Carta ta stojol te Romanoetik

14 Ikʼaik ta atojolik sok yutsil awoʼtanik te machʼatik maʼyuk yip te schʼuunel yoʼtanike, mame ayuk bin ya x-och awal ta stojolik spisil te machʼatik yanyantik snopojibal yuʼunik* jich bin-utʼil te jaʼexe. 2 Ayniwan machʼa te ay schʼuunel yoʼtan te ya sweʼ spisil te weʼeliletike, pero te machʼa maʼyuk yip te schʼuunel yoʼtane jaʼnax ya sweʼ itaj. 3 Te machʼa ya sweʼ spisil ta chajp weʼelil mame spʼaj te machʼa maba ya sweʼe, sok te machʼa maba ya sweʼ spisil ta chajp weʼelil mame xyichʼ ta kʼop te machʼa ya sweʼe. 4 ¿Machʼa ya akuy aba-a te ya awichʼ ta kʼop te yabat te yane? Jaʼ ay ta swenta te yajwal te ya yal teme lek o ma lek te bin yak ta spasel te yabate. Ta melel, lek ya xkʼot ta lokʼel te bin ya spas te j-abate, melel jaʼ ya xkoltayot yuʼun te Jehová.*

5 Ay machʼa te mukʼxan skʼoplal ta yoʼtan te jun kʼajkʼale, te yane pajal ya yil te jujun kʼajkʼale. Ta jujuntul ya skʼan te schʼuunojik ta lek te bin snopojike. 6 Te machʼa mukʼxan skʼoplal ta yoʼtan te jun kʼajkʼale jaʼ ya spas swenta ya yichʼ ta mukʼ te Jehová.* Jaʼnix jich, te machʼa ya sweʼ spisil ta chajp weʼelil jich ya spas yuʼun ya yichʼ ta mukʼ te Jehová,* melel ya yalbey wokol yuʼun; te machʼa ma sweʼ spisil ta chajp weʼelil jich ya spas yuʼun ya yichʼ ta mukʼ te Jehová,* manchukme jich-abi, ya yalbey wokol te Diose. 7 Maʼyuk jtuluk te kuxul ta swenta stukel sok maʼyuk jtuluk te ya xlaj ta swenta stukel. 8 Melel, teme kuxulotik, kuxulotik ta swenta te Jehová;* teme ya xlajotik, ya xlajotik ta swenta te Jehová.* Jich yuʼun, teme kuxulotik o ya xlajotik, jaʼ yuʼunotik te Jehová.* 9 Melel laj te Cristo sok chaʼkuxaj swenta jaʼ Ajwalil ya xkʼot yuʼunik te machʼatik lajemik sok te machʼatik kuxulik.

10 Pero, ¿bin yuʼun te ya alebey smul te awermanoe? O ¿bin yuʼun te ya apʼaj te awermanoe? Melel jpisiltik ya jtejkʼan jbatik ta stojol te mukʼul chajpajibal yuʼun te Diose. 11 Melel jich tsʼibaybil: «Jamal ya kal te kuxulone —xchi te Jehová—,* spisil te ants winiketik yame skejan sbaik ta jtojol sok spisilik yame yalik ta jamal te joʼon Diosone». 12 Jich yuʼun, ta jujuntul yame kichʼtik ichʼel ta kʼop yuʼun te Diose.

13 Jaʼ yuʼun, mame talel kʼaxel ya jlebey jba jmultik. Mame xa awakʼbey skʼojchin yok sok mame ayuk bin ya amakbey sbe-a te awermanoe. 14 Jich bitʼil jnopojelon yuʼun te Cristo jnaʼoj sok schʼuunoj koʼtan te maʼyuk weʼelil te boloben skʼoplal. Jaʼnax teme ay machʼa ya skuy te ay bin boloben skʼoplal, yuʼun-nix boloben skʼoplal ta stojol-abi. 15 Jich yuʼun, teme ya awakʼbey smel yoʼtan te awermano ta skaj te bin ya aweʼe, maba yakatix ta yakʼel ta ilel kʼuxul oʼtanil-abi. Mame jaʼuknax ta swenta te bin ya aweʼ ya awakʼ chʼayuk te machʼa laj Cristo ta stojole. 16 Jich yuʼun mame xa awakʼ te chopol* skʼoplal ya yichʼ alel te bin lek ya apasike. 17 Melel te Wentainel* yuʼun te Diose maba snitojbey sba skʼoplal sok te bin ya jweʼtik sok te bin ya kuchʼtik; te bin mukʼxan skʼoplal jaʼ te ya jpastik te bin toj ta pasel, te lamaluk kʼinal ya kaʼiytik sok te tseʼeluk koʼtantik ta swenta te chʼul espiritue.* 18 Spisil te machʼa jich ya x-abatin ta stojol te Cristo lek ya x-ilot yuʼun te Dios soknix te ants winiketike.

19 Jich yuʼun mame xkomotik ta spasel te bin ya yakʼ lamalkʼinal sok te bintik talel kʼaxel ya yakʼ yip koʼtantike. 20 Mame xa ajinbey yaʼtel te Dios ta skajnax te bin ya aweʼe. Melelnix-a te lek skʼoplal spisil te bintik aye, pero ma lekuk teme ta swentanax te bin ya aweʼe ya awakʼ te ay machʼa ya skʼojchin sba yuʼune. 21 Jaʼ lek te ma xa atiʼ tiʼbal o ma xa awuchʼ vino o biluk-a te ya skʼojchin sba yuʼun te awermano. 22 Te bitʼil ay te schʼuunel awoʼtane, jaʼuknaxme snaʼoj te Diose. Tseʼelme yoʼtan te machʼa maʼyuk bin ya x-albot yoʼtan yuʼun te bin ya sta ta nopel spasele. 23 Pero, teme xchebet yoʼtan te kʼalal ay bin ya sweʼe, la staix smul-abi, melel maba ta swenta schʼuunel yoʼtan te weʼe. Ta melel, spisil te bin ya yichʼ pasel teme ma jaʼuk ta swenta chʼuunel oʼtanil, mulil-abi.