Sbabial carta ta stojol te Corintioetik

10 Kermanotak, ya jkʼan te yakuk anaʼik te ayinik ta yaxinal tokal spisil te antiguo jmeʼ jtatike, kʼaxik spisilik ta yolil te mare, 2 la yichʼik jaʼ* ta swenta te tokal sok te mar yuʼun jich jun-nax kʼotik sok te Moisés, 3 spisilik jun-nax te weʼelil la sweʼik ta swenta skʼop Dios 4 sok spisilik jun-nax te bin la yuchʼik ta swenta skʼop Dios. Melel la yuchʼik te jaʼ yuʼun te mukʼul ton te talem ta stojol Dios te jokinbilik ta beel yuʼune, te mukʼul ton-abi jaʼ skʼoplal te Cristoe. 5 Jteb ma spisiluk te maba lek ilotik yuʼun te Diose, jaʼ yuʼun lajik jilel ta jochol takin kʼinal.

6 Spisil ini, jaʼ ejemplo kuʼuntik te manchuk ya xbikʼtaj koʼtantik yuʼun te bintik chopole,* jich bitʼil la spasik stukelike. 7 Jich yuʼun mame x-och kichʼtik ta mukʼ lokʼombaetik jich te bin-utʼil la spasik chaʼoxtul, jich te bin-utʼil tsʼibaybil: «Te ants winiketik yuʼun te lume la snajkan sbaik ta weʼel uchʼel, patil jajchik ta spasel kʼin». 8 Jaʼnix jich mame x-och jpastik mulwej* jich te bin-utʼil ay machʼatik la spasik mulwej, te jich 23 mil ta tul lajik ta jun-nax kʼajkʼal. 9 Jaʼnix jich mame jpastik ta prueba te Jehová,* jich bin-utʼil ay machʼatik la spasik ta prueba te jich lajik ta tiʼel ta jtiʼawal chanetik. 10 Jaʼnix jich mame x-ochotik ta wulwulkʼop, jich te bin-utʼil ay machʼatik jajchik ta wulwulkʼop te jich la yichʼik lajinel yuʼun te machʼa ya xlajinwane. 11 Te bin kʼot ta pasel ta stojolike jaʼ ejemplo kʼot ta jtojoltik sok la yichʼ jilel tsʼibayel ta swenta jkomeltik te joʼotik te ayotikix ta slajibal kʼajkʼale.

12 Jich yuʼun, te machʼa ya skuy te lek tekʼele, akʼame stsajtay* sba te manchuk ya xyale. 13 Spisil te prueba te ya xtal ta atojolike jaʼnix te bintik ya xkʼax ta stojolik-euk te yantik ants winiketike. Pero, jun yoʼtan ta jtojoltik te Diose sok maba ya yakʼ te ya awichʼik akʼel ta prueba te maba ya xkujch awuʼunike. Jich yuʼun, te kʼalal ya xtal te prueba ta atojolike, jaʼnix jich ya sle te bin-utʼil ya xkolex lokʼel yuʼun jich ya xkujch awuʼunik.

14 Jaʼ yuʼun, kermanotak te kʼuxex ta koʼtan, ananik lokʼel ta stojol te yichʼel ta mukʼ lokʼombaetik. 15 Jich ya jkʼoponex te bin-utʼil machʼatik ay spʼijil yoʼtanike. Nopa awaʼiyik teme lek o ma lekuk te bin ya kalbeyexe. 16 ¿Mabal yakuk jtatik bendición yuʼun te schʼichʼel te Cristo ta swenta te copa yuʼun bendición te ya kaltik wokol yuʼune? ¿Mabal yakuk jtatik jlekilaltik yuʼun te sbakʼetal te Cristo ta swenta te pan te ya jxetʼtike? 17 Jpejchnax pan ay, manchukme bayalotik ta tul, jun-nax bakʼet kʼoemotik, melel jpisiltik ya jweʼtik te jpejchnax pan-abi.

18 Nopbeyaik skʼoplal te smelelil israeletike. ¿Mabal junuknax ya xkʼot sok te skajtajib chikʼbil majtanil te machʼatik ya sweʼik te milbil majtaniletike? 19 Jich yuʼun, ¿bin ya jkʼan ya kal yuʼun ini? ¿Aybal skʼoplal te chikʼbil majtanil te ya yichʼ akʼel ta stojol te lokʼombaetike? O ¿aybal skʼoplal te lokʼombaetike? 20 Maʼuk. Te bin ya jkʼan ya kale jaʼ te chikʼbil majtanil ya yakʼik te nacionetik jaʼ ya yakʼbeyik te pukujetik, ma jaʼuk te Diose; ma jkʼan te jun-nax ya xkʼoex sok te pukujetike. 21 Ma xjuʼ te yakex ta yuchʼel te copa yuʼun Jehová* sok te yakex ta yuchʼel te copa yuʼun te pukujetike. Jaʼnix jich ma xjuʼ te yakex ta weʼel ta «smesa te Jehová»* sok te yakex ta weʼel ta smesa te pukujetike. 22 O ¿yuʼunbal ‹yakotik ta sjachbeyel yilinba te Jehová›?* ¿Yuʼunbal jaʼ bayalxan kiptik-a te bitʼil ay yip stukele?

23 Spisil ya xjuʼ ta pasel, pero ma spisiluk ya yakʼ lekilal. Spisil ya xjuʼ ta pasel, pero ma spisiluk ya yakʼ yip-oʼtanil. 24 Mame ayuk machʼa te stukelnax ya sle yutsil slekil, jaʼ akʼa slebey yutsil slekil te yantike.

25 Ya xjuʼ ya aweʼik spisil te tiʼbal te banti ya xchonot te tiʼbale, mame xa ajojkʼoy swenta maʼyuk bin ya yalbat te awoʼtane, 26 melel «jaʼ yuʼun Jehová* te balumilal sok spisil te bintik ay tey-ae». 27 Teme ay machʼa maba jchʼuunjel te ya yikʼex ta weʼel sok teme jich awoʼtanik te ya akʼan ya xbaexe, biluk-a te bin schajpanoje, weʼaikme; mame xa ajojkʼoy swenta maʼyuk bin ya yalbat te awoʼtane. 28 Pero, teme ay machʼa ya yalbeyex «Jaʼ ini la yichʼ akʼel ta chikʼbil majtanil», mame xa aweʼik ta skaj te machʼa jich la yalbate sok ta swenta te bin ya yal te oʼtanile. 29 Mame jaʼuk ya kalbey skʼoplal te bin ya yalbat te awoʼtane, jaʼme te bin ya x-albot yoʼtan te yane. ¿Bin yuʼun te ya kichʼ komel ta swenta te bin ya x-albot yoʼtan te yane? 30 Teme ya kalbey wokol Dios yuʼun te bin ya jweʼe, ¿bin yuʼun te ya kichʼ labanel ta swenta te bin ya kal wokol yuʼune?

31 Jaʼ yuʼun, chikan teme yakex ta weʼel o ta bin yuchʼel o biluk-a te bin yakex ta spasele, pasaik spisil ta swenta yichʼel ta mukʼ te Diose. 32 Mame xa awakʼbey skʼojchin yokik te judioetik, te griegoetik sok te congregación yuʼun te Diose. 33 Jich bin-utʼil ya jpas te joʼone, jaʼ ya jpas spisil te bintik lek yoʼtan yuʼun te yantik te k’alal ma jaʼuk ya jle te jlekilale, jaʼ ya jlebey slekilal bayal ta tul, yuʼun jich ya staik skolelik-a.