Te lek yachʼil kʼop ya yal te Lucas

1 Bayal machʼatik yilojbeyik ta lek skʼoplal te bintik kʼoem ta pasele —te joʼotiknix ya jchʼuuntik te yuʼun-nix smelelil-ae— 2 jichnix bin-utʼil la yalbotik te machʼatik la yilik te bintik kʼot ta pasel ta sjajchibale soknix te machʼatik abatinik ta yalel te skʼop Diose. 3 Jaʼnix jichon-euk, Teófilo, te mero ichʼbilat ta mukʼe, la jpas tulan ta stʼunbeyel ta lek skʼoplal kʼalalto ta sjajchibal. Jaʼ yuʼun la jta ta nopel te xcholet ya jtsʼibaybat te bintik kʼot ta pasele, 4 yuʼun jich mero ya schʼuun awoʼtan te yuʼun-nix smelelil-a te bintik la awichʼ nojptesel ta kʼop aʼiyeje.

5 Te kʼalal ay ta ajwalil ta skʼinal Judea te Herodes,* ay jtul sacerdote te Zacarías sbiil te ay ta jtsojb sacerdoteetik yuʼun te Abías. Te yiname talem ta stsʼumbal Aarón, Elisabet sbiil. 6 Ta schebalik toj yoʼtanik ta stojol Dios sok schʼuunojik spasel spisil te mantaliletik sok bintik ya xkʼanbotik yuʼun Jehová* te ya skʼan pasele. 7 Pero, maʼyuk yal snichʼanik, melel ma x-alaj te Elisabete, sok ayix yaʼbilalik ta schebalik.

8 Te Zacarías yak ta aʼtel ta stojol Dios sok te sjoʼtak ta sacerdoteil. 9 Jich bitʼil kʼayemik ta spasel te sacerdoteetik, te Zacarías jaʼ kʼot ta swenta schikʼel pom ta chʼul awilal ta templo yuʼun Jehová.* 10 Te kʼalal jaʼ yorail-a te ya yichʼ chikʼel te pome, spisil te ants winiketik yuʼun te lume yakik ta skʼoponel Dios ta yamakʼul te templo. 11 Tey-abi chiknaj jtul chʼul-abat yuʼun Jehová* ta stojol te Zacarías. Tekʼel ta swaʼel te skajtajib schikʼojibal pom. 12 Te kʼalal la yil te chʼul-abate, nijk yoʼtan sok bayal xiw yuʼun. 13 Pero, jich albot yuʼun te chʼul-abate: «Ma xiwat, Zacarías, melel la yaʼiybatix akʼop te Diose. Yame yakʼbat jtul anichʼan te awinam Elisabet, Juan sbiil ya xkʼot awuʼun. 14 Bayalme sbujtsʼ awoʼtan ya ata yuʼun sok tseʼelnaxme awoʼtan, sok bayal machʼatik tseʼel yoʼtan yuʼun te ya x-ayine;* 15 melel mukʼ skʼoplal ya xkʼot yuʼun te Jehová.* Pero, maʼyuk bin-ora ya yuchʼ vino sok yantik tulan uchʼbalil. Te kʼalal ayto ta schʼujt-a te snane,* nojelix ta chʼul espíritu-a.* 16 Yame yakʼ te bayal snichʼnab Israel ya sujtes yoʼtanik ta stojol Jehová* te Dios yuʼunike. 17 Jaʼnix jich yame xnailaj ta yalel te skʼop Diose, jichme yoʼtan sok yip yoʼtan te bitʼil te j-alwanej Elías yuʼun ya sjelbey yoʼtan te meʼil tatiletik jich bitʼil yoʼtan te alnichʼanetike, sok ya yakʼbey snop schʼuunel mantal te jkʼaxunkʼopetik jich bitʼil ya spasik te machʼatik toj yoʼtanike. Jichme ya schajpanbey te Jehová* jpam lum te chapal aye».

