Sbabial carta ta stojol te Timoteo

4 Pero, te skʼop te yakʼoj ta naʼel te Diose jamal ya yal te ay machʼatik ya yijkitayik te chʼuunel oʼtanil ta skaj te ya schʼam yaʼiyik te bintik ya skuyik te talem ta stojol Dios te ya xloʼlaywane sok te nojptesel yuʼun te pukujetike, 2 jaʼnix jich ta swenta te ya schʼam yaʼiyik te lotil ya yalik te winiketik te chaʼlam yoʼtanik* te jkʼaxel maʼyuk bin ya x-albotikix yuʼun te yoʼtanike, te jich kʼoem te chikʼbil ta kʼajkʼal takʼin te yoʼtanike. 3 Ya xkomawanik ta nujpunel sok ya spasik ta mantal te ants winiketik te manchuk ya sweʼik chaʼoxchajp weʼelil, pero te Dios la spas spisil te weʼelil yuʼun jich te machʼatik ay schʼuunel yoʼtanik sok te kʼoem ta yoʼtanik ta lek te smelelil kʼop ya yalik wokol te kʼalal ya xweʼike. 4 Melel lek spisil te bintik spasoj te Diose, jaʼ yuʼun ya skʼan te maʼyuk bin ya jpʼajtik teme ya kaltik wokol yuʼun te kʼalal ya kichʼtike, 5 melel chʼultesbil ya xkʼot ta swenta te skʼop Dios sok ta swenta te skʼoponel te Diose.

6 Te kʼalal jich ya atojobtes te kermanotaktike, jichme lekil j-abat ya xkʼoat yuʼun te Cristo Jesús, te ay yip ta awoʼtan te bintik achʼuunoj sok te lekil nojpteseletik te jun awoʼtan atʼunoje. 7 Pero pʼaja te lotil aʼiyejetik te ma xyakʼ ta ichʼel ta mukʼ te Diose, jich te bin-utʼil te lotil aʼiyejetik te ya scholik te meʼeletike.* Te bin ya skʼan ya apase, jaʼ te ya achajpan aba te bin-utʼil ya awichʼ ta mukʼ te Diose sok jaʼukme ya xbajt ta awoʼtan spasel-abi. 8 Melel te spasel ejercicio ay bin lek ya jtatik yuʼun, pero te yichʼel ta mukʼ te Diose jaʼ ya skoltayotik ta spasel spisil te bintik ya jpastike, melel ya yakʼbotik lekil kuxlejalil ta ora ini soknix ta pajel chaʼbej. 9 Ya xjuʼ ya schʼuun koʼtantik te bin ya yichʼ alel ini sok snujpʼ te tsʼakaluk ya yichʼ chʼuunele. 10 Jaʼ swentail te tulan yakotik ta aʼtel sok te yakotik ta spasel tulane, melel kakʼojtik smukʼul koʼtantik ta stojol te kuxul Diose, te jaʼ Jkoltaywanej yuʼun spisil te ants winiketike, kʼaxtoxan ta stojol-a te machʼatik jun yoʼtanike.

11 Mame xkomat ta yalel sok ta yakʼel ta nopel te mantaliletik ini. 12 Mame ayuk machʼa ya awakʼ spʼajat te bitʼil jchʼielate. Te bin ya skʼan ya apase, jaʼ te lekil ejemplouk ya xkʼoat ta stojol te machʼatik jun yoʼtanik ta swenta te bin-utʼil ya xkʼopojat, te atalel, te skʼuxul awoʼtan, te schʼuunel awoʼtan sok te maʼyuk mulil ta awoʼtane. 13 Te bitʼil mato xkʼoone, mame xa akom aba ta skʼoponel ta komonsitil te sJun Diose, mame xa akom aba ta tojobteswanej* sok ta nojpteswanej. 14 Kanantayame ta lek te majtanil awichʼoj te la awichʼ akʼbeyel ta swenta albilkʼop te kʼalal la skajan skʼabik ta atojol te jtsojb ancianoetike. 15 Nopilana ta awoʼtan spisil ini; aʼtelina ta spasel spisil yuʼun jich ya yilik spisilik te yakat ta yakʼbeyel yipale. 16 Spisilukme-ora ya atsajtay awil te bin yilel te atalel sok te bin-utʼil ya xnojpteswanate. Mame xa akom aba ta spasel spisil ini, melel jichme ya ata akolel soknix te machʼatik ya yaʼiybat te akʼope.