Yoxebal carta yuʼun Juan

1 Joʼon te mamalon, ya jtsʼibaybat te carta ini, jaʼat Gayo, te kʼuxat ta koʼtan ta smelelile.

2 Hermano te kʼuxat ta koʼtan, ya jkʼopon Dios ta atojol yuʼun lek ya xkʼot ta lokʼel spisil te bintik ya apase sok te lekuk ayate, jich te bin-utʼil lek ayat ta ora ini. 3 La yakʼbon bayal stseʼelil koʼtan te kʼalal jul yalbonik te hermanoetik te jun awoʼtan ta stojol te smelelil kʼope sok te yakat ta beel ta smelelil kʼop. 4 Maʼyuk bin yan te ya yakʼbon bayal stseʼelil koʼtan* te ya kaʼiy stojol te yakik ta beel ta smelelil kʼop te kal jnichʼnabe.

5 Hermano te kʼuxat ta koʼtan, yakat ta yakʼel ta ilel te jun awoʼtan ta swenta te bintik ya apas ta stojol te kermanotaktike, manchukme maba ya anaʼtiklanbey sba. 6 Te kermanotaktik-abi ya yalbeyik yaʼiy te congregación te skʼuxul awoʼtan ya awakʼ ta ilele. Awokoluk, koltaylana ta swenta te bintik ya xtuun yuʼunik te kʼalal ya xbeenike sok jichme xa apas te bin-utʼil ya smulan te Diose. 7 Melel jaʼ ta swenta sbiil Dios te bitʼil bajtik ta scholel skʼop Dios, pero maʼyuk bin la smaliyik te ya yichʼik akʼbeyel yuʼun te jyanlumetike. 8 Jich yuʼun ya skʼan te ya kotsestik ta jnatik te kermanotaktik te jich yakik ta aʼtel-abi, jichme pajal ya x-aʼtejotik ta swenta te smelelil kʼope.

9 Ay bin la jtsʼibaybey te congregación, pero te Diótrefes te jaʼ ya smulan te nail ya xkʼot ta yolil te kermanotaktike maba ya yichʼ ta mukʼ te bin ya kalkotike. 10 Jich yuʼun, teme talon te banti ayexe, yame kakʼ ta naʼel ta jamal te bin yak ta spasele, jaʼ te bayal bintik chopol* yak ta spukbeyel skʼoplal ta jtojolkotike. Ma tikʼuk ya yaʼiy-a te bin yak ta spasele, jaʼnix jich maba ya yikʼtiklan te hermanoetik sok slekil yoʼtan. Sok ya skomtiklan te machʼatik ya skʼan ya yikʼtiklan te hermanoetike sok ya skʼan ya slokʼeslan bael ta congregación.

11 Hermano te kʼuxat ta koʼtan, mame xa akʼayin spasel te bin chopole,* jaʼme xa apas te bin leke. Te machʼa ya spas te bin leke talem ta stojol Dios. Te machʼa ya spas te bin chopol ma snaʼbey sba te Diose. 12 Ta spisilik lek ya yalbeyik skʼoplal te Demetrioe soknix lek ya x-albot skʼoplal yuʼun-euk te smelelil kʼope. Ta melel, jaʼnix jich lek skʼoplal ya kalbeytik-euk, sok jaʼatnix anaʼoj te smelelil te bin ya kalkotike.

13 Ay bayal te bintik ya jkʼan ya jtsʼibaybate, pero maba ya jkʼan ya jtsʼibaybat ta jun sok ta tinta. 14 Melel koʼtanuk te nopol* ya xbajt kilbey jba jsitik sok te ya xkʼopojotike.

Ayukme ta atojol te lamalkʼinal.

Ya stikunbat spatjibal awoʼtan te kamigotaktike. Jaʼnix jich akʼbon spatjibal yoʼtan ta jujuntul te kamigotaktike.