Te lek yachʼil kʼop ya yal te Mateo

19 Te kʼalal laj yoʼtan ta yalel Jesús spisil ini, lokʼ bael ta Galilea. Bajt ta stiʼil skʼinal Judea te ay ta jejch Jordán. 2 Kʼax bayal ta tul ants winiketik tʼunot yuʼun, tey la slekubteslan-a te machʼatik ayik ta chamele.

3 Tey-abi talik chaʼoxtul fariseoetik ta stojol te Jesús yuʼun ya spasik ta prueba, jich la sjojkʼoybeyik: «¿Lekbal te biluknax swentail ya slajinbey skʼoplal te snujpunel te winike?». 4 Jich la yal te Jesús: «¿Yuʼunbal maʼyuk akʼoponojik ta sJun Dios te la spas jtul winik sok jtul ants ta sjajchibal te Diose, 5 sok te la yal te ‹Jaʼ swentail te ya yijkitay jilel smeʼ stat te winik yuʼun ya yikʼ sba sok te yiname, te jich jun-nax sbakʼetal ya xkʼot ta schebalike›? 6 Jaʼ yuʼun maba chebikix, junxanix sbakʼetalik. Jaʼ yuʼun, te bin jun-nax yakʼoj te Diose, mame ayuk machʼa ya xat». 7 Te fariseoetik jich la yalik: «¿Bin yuʼun la yal ta mantal te Moisés te akʼa spasbey sjunil te banti ya yal te ya yijkitay yinam te winik sok te akʼa stikun sujtele?». 8 Jich albotik yuʼun te Jesús: «La yakʼbeyex permiso te Moisés te ya awijkitay te awinamik ta skaj te ma xa achʼuunik kʼope.* Pero, ta sjajchibal ma jichuk ay ta pasel-a. 9 Joʼon ya kalbeyex te spisil te machʼa ya yijkitay yinam —teme ma ta skajuk mulwej—* te ya xnujpun sok yan ants, yakme ta antsiwej».

10 Te jnopojeletik jich la yalbeyik te Jesús: «Teme jich ay te kuxinel yuʼun te winik sok te yiname, jaʼ lek te ma xnujpunotike». 11 Jich la yal te Jesuse: «Ma spisiluk ya xjuʼ yuʼunik spasel te bin la yichʼix alele, jaʼnax te machʼatik jich ya xkoltayotik yuʼun te Diose. 12 Ay winiketik te ma x-ikʼbot yoʼtanik te ya xnujpunik ta skaj te jich ayinike.* Ay yantik te ma xnujpunik ta skaj te la yichʼik lokʼesbeyel te skʼunil sbakʼetalike. Pero, ay yantik te ya staik ta nopel ta stukelik te ma xnujpunik ta skaj te ya yakʼ sbaik ta abatinel yuʼun te Wentainel* yuʼun te chʼulchane. Te machʼa ya xjuʼ yuʼun spasel ini, akʼa spas».

13 Tey-abi ay machʼatik la yikʼik tal chaʼoxtul chʼin achʼix keremetik ta stojol te Jesús yuʼun ya skajan skʼab ta sjol* te chʼin achʼix keremetike sok te ya skʼoponbey Diose. Pero, te jnopojeletik la skomik. 14 Jich albotik yuʼun te Jesús: «Ma xa awutsʼinik te chʼin achʼix keremetike. Ma xa akomik te ya xtalik ta jtojole, melel te Wentainel* yuʼun te chʼulchane jaʼ yuʼunik te machʼatik jich stalelik te bin-utʼil te chʼin achʼix keremetik ini». 15 Jich te Jesús la skajan skʼab ta sjol* te chʼin achʼix keremetike, patil lokʼ bael.

16 Tey-abi tal jtul winik ta stojol te Jesús, jich jul sjojkʼoybey: «Maestro, ¿bintik lek ya skʼan ya jpas yuʼun ya xkuxinon ta sbajtelkʼinal?». 17 Te Jesús jich la yalbey: «¿Bin yuʼun te ya xtal ajojkʼoybon te bin lek ta pasele? Jtulnax te machʼa leke. Pero, teme ya akʼan ya xkuxinat sbajtelkʼinal, yame skʼan ya achʼuun spasel spisil-ora te mantaliletike». 18 «¿Bintik mantaliletik?», xchi te winike. «Mame xa awaʼiy milaw, mame xa awaʼiy antsiwej sok mame xa awakʼ aba ta antsinel, mame xa awaʼiy elekʼ, mame xa awakʼ aba ta lotil testigo, 19 ichʼa ta mukʼ te ameʼ atate sok kʼuxukme ta awoʼtan te apatxujk jichnix te bin-utʼil kʼux ya awaʼiy aba te jaʼate», xchi te Jesuse. 20 Te kerem jich la yalxan: «Yakonix ta spasel spisil ini. ¿Binxan ya skʼan ya jpas?». 21 Te Jesús jich la yalbey: «Teme ya akʼan te tsʼakal ya xkʼot te awaʼtele, baan, chona te bintik ay awuʼun, te takʼin ya atae pukbeya te pobreetik; jichme ya ata akʼulejal ta chʼulchan. Tey-abi laʼ, tʼunawon». 22 Te kʼalal jich la yaʼiy stojole, smeloj yoʼtan sujt bael te kereme, melel bayal te skʼulejale. 23 Jaʼ yuʼun, te Jesús jich la yalbey te jnopojeletik yuʼune: «Jamal ya kalbeyex te wokol ya x-och ta Wentainel* yuʼun te chʼulchan te machʼa jkʼuleje. 24 Jamal ya kalbeyex yan buelta te jaʼ oraxan ya xkʼax jkojt camello ta sit te aguja te bitʼil jtul jkʼulej ya x-och ta Wentainel* yuʼun te Diose».

25 Chamnax yoʼtanik* yuʼun te jnopojeletik te kʼalal jich la yaʼiyike, jich la yalik yuʼun: «¿Machʼa ya xjuʼ ya xkolix-a?». 26 Te Jesús la yilbey sit te jnopojeletik yuʼune sok jich la yaltiklanbey: «Te ants winiketik ma xjuʼ yuʼunik spasel ini, pero te Diose spisil ya xjuʼ yuʼun spasel stukel».

27 Jich la yal te Pedro: «Te joʼonkotike la kijkitaytik jilel spisil te bin ay kuʼuntik swenta ya jtʼunatkotik. ¿Bin ya jtatik yuʼun?». 28 Te Jesús jich la yaltiklanbey: «Jamal ya kalbeyex, kʼalal ya sta yorail te ya yichʼ pasel ta yachʼil spisile sok te kʼalal ya xnajkaj ta smukʼul naktajib te sNichʼan te Winike,* jaʼex te atʼunojonike yame xnajkajex ta 12 mukʼul naktajibaletik sok yame awichʼik ta kʼop te 12 ta chajp stsʼumbal Israel. 29 Spisil te machʼa yijkitayoj sna, sbankiltak, swixitak, yijtsʼinab, stat, snan,* yal snichʼnab o skʼinal ta swenta te jbiile 100 buelta ya yichʼxan akʼbeyel-a sok yame staik skuxlejalik sbajtelkʼinal.

30 »Ayme bayal te machʼatik nail ayike, jaʼme patil ya xkʼotik, sok ayme bayal te machʼatik patil ayike, jaʼme nail ya xkʼotik.