbey:

2 »Teme ya aman jtul hebreo-winik yuʼun ya amosoin, wakebme jaʼbil ya amosoin, pero ta sjukebal jaʼbil yame skʼan akʼel ta libre, maʼyuk bin ya stoj jilel yuʼun. 3 Teme stukel tale, stukelme ya xbajt. Pero, teme tal sok yinam, jaʼnixme jich sok yinam ya xbajt. 4 Teme akʼbot yinam yuʼun te yajwal sok teme la sta yal snichʼnab sok te antse, te ants sok te yalatak jaʼme yuʼun ya xkʼot te yajwale, jich stukel ya xbajt te winike. 5 Pero, teme jich ya yalulan te moso ‹Ma jkʼan libre ya xjilon, melel kʼux ta koʼtan te kajwal, te kinam sok te jnichʼnabe›, 6 te yajwale ya xbajt stejkʼan ta stojol te smelelil Dios.* Jich yuʼun ya yikʼ bael ta tiʼnail o ta smarcoil swenta tey ya sjutbey schikin sok te bin tsʼupul sniʼ. Jichme ya smosoin te jayeb kʼajkʼal kuxule.

7 »Teme jtul winik ya schon ta moso te yantsil nichʼan, maba ya yichʼ akʼel ta libre te yantsil nichʼan jich te bin-utʼil ya yichʼ pasbeyel te winik te mosoinbile. 8 Teme ma skʼan ya yikʼ yinamin* te yajwal ta skaj te maba la smulan, pero ya sta te machʼa ya skʼan ya smane, maba ya xjuʼ ya schonbey jyanlum, melel la sloʼlay. 9 Yan teme ya yakʼbey yinamin te snichʼane, yame skʼan ya yakʼbey te bintik ay ta swenta yichʼel jich te bitʼil yantsil nichʼan. 10 Pero, teme ya yikʼxan yan yinam, mame ya spejkʼan te jayeb ya yakʼbey sweʼel, skʼuʼ spakʼ sok te ya sjokin ta wayel te sbabial yiname. 11 Teme maba ya skʼan ya yakʼbey te oxchajp-abi, libreme ya xjil te ants sok maʼyuk bin ya stoj.

12 »Machʼauk-a te ya yejchentes jtul ants winik te ya xlaj yuʼune, yame skʼan ya yichʼ milel. 13 Pero, teme ma spasemaluk yoʼtan te jich la spase sok te la yakʼ te smelelil Dios* te jich ya xkʼot ta pasel, ya xjuʼ ya x-an bael te banti ya kakʼbat anaʼe. 14 Teme jtul ants winik lijk skʼajkʼal ta stojol te spatxujk sok spasemal yoʼtan ya smil, te winik-abi yame skʼan ya xlaj, manchukme ya yichʼ lokʼesel bael ta stojol te skajtajib chikʼbil majtanil kuʼune. 15 Te machʼa ya smaj te stat o te snane,* yame skʼan ya yichʼ milel.

16 »Teme ay machʼa ya snakʼ* bael jtul ants winik sok ya schon o ya xtaot te kʼalal ayto ta skʼab-ae, yame skʼan ya yichʼ milel.

17 »Machʼauk-a te ya schopolkʼoptay te stat o te snan,* yame skʼan ya yichʼ milel.

18 »Teme ay winiketik te ya stsak sbaik ta majtamba, teme jtul ya yejchentes ta ton o ta skʼab* te yan sok te maba ya xlaj yuʼune, pero ya xjil ta swayib, akʼa yichʼ pasel ini: 19 teme ya xjuʼ ya sjach sba sok ya xjuʼ ya xbeen ta swenta jun nabateʼ, maba ya yichʼ castigo te winik te ejchenteswan, jaʼnax ya skʼan ya stojbey te jayeb kʼajkʼal maba ya x-aʼtej jaʼto te kʼalal ya xlekub ta jkʼaxele.

20 »Teme jtul winik ya smaj ta teʼ te smoso o te scriada te ya xlaj yuʼun, yame yichʼ akʼbeyel spakol yuʼun. 21 Pero, teme kuxul ya xjil jun o chebuk kʼajkʼal, maba ya yichʼ akʼbeyel spakol, melel te winik jaʼnix ta stakʼin la sman.

22 »Teme ay winiketik te yakik stsakbel sbaik ta majtamba te ya yejchentesik jtul ants te yikʼoj yal ta schʼujt te ayin* te yal te kʼalal mato yorailuk-a, pero maʼyuk machʼa ya xlaj yuʼun, ta skaj te wokolil la yakʼe te machʼa la sta smul yame skʼan ya stoj jaʼ chikan te jayeb ya skʼan te smamalal te ants; yame skʼan ya stoj jaʼ chikan te jayeb ya skʼanik te juecetike. 23 Pero, teme ay machʼa laje, yame skʼan ya yichʼ milel-euk te machʼa milawane, 24 teme ay machʼa la stʼusbey te sit, teme ay machʼa la slokʼesbey te sbakel ye, teme ay machʼa la swakʼbey* te skʼab o teme ay machʼa la swakʼbey te yok, 25 teme ay machʼa la schikʼ, teme ay machʼa la yejchentes sok teme ay machʼa la yakʼbey majel, jaʼnixme jich akʼa yichʼ pasbeyel-euk.

26 »Teme jtul winik ya yejchentesbey sit te smoso o te scriada te ma xyilix kʼinal yuʼune, yame skʼan ya yakʼ ta libre ta swenta te site. 27 Teme ya slokʼesbey ta majel jpʼij sbakel ye te smoso o te scriada, yame skʼan ya yakʼ ta libre ta swenta te sbakel yee.

28 »Teme jkojt toro ya sluch* jtul winik o jtul ants te ya xlaj yuʼune, yame skʼan ya yichʼ milel ta chʼojel ta ton te toro sok maba ya yichʼ weʼel. Pero, te yajwal te toro maba ya yichʼ castigo stukel. 29 Teme stalel ya xluchawan* te toro sok maba ya yil te yajwal manchukme ay albilix, teme ya smil jtul winik o jtul ants, yame skʼan ya yichʼ milel ta chʼojel ta ton te toro sok yame skʼan ya yichʼ milel-euk te yajwale. 30 Teme ya xkʼanbot takʼin te yajwal te toro swenta maba ya yichʼ milel, yame skʼan ya stoj jaʼ chikan te jayeb ya xkʼanbot swenta maba ya xlaj. 31 Teme jtul chʼin kerem o jtul chʼin achʼix ya yichʼ luchel* yuʼun te toroe, jaʼnixme jich ya skʼan ya yichʼ ichʼel ta kʼop te yajwal te toroe. 32 Teme ya sluch* jtul moso o jtul criada te toroe, te yajwal yame skʼan ya stoj 30 siclo* yuʼun plata te yajwal te machʼa la yichʼ luchel sok te toro yame skʼan ya yichʼ milel ta chʼojel ta ton.

33 »Teme ay machʼa la sjam jun chʼen o la sjokʼ chʼen te maba la smakbey jilel te stiʼil te jich ya xchʼay koel jkojt toro o jkojt burro tey-a, 34 te yajwal te chʼene yame skʼan ya stoj. Yame skʼan ya stojbey te yajwal te chambalam te jayeb stojol sok jaʼme yuʼun ya xkʼot te chambalam te lajeme. 35 Teme ay machʼa ay storo te ya sluchbey* storo te yan te ya xlaj yuʼune, yame skʼan ya schonik te toro te kuxul jil sok ya xatbey sbaik te stojole. Jaʼnix jich yame skʼan ya xatbey sbaik-a te toro te lajeme. 36 O teme naʼbil te stalel ya xluchawan* te toro pero maba skanantayoj te yajwale, yame skʼan ya stoj ta swenta jkojt toro sok jaʼme yuʼun ya xkʼot te toro te lajeme.