Sbabial carta yuʼun Juan

2 Kal jnichʼnab, ya jtsʼibaybeyex ini yuʼun jich maba ya ale amulik. Pero, teme ay machʼa ya sta smul, ay jtul jkoltaywanej kuʼuntik te ay ta stsʼeel te Tatile: jaʼ te Jesucristo te toj yoʼtan stukele. 2 Jaʼ kʼot ta milbil majtanil yuʼun te jmultik, yuʼun jich lek ya kil jbatik sok-a te Diose, pero ma jaʼuknax ta swenta te jmultik, jaʼnix jich ta stojol te ants winiketik ta balumilal. 3 Teme ma xkomotik ta schʼuunbeyel te mantaliletik yuʼune, jich ya jnaʼtik te la jnaʼbeytikix sbae. 4 Te machʼa ya yal «Ya jnaʼbeyix sba», pero maba ya schʼuunbey te mantaliletik yuʼune, jaʼ jpaslot, jich maba ay ta yoʼtan te smelelil kʼope. 5 Pero, teme ay machʼa ya schʼuunbey te skʼope, kʼax lekubenix te skʼuxul yoʼtan ta stojol te Diose. Jaʼ yuʼun ya jnaʼtik te jun-nax ayotik soke. 6 Te machʼa ya yal te jun-nax ay soke ya skʼan te jich ya xbeen te bin-utʼil been te Jesuse.

7 Kermanotak te kʼuxex ta koʼtan, maba ya jtsʼibaybeyex yachʼil mantalil, jaʼnix te antiguo mantalil te awichʼojik akʼbeyel ta sjajchibalto tale. Te antiguo mantalil ini jaʼ te kʼop te la awaʼiyik stojole. 8 Manchukme jich-abi ya jtsʼibaybeyex yachʼil mantalil, te jaʼ smelelil ta stojol te Cristo sok ta atojolik-euk, melel yakix ta tupʼel bael te ijkʼal kʼinal sok yakix ta chiknajel te smelelil sakal kʼinale.

9 Te machʼa ya yal te ay ta sakal kʼinal, pero ya spʼaj te yermanoe ayto ta ijkʼal kʼinal-abi. 10 Te machʼa kʼux ta yoʼtan te yermano ay ta sakal kʼinal, maʼyuk bin ya skʼojchin yok yuʼun. 11 Pero, te machʼa ya spʼaj te yermano ay ta ijkʼal kʼinal sok yak ta beel ta ijkʼal kʼinal, sok ma snaʼ te banti yak ta baele, melel makbil sit yuʼun te ijkʼal kʼinale.

12 Ya jtsʼibaybeyex, jaʼex kal jnichʼnab, melel la awichʼikix pasbeyel perdón yuʼun te amulik ta swenta te sbiile. 13 Ya jtsʼibaybeyex, jaʼex tatiletik, melel la anaʼbeyikix sba te machʼa aynanix ta sjajchibal-ae. Ya jtsʼibaybeyex, jaʼex jchʼieletik, melel la atsalikix te Satanase.* Ya jtsʼibaybeyex, jaʼex chʼin achʼix keremetik, melel la anaʼbeyikix sba te Tatile. 14 Ya jtsʼibaybeyex, jaʼex tatiletik, melel la anaʼbeyikix sba te machʼa aynanix ta sjajchibal-ae. Ya jtsʼibaybeyex, jaʼex jchʼieletik, melel ay yip awoʼtanik sok ay ta awoʼtanik te skʼop Diose, sok la atsalikix te Satanase.*

15 Mame kʼuxuk xa awaʼiy ta awoʼtanik te balumilal sok te bintik ay ta balumilal. Teme ay machʼa kʼux ta yoʼtan te balumilal, maba kʼux ta yoʼtan te Tatile. 16 Melel spisil te bintik ay ta balumilal —te bintik ya smulan spasel te jbakʼetaltik, te bintik ya smulan yilel te jsitik sok te toybail ta swenta te bintik ay kuʼuntik— maba talem ta stojol te Tatil, jaʼ talem ta stojol te balumilale. 17 Jaʼnix jich yak ta kʼaxel bael te balumilal sok te bintik ya yakʼ ta mulanele, pero te machʼa ya spasbey te skʼanojel yoʼtan te Dios yame xkuxin ta sbajtelkʼinal.

18 Kal jnichʼnab, slajibal ora ayotikix. Awaʼiyojik stojol te ya xtal te anticristo. Ta ora ini chiknajemix bayal anticristoetik, jaʼ yuʼun ya jnaʼtik te slajibalix ora ayotik. 19 Liʼnix lokʼ ta koliltik, pero ma junuk ayotik sok-a, melel te junuk ayotik sok-ae, la sjokinotik te jichuke. Pero lokʼik bael yuʼun jich ya xchiknaj ta ilel te maba spisilik jun ayik sok joʼotik. 20 Te jaʼexe la awichʼikix tsael yuʼun te machʼa chʼultesbile, sok apisilik anaʼojbeyik skʼoplal ta swenta ini. 21 Te bitʼil ya jtsʼibaybeyexe ma yuʼunuk ma xa anaʼik te smelelil kʼope, anaʼojikix, melel maʼyuk lotil kʼop te ya xlokʼ tal ta smelelil kʼop.

22 ¿Machʼa-a te jpaslote? ¿Mabal jaʼuk te machʼa ya smuk ta yoʼtan te jaʼ Cristo te Jesuse? Te machʼa ya smuk ta yoʼtan te Tatil sok te Nichʼanile, jaʼme anticristo-abi. 23 Spisil te machʼa ya smuk ta yoʼtan te Nichʼanile maba ay ta yoʼtan te Tatile. Pero, te machʼa jamal ya yalbey skʼoplal te Nichʼanile jaʼnix jich ay ta yoʼtan te Tatile. 24 Yame skʼan ay ta awoʼtanik te bin la awaʼiybeyik skʼoplal ta sjajchibale. Teme ay ta awoʼtanik te bin la awaʼiybeyik skʼoplal ta sjajchibale, jaʼnixme jich jun ayex ta stojol te Nichʼanil sok jun ayex ta stojol te Tatile. 25 Jaʼnix la yalbotik ta jamal te ya yakʼbotik te kuxlejalil sbajtelkʼinal.

26 Te bintik ya jtsʼibaybeyex jaʼ ta swenta te machʼatik ya skʼan ya sloʼlayexe. 27 Ayukme ta awoʼtanik te bitʼil la awichʼik tsaele, sok ma puersauk te ay yan machʼa ya snojptesex. Pero, te machʼa la stsaexe smelelil sok ma lotiluk, jaʼme ya yakʼbeyex anopik spisil. Jich te bitʼil snojptesojexe, junukme awoʼtanik ta stojol. 28 Jich yuʼun ta ora ini, kal jnichʼnab, junukme awoʼtanik ta stojol yuʼun jich te kʼalal ya xchiknaj tale, jamalme ya xjuʼ ya xkʼopojotik sok jichme maba kʼejel ya kakʼ jbatik ta stojol yuʼun kʼexlal te kʼalal liʼ ayix-ae.* 29 Teme anaʼojik te toj yoʼtane, anaʼojik-euk te ayinem* ta stojol spisil te machʼa ya spas te bin toj ta pasele.