18 Te Zacarías jich la yalbey te chʼul-abate: «¿Bin-utʼil ya jnaʼ teme yuʼun-nix smelelil-ae? Melel mamalonix sok ayix yaʼbilal te kiname». 19 Jich albot yuʼun te chʼul-abate: «Joʼon Gabrielon, te tekʼelon ta stojol te Diose, la kichʼ tikunel tal ta atojol yuʼun ya kalbat te lek yachʼil kʼop ini. 20 Pero ilawil, umaʼ ya xjilat sok ma xjuʼ ya xkʼopojat jaʼto te kʼalal ya xkʼot ta pasel spisil ini, melel ma la achʼuun te bin la kalbat te jich ya xkʼot ta pasel ta mero yorail». 21 Te kʼalal jich yak ta kʼoel ta pasel-ae, te Zacarías yak ta maliyel yuʼun te lume sok yakik ta yalel te bin yuʼun te jalajix ta chʼul awilale. 22 Te kʼalal lokʼ tale, ma juʼ yuʼun skʼoponel te ants winiketik yuʼun te lume, jich la snaʼik stojol te ay bin la yil ta najalsitil* ta chʼul awilal. La spas seña ta skʼab swenta ya skʼopon te lume, melel jil ta umaʼ. 23 Kʼalal tsʼakaj te jayeb kʼajkʼal ya x-aʼtej ta templo te Zacariase, bajt ta sna.

24 Cheʼoxeb kʼajkʼal ta patil, te Elisabet la sta yal. Joʼeb u maba lokʼ ta sna yuʼun jich la yal: 25 «Jaʼ jich la spas te Jehová* ta jtojol ta ora ini. La yakʼ sit ta jtojol yuʼun ya slokʼesbon te jkʼexlal ta stojol te ants winiketike».

26 Te kʼalal ayix wakeb u yikʼojix alal-a te Elisabete, te Dios la stikun te chʼul-abat Gabriel ta jpam lum te Nazaret sbiil te ay ta skʼinal Galilea. 27 Bajt yulaʼtay jtul achʼix te mato tabil ta winik te nopol* ya xnujpunix sok jtul winik te José sbiil te talem ta stsʼumbal te Davide. Te achʼixe María sbiil. 28 Kʼalal och bael te chʼul-abat te banti ay te achʼixe, jich la yalbey: «Ya jpatbat awoʼtan, jaʼat te kʼax lek ilbilat yuʼun te Diose; sjokinojat te Jehovae».* 29 Te María chamnax yoʼtan* yuʼun te bin albot yuʼun te chʼul-abate. Bayal la snop ta yoʼtan te bin swentail te jich patbot yoʼtane. 30 Jaʼ yuʼun, jich albot yuʼun te chʼul-abate: «Mame xiwat, María, melel lek ilbilat yuʼun te Diose. 31 ¡Ilawil! Yame awikʼ awal, jichme ya x-ayin* akerem-al, Jesús sbiil ya xkʼot awuʼun. 32 Mukʼme skʼoplal ya xkʼot sok yame sbiilin sNichʼan te Machʼa toyol aye. Te Jehová* Dios yame yakʼbey te smukʼul naktajib te David te jaʼ stat, 33 sok yame x-och ta Ajwalil ta sna te Jacob ta sbajtelkʼinal. Te Wentainel* yuʼune maʼyuk bin-ora ya xlaj skʼoplal».

34 Te María jich la sjojkʼoybey te chʼul-abate: «¿Bin-utʼil ay-a te jich ya xkʼot ta pasele? Melel maʼyuk jokinoj ta wayel jtul winik». 35 Jich albot yuʼun te chʼul-abate: «Yame xjul ta atojol te chʼul espiritue,* yame spotsat ta yaxinal yuʼel te Machʼa toyol aye. Jaʼ yuʼun, te alal ya x-ayine* chʼultesbil ya xkʼot sok sNichʼan Dios ya sbiilin. 36 Ilawil, te Elisabet te ay bin awutoj aba soke, manchukme meʼelix yikʼojix yal-euk. Te Elisabet te naʼbil sba te ma x-alaje, ayix wakeb u te yikʼoj te yale, 37 melel spisil te bin ya yal te Diose yananix xjuʼ yuʼun spasel-a». 38 Jich la yal te Mariae: «Jaʼ j-abaton yuʼun te Jehovae,* jichme akʼa kʼotuk ta pasel ta jtojol te bin la awalixe». Tey-abi bajt te chʼul-abate.

39 Cheʼoxeb kʼajkʼal ta patil, oranax bajt te María ta chʼin lum te ay ta witstikil te ay ta skʼinal Judá. 40 Och ta sna te Zacarías sok kʼot spatbey yoʼtan te Elisabete. 41 Te kʼalal lajeltonax yoʼtan spatbeyel yoʼtane, la stij sba te alal te ay ta schʼujt te Elisabete. Jich te Elisabet noj ta yoʼtan te chʼul espