Schebal carta yuʼun Pedro

2 Jich bitʼil ayin lotil j-alwanejetik ta yolil te lume, jaʼnix jich ya x-ayin lotil jnojpteswanejetik ta awolilik, sok muken ya yotsesik tal lotil nojptesel te ya slajin te schʼuunel awoʼtanik, sok yame spʼajik te yajwalik te manotik yuʼune, jaʼnix ya yichʼik tal ta oranax te lajinel ta stojolik. 2 Jaʼnix jich, bayal machʼatik ya skʼayinik te bitʼil maʼyuk skʼexlalik ta skʼaxuntayel mantal,* sok jaʼ ta swentaik te ya yichʼ bolkʼoptayel te be yuʼun te smelelil kʼop. 3 Ta swenta sbikʼtal yoʼtanik yame sloʼlayex sok lotil kʼopetik. Pero, te castigo ya yichʼik te namey kʼinal albilix ta stojolike, maba ya xjalajix sok maba chʼayem ta oʼtanil te lajinel yuʼunike.

4 Ta melel, te Dios la yakʼbey castigo te chʼul-abatetik te la sle smulike, la schʼojtiklan ochel ta Tártaro,* la schuktiklan ta cadena* ta mero ijkʼal kʼinal yuʼun ya yichʼik ichʼel ta kʼop te kʼalal ya xkʼot yoraile. 5 Jaʼnix jich la yakʼbey castigo te ants winiketik ta namey, pero la skanantaybey skuxlejal stukel te Noé, te machʼa la scholbey skʼoplal te bin toj ta pasel, sok jaʼnix jich la skanantaybey skuxlejal juktulxan ants winiketik te kʼalal la yakʼ tal pulemal ta stojol te ants winiketik te chopolike.* 6 Sok te la yakʼbey castigo te mukʼul lum Sodoma sok te Gomorra kʼalal la yakʼ tanubuk ta kʼajkʼel, te bin kʼot ta pasele jaʼ jun señail te bin ya xkʼot ta stojol te ants winiketik te chopolike.* 7 Jaʼnix jich la skoltay lokʼel te Lot te toj ta winikil, te bayal la smel yoʼtan yuʼun te bitʼil maʼyuk skʼexlalik ta skʼaxuntayel mantal* te chopol* ants winiketike, 8 te bitʼil toj ta winikil te Lot bayal la smel yoʼtan ta jujun kʼajkʼal te kʼalal la yil sok te la yaʼiy stojol te bintik chopol* la spasik te ants winiketik te kʼalal kuxin ta yolilike. 9 Jich yuʼun, te Jehová* ya snaʼ skoltayel lokʼel ta pruebaetik te machʼatik ya x-ichʼot ta mukʼ yuʼune sok ya snaʼ skʼejel te ants winiketik te ma toj yoʼtanik yuʼun ya yichʼik lajinel ta Skʼajkʼalel ichʼel ta kʼop.* 10 Jaʼ kʼaxemtoxan-a ta swenta te machʼatik ya skʼan ya sbolobtesbeyik te sbakʼetal te yantike sok te ya spʼajik te machʼatik yichʼojik mukʼ yaʼtelike.

Jich te bitʼil ma xiw yoʼtanik sok te tulan yoʼtanik, maba ya xiwik ta sbolkʼoptayel te machʼatik lek ilbilik yuʼun te Diose. 11 Yan stukel te chʼul-abatetik, manchukme bayal yipik sok bayal yuʼelik, maba ya schopolkʼoptayik te machʼatik jichik-abi ta skaj te ya yichʼik ta mukʼ te Jehová.* 12 Pero, te winiketik ini jich kʼoemik bin-utʼil chambalametik te ma snaʼik kʼinal te jichnax ya spasik te bin kʼayemik ta spasele, te jaʼnax ayinik* yuʼun ya yichʼik tsakel sok ya yichʼik lajinel, jaʼnax ya schopolkʼoptayik te bintik ma snaʼbeyik swentaile. Ta skaj te schopolilik* ya yichʼik lajinel. 13 Jaʼme stojol ya xkʼotik te swokolik ta skaj te bin chopol* ya spasike.

Jaʼ kʼaxto baem ta yoʼtanik spasel te bin ya smulan te sbakʼetalike, te jaʼnix jich ya spasik ta kʼajkʼaleltik. Ay yabakulik* sok ay sbolilik te toyolnax yoʼtanik ta swenta te lotil nojptesel yuʼunik te kʼalal ya spasik kʼin sok jaʼex. 14 Te sitike nojel ta antsiwej sok yakʼel sba ta antsinel sok ma xjuʼ ya yijkitayik spasel te mulile, jaʼnix jich ya smonbey yoʼtanik te machʼatik pekʼel schʼuunel yoʼtanike. Kʼax pʼijubenik ta swenta te sbikʼtal yoʼtanike. Jaʼik bol alnichʼanetik. 15 Ta skaj te la yijkitayik te tojil bee, jowijik bael. Jaʼ stʼunojbeyik te be yuʼun te Balaam, te snichʼan Beor te bikʼtaj yoʼtan yuʼun spasel ganar te bin chopol* ta pasele, 16 pero la yichʼ komel ta skaj te la spas te bin chopole.* Jkojt burro te ma xjuʼ ya xkʼopoje, kʼopoj jich bin-utʼil jtul ants winik sok la skombey te chopol talelil yuʼun te j-alwaneje.

17 Jaʼik slokʼib jaʼetik te maʼyuk yaʼlel sok jaʼik sjab kʼinal te ya x-ikʼotik bael yuʼun te tulan ikʼe, sok jaʼ ya smaliyik te ya yichʼik akʼel ta mero ijkʼal kʼinal. 18 Ya yalik toyba kʼopetik te maʼyuk swentaile. Jaʼ ya stuuntesik te bin ya smulan spasel te bakʼetalil sok ta swenta te maʼyuk skʼexlalik ta skʼaxuntayel mantal,* jich ya smonbeyik yoʼtan te ants winiketik te lokʼelikto tal ta stojol te machʼatik chopol* skuxlejalike. 19 Manchukme jamal ya yalbeyik te yantik te libre ya xkʼotike, jaʼiknix mosoinbilik yuʼun te bin chopole.* Melel te machʼa ya yichʼ tsalele ya xmosoinot yuʼun te machʼa tsalote. 20 Ta melel, teme lokʼikix tal ta anel ta stojol te schopolil te balumilal ta swenta te la snaʼbeyikix sba ta lek te Kajwaltik Jesucristo te Jkoltaywanej kuʼuntike, pero teme ya xchaʼsujtik ta spasel spisil ini sok ya yichʼik tsalel yuʼun, kʼaxtoxan chopol* ya xkʼotik-a te bitʼil ta sjajchibal. 21 Jaʼ lek te manchuk la snaʼbeyik sba ta lek te be yuʼun te bin stojil ta pasele, te patil la yijkitayik ta spasel te chʼul mantalil te la yichʼik akʼbeyele. 22 Jich kʼoemix ta stojolik te bin ya yal te pʼijil kʼop ini: «Te tsʼiʼe ya xchaʼsujt ta sloʼel te xee, sok te meʼ chitam te pokbilix ya schaʼbalxan sba ta ajchʼal».