Sbabial carta ta stojol te Corintioetik

11 Kʼayinbonik jtalel jich bitʼil ya jkʼayinbey stalel te Cristoe.

2 Kermanotak, ya kalbeyex lek akʼoplalik, melel ya xjulon ta awoʼtanik ta spisil te bintik ya apasike sok te ay ta awoʼtanik te nojptesel la kalbeyex awaʼiyike. 3 Pero ya jkʼan ya kakʼbeyex anaʼik ini: te jolal yuʼun spisil te winiketik jaʼ te Cristo, te jolal yuʼun te ants jaʼ te winik sok te jolal yuʼun te Cristo jaʼ te Diose. 4 Te winik te ya smuk sjol te kʼalal ya skʼopon Dios o ya xkʼopoj ta skʼop j-alwanej ya yakʼ ta kʼexlal sjol, 5 pero te ants te maba ya smuk sjol te kʼalal ya skʼopon Dios o kʼalal ya xkʼopoj ta skʼop j-alwanej ya yakʼ ta kʼexlal te sjol, melel jich kʼoem te joxbil* te stsotsel sjole. 6 Teme maba ya smuk sjol te antse, akʼa setʼ lokʼel te stsotsel sjole, pero teme ya xkʼexaw te ants te ya setʼ lokʼel o te ya sjox* lokʼel te stsotsel sjole, akʼa smuk te sjole.

7 Te winike ma xjuʼ ya smuk te sjole, melel jaʼ slokʼomba sok jaʼ yutsilal te Diose, yan stukel te antse jaʼ yutsilal te winike. 8 Melel te winike maba talem ta stojol te antse, te antse jaʼ talem ta stojol te winike. 9 Te winike maba la yichʼ pasel ta skaj te antse, te antse jaʼ la yichʼ pasel ta skaj te winike. 10 Ta swenta-abi sok ta swenta te chʼul-abatetike, te ants ya skʼan ya smuk sjol swenta señail te wentainbile.

11 Pero, ta swenta te Kajwaltik, te antse ma xjuʼ ya xkuxaj teme maʼyuk te winike, jaʼnix jich te winik ma xjuʼ ya xkuxaj teme maʼyuk te antse. 12 Jich te bin-utʼil te ants talem ta stojol te winike, jaʼnix jich te winik ya x-ayin* ta swenta te antse. Pero, spisil te bintik aye talem ta stojol te Diose. 13 Jaʼexnix ya awalik: ¿lekbal teme maba ya smuk sjol te ants te kʼalal ya skʼopon te Diose? 14 ¿Yuʼunbal ma xa anaʼik te kʼexlaltik sba teme najt stsotsel sjol te winike? 15 ¿Yuʼunbal ma xa anaʼik te jaʼ yutsilal te ants teme najt te stsotsel sjole? Melel akʼbil te stsotsel sjol yuʼun ya smuk sjol-a. 16 Jich yuʼun, teme ay machʼa ya skoltaybey skʼoplal yan costumbre, akʼa snaʼ stojol te maʼyuk yan costumbre kuʼuntik ni jaʼuk te congregación yuʼun te Diose.

17 Pero, ta swenta te bin ya kal ta ora ini, maba ya kalbeyex lek akʼoplalik yuʼun, melel te kʼalal ya atsob abaik ma jaʼuk ya apasik te bin leke, jaʼnax ya awutsʼin abaik. 18 Yuʼun kaʼiyoj stojol te kʼalal ya atsob abaik jich bitʼil congregación, ay xatomba awuʼunik sok ya schʼuun koʼtan jtebuk te jich yakex ta spasele. 19 Melel ta awolilik ay machʼatik ya yakʼ te jujunxajt ya awakʼ abaike, yuʼun jich ya xchiknaj-a te machʼatik lek ilbil yuʼun te Diose.

20 Te kʼalal ya atsob abaik ta jun lugar, ta melel ma jaʼuk yakex ta spasel te Weʼel Uchʼel yuʼun Kajwaltik. 21 Melel te kʼalal jich ya apasike, ay machʼatik ya xnailajik ta sweʼel, jich yuʼun ay machʼa ay swiʼnal, te yane yakubenix. 22 ¿Yuʼunbal maʼyuk anaik te banti ya xjuʼ ya xweʼ x-uchʼex-a? O ¿yuʼunbal maʼyuk skʼoplal ta awoʼtanik te congregación yuʼun Dios sok te ya akʼexlaltesik te machʼatik maʼyuk bin ay yuʼunike? ¿Bin ya kalbeyex ta swenta ini? ¿Yabal skʼan ya kalbeyex lek akʼoplalik yuʼun? Maʼuk, maba ya kalbeyex lek akʼoplalik.

23 Melel jich la kakʼbeyex anaʼik stojol te bin-utʼil la yakʼbon jnaʼ te Kajwaltike: te ajkʼabal te kʼalal la yichʼ akʼel ta kʼabal te Kajwaltik Jesús, la stsak te pan, 24 te kʼalal skʼoponojix-a te Diose, la xetʼ sok jich la yal: «Jaʼ señail jbakʼetal ini te ya yichʼ akʼel ta swenta akolelik. Jichme xa apasulanik ta swenta jnaʼojibal». 25 Te kʼalal lajix yoʼtanik ta weʼel-ae, jichnix la spas ta swenta te copa sok jich la yal: «Te copa ini jaʼ señail te yachʼil chapbilkʼop te ya yichʼ yiptajib ta swenta te jchʼichʼele. Jichme xa apasulanik ta swenta jnaʼojibal ta jujun buelta te ya awuchʼike». 26 Melel, te jujun buelta te ya aweʼik te pan ini sok te ya awuchʼik te copa ini, jichme yakex ta spukbeyel skʼoplal te slajel te Kajwaltik, jaʼto te kʼalal ya xchaʼtale.

27 Jich yuʼun, machʼauk-a te ya sweʼ te pan o ya yuchʼ te copa yuʼun te Kajwaltik te maʼyuk ta swenta spasele jaʼ smul ya xkʼot te ma xyichʼbey ta mukʼ te sbakʼetal sok te schʼichʼel te Kajwaltike. 28 Ta jujuntul akʼa stsajtay ta yoʼtan teme yak ta spasel te bin leke, jichme ya xjuʼ ya sweʼ te pan sok ya yuchʼ te copa. 29 Melel te machʼa ya sweʼ o ya yuchʼ te ma xyichʼbey swentail te jaʼ señail te sbakʼetal te Kajwaltike jaʼnax yak ta sleel smul. 30 Jaʼ yuʼun, bayalex ta tul te maʼyuk yip awoʼtanik sok te ayex ta chamel, jaʼnix jich bayalex ta tul te yakex ta lajele.* 31 Pero, te yakuk jtsajtaytik* te bin-utʼil ay te koʼtantik ta jujuntule, maba ya kichʼtik ichʼel ta kʼop te jichuke. 32 Pero, te kʼalal ya kichʼtik ichʼel ta kʼope, te Jehová* ya stojobtesotik yuʼun ma pajaluk ya kichʼtik lajinel sok te ants winiketik ta balumilale. 33 Jich yuʼun, kermanotak te kʼuxex ta koʼtane, te kʼalal ya atsob abaik ta sweʼel te weʼelil-abi, talel kʼaxel maliya abaik. 34 Teme ay machʼa ay swiʼnale, akʼa weʼuk ta sna yuʼun jich maba ya ata amulik te kʼalal ya atsob abaik. Ta swenta te yantikxan kʼopetik te ya skʼan chajpanele, jaʼto ya xkʼot jchajpan te kʼalal ya xkʼot kilexe.