Carta ta stojol te Colosenseetik

3 Pero, teme pajal la awichʼik chaʼkuxajtesel sok te Cristoe, mame xa akom abaik ta sleel te bintik ay ta toyole, jaʼ te banti nakal te Cristo ta swaʼel kʼab te Diose. 2 Jaʼukme ya xbajt ta awoʼtanik snopel te bintik ay ta toyole, mame jaʼuk ta swenta te bintik ay ta balumilale. 3 Melel te jaʼexe lajemex, sok nakʼbil te akuxlejalik ta swenta Cristo te jun ay sok te Diose. 4 Te kʼalal ya yichʼ akʼel ta ilel te Cristo te jaʼ jkuxlejaltike, jaʼnix jich pajalme ya awichʼik akʼel ta ilel sok ta swenta te yutsilal.

5 Jich yuʼun akʼaik ta lajel spisil te bintik ay ta abakʼetalik te ay ta swenta te balumilale jich bitʼil te mulwej,* te bin ilobtik sba, te jaʼnax baem ta yoʼtan te ay machʼa ya skʼan ya sjokin ta wayel, te bintik chopol* ya skʼan te bakʼetalil sok bikʼtal oʼtanil te jaʼ pajal sok te yichʼel ta mukʼ lokʼombaetik. 6 Ta swenta spisil ini yame xtal te yilinba te Diose. 7 Jaʼ jich akuxlejalik-a te nameye. 8 Pero, ta ora ini jilukme awuʼunik spisil ini: ilinba, kʼajkʼubel, te bintik chopol,* kʼopetik te kʼux ta aʼiyel sok mame xlokʼ ta aweik chopol kʼopetik. 9 Mame xa apas abaik ta lot ta jujuntul. Ijkitayaik te apokoʼ talelik sok spisil te yaʼtelule, 10 jaʼ xa alapik te yachʼil talelil te bejbe* ya x-achʼub bael ta swenta te tsʼakal kʼoem ta awoʼtanik te bin smelelile, yuʼun jich ya xkʼot te bin-utʼil slokʼomba te machʼa la spase, 11 te banti maʼyuk griego ni judío, ni jaʼuk mukʼ skʼoplal teme yichʼoj circuncisión* o maba yichʼoj circuncisión, ni jaʼuk jyanlum ni jaʼuk te escita,* ni jaʼuk te moso ni jaʼuk te machʼa libre ay, melel jaʼ yuʼun te Cristo spisil te bintik aye sok swentainojotik.

12 Jaʼ yuʼun, jich bitʼil te tsabilex yuʼun te Diose, te chʼultesbilex sok te kʼux aʼiybilex ta oʼtanil, lapaik te yutsil kʼuxul oʼtanil, te lekil oʼtanil, te pekʼel oʼtanil, te manso-oʼtanil sok te lamal oʼtanil. 13 Talel kʼaxel tsʼikbeya abaik sok pasbeya abaik perdón sok spisil awoʼtanik manchukme yuʼun-nix ay bin ma lek la awichʼik pasbeyel-a. Jich te bitʼil sok spisil yoʼtan la spasbeyex perdón te Jehová,* jaʼnixme jich xa apasbey abaik perdón. 14 Pero, mame jaʼuknax spisil-abi, lapaik te kʼuxul oʼtanile, melel ya yakʼ te jun-nax ya xkʼootik ta smelelil.

15 Sok akʼa nainuk ta awoʼtanik te lamalkʼinal yuʼun te Cristo, melel te jaʼexe la awichʼik ikʼel ta lamalkʼinal-abi yuʼun jun-nax bakʼetalil ya xkʼoex. Jaʼnix jich akʼaik ta ilel te ya anaʼik yalel wokole. 16 Akʼame nainuk ta awoʼtanik spisil te spʼijilal te skʼop te Cristo. Talel kʼaxel nojptesa abaik sok mukʼubtesbeya aba awoʼtanik* sok salmoetik, albeyaik yutsil skʼoplal te Dios sok kʼayojtayaik te Dios ta swenta yalel wokol. Kʼayojtayaik te Jehová* ta awoʼtanik. 17 Spisil te bin ya apasike, chikan teme ta akʼopik o te bin ya apasik, pasaik spisil ta swenta sbiil te Kajwaltik Jesús, sok albeyaik wokol te jTatik Dios ta swenta te Jesuse.

18 Jaʼex, antsetik te nujpunemexe, akʼa abaik ta wentainel yuʼun te amamalalik, jich te bin-utʼil ya skʼan pasel ta stojol te Kajwaltike. 19 Jaʼex, winiketik te nujpunemexe, kʼuxme xa awaʼiy ta awoʼtanik te awinamik sok mame ayuk slab awoʼtanik* ta stojolik. 20 Alnichʼanetik, chʼuunbeyaik spisil smantal te ameʼ atatik, melel jaʼ lek yoʼtan yuʼun te Kajwaltike. 21 Tatiletik, mame xa awakʼ ilinuk yoʼtanik te awal anichʼnabike, yuʼun jich maba ya xchebaj yoʼtanik. 22 Mosoetik, ta spisil chʼuunbeyaik smantal te awajwalik ta balumilal, mame jaʼuknax ya apasik te kʼalal yakex ta ilel yuʼune, te jaʼnax ya akʼanik te lek akʼoplalik yuʼun te ants winiketike. Te bin ya skʼan ya apasike, jaʼ te ya achʼuunbeyik smantal sok spisil awoʼtanik, sok xiʼaikme* te Jehová* te kʼalal jich ya apasike. 23 Spisil te bin ya apasike, pasaik sok spisil akuxlejalik, jichukme ya awilik te jaʼ ta stojol te Jehová* ma jaʼuk ta stojol te ants winiketike, 24 melel anaʼojik te jaʼ ya yakʼbeyex Jehová* te majtanil ya awichʼike. Abatinanik ta stojol te Kajwaltik, jaʼ te Cristo. 25 Te machʼa ya spas te bin chopol* yananix x-akʼbot stoj-a te bin la spase, melel maʼyuk machʼa tsabilnax yuʼun te Diose.