Te lek yach’il k’op ya yal te Juan

16 »La kalbeyex spisil ini yuʼun jich maba ya xchʼay te schʼuunel awoʼtanike. 2 Yame awichʼik lokʼesel ta sinagoga. Ta melel, yame sta yorail te ya skuyik te yakik ta spasbeyel yaʼtel Dios spisil te machʼa ya smilexe. 3 Pero, jichme ya spasik ini, melel ma snaʼbeyik sba te Tatil sok ma snaʼbonik jba-euk. 4 La kalbeyex spisil ini yuʼun jich te kʼalal ya xkʼot ta pasele, yame xjul ta awoʼtanik te la kalbeyexe.

»Maba la kalbeyex awaʼiyik ta sjajchibal spisil ini, melel jokinojex-a. 5 Ya xboonix ta stojol te machʼa la stikunon tale, pero ni jtuluk te jaʼex ya ajojkʼoybonik ‹¿Banti ya xbaat?›. 6 Ta swenta te la kalbeyex spisil ini, jaʼnax jajchex ta tulan mel-oʼtan yuʼun. 7 Pero ya kalbeyex ta jamal: jaʼ ta swenta alekilalik te ya xboone. Melel teme maba ya xboone, maba ya xtal ta atojolik te jkoltaywaneje, pero teme ya xboone, joʼonme ya jtikunbeyex tal ta atojolik. 8 Te kʼalal ya xjule, jaʼme ya yakʼbey yil te ants winiketik te smulike sok te bin stojil ta pasel soknix te bin-utʼil ya x-ichʼawan ta kʼop te Diose. 9 Te sbabiale jaʼ ta swenta te mulile, melel maba ya yakʼ schʼuunel yoʼtanik ta jtojol; 10 te yane jaʼ ta swenta te bin toj ta pasele, melel ya xboon ta stojol te Tatile sok maba ya awilonikix, 11 ta patil, jaʼ ta swenta te bin-utʼil ya x-ichʼawan ta kʼop te Diose, melel te ajwalil yuʼun te balumilal ini la yichʼix ichʼel ta kʼop.

12 »Ayto bayal te bin ya jkʼan ya kalbeyexe, pero mato xkʼot ta awoʼtanik ta ora ini. 13 Pero, te kʼalal ya xjul te jkoltaywanej —jaʼ te chʼul espíritu* te ya yakʼ ta naʼel te smelelil kʼope—, jaʼme ya yakʼbeyex anaʼik spisil te smelelil kʼope, melel ma jaʼuk ya yal te bin ya skʼan stukele, jaʼme ya yal te bin ya yaʼiy stojole sok yame yalbeyex te bintik yato xkʼot ta pasele. 14 Jaʼme ya yalbon yutsil jkʼoplal, melel jaʼme ya yalbeyex awaʼiyik te bin ya jkʼan ya kalbeyexe. 15 Spisil te bin ay yuʼun te Tatile jaʼnix kuʼun-euk. Jaʼ yuʼun la kal te jaʼ ya yalbeyex awaʼiyik te bin ya jkʼan ya kalbeyexe. 16 Jtebxanix ya skʼan te maba ya awilonikix, pero jaʼnix jich jtebxanix ya skʼan yuʼun ya awilonik».

17 Te kʼalal jich la yaʼiyike, ay chaʼoxtul jnopojeletik te jich jajch yalbey sbaike: «¿Bin ya skʼan ya yalbotik te ‹Jtebxanix ya skʼan te maba ya awilonikix, pero jaʼnix jich jtebxanix ya skʼan yuʼun ya awilonik› sok te ya yal ‹Ya xboon ta stojol te Tatile›?». 18 Jich la yalikxan: «¿Bin swentail te kʼalal ya yal ‹Jtebxanix ya skʼan›, te xchie? Ma jnaʼbeytik swentail te bin ya skʼan ya yalbotike». 19 Te Jesús la snaʼ stojol te ay bin ya skʼan ya xjojkʼoybot yuʼun te jnopojeletike, jaʼ yuʼun jich la yaltiklanbey: «¿Jaʼbal jich ya ajojkʼoybey abaik yuʼun te jich la kale: ‹Jtebxanix ya skʼan te maba ya awilonikix, pero jaʼnix jich jtebxanix ya skʼan yuʼun ya awilonik›? 20 Jamal ya kalbeyex te yame x-okʼex sok te ya amel awoʼtanik, yan stukel te balumilal tseʼelnaxme yoʼtanik; manchukme ya amel awoʼtanik, te mel-oʼtan awuʼunike yame xkʼatpʼuj ta tseʼel oʼtanil. 21 Te kʼalal ya x-ayin* yal te jtul antse, ya x-akʼbot skʼuxul, melel la staix yorail te ya x-ayin te yale. Pero, te kʼalal ayinemix-a te yale, maba ya snaʼix-a te swokole, jaʼ tseʼel yoʼtan yuʼun te bitʼil ayinix jtul alal ta balumilal. 22 Jichme ya xkʼot ta atojolik. Ta ora ini, ayex ta tulan mel-oʼtan; pero yame kilex yan buelta, jichme ya ataikxan stseʼelil awoʼtanik sok maʼyuk machʼa ya xjuʼ ya spojbeyex te stseʼelil awoʼtanike. 23 Ta yorail-abi mame ayuk bin ya ajojkʼoybonik. Jamal ya kalbeyex, spisil te bin ya akʼanbeyik te Tatil ta swenta jbiil yame yakʼbeyex. 24 Ta ora ini, mato ayuk bin akʼanojik ta swenta jbiil. Kʼanaik sok yame awichʼik akʼbeyel, jichme tsʼakal ya xkʼot te stseʼelil awoʼtanike.

25 »La kalbeyex spisil ini ta swenta lokʼombakʼopetik. Yame sta yorail te maba ya jkʼoponex ta lokʼombakʼopetik, melel jamal ya kalbeyex awaʼiyik te bin-utʼil ay te Tatile. 26 Ta yorail-abi ayme bin ya akʼanbeyik te Tatil ta swenta jbiil. Mame jaʼuk ya jkʼan ya kalbey skʼoplal te joʼon ay bin ya jkʼanbey te Tatil ta atojolike. 27 Te jaʼexe kʼuxex ta yoʼtan te Tatile, melel kʼuxon ta awoʼtanik sok achʼuunojik te talemon ta swenta sbiil te Diose. 28 Talon ta balumilal ta swenta sbiil te Tatile. Ya kijkitayix jilel te balumilal yuʼun ya xboon ta stojol te Tatile».

29 Jich albotik yuʼun te jnopojeletik yuʼune: «Ta ora ini, jamal la awalbotikix kaʼiytik, maba la awalbotikix ta lokʼombakʼopetik. 30 Ta ora ini la jnaʼkotikix te spisil ya anaʼe sok te ma puersauk te ay bin ya awichʼ jojkʼoybeyele. Ta swenta-abi ya jchʼuunkotik te talemat ta stojol te Diose». 31 Jich albotik yuʼun te Jesús: «¿Yabal achʼuunikix? 32 Aʼiya awaʼiyik stojol ini. Yame sta yorail —yorailix ini— te ya xpujkex baele. Ta tulutul ya sujtex ta anaik sok jtukel ya awijkitayonik. Pero, maba jtukel ayon, melel sjokinojon te Tatile. 33 La kalbeyexix ini yuʼun jich ay lamalkʼinal ya awaʼiyik ta jwenta. Yame ata awokolik ta balumilal. Pero ¡mame xiwex!, te joʼone la jtsalix te balumilale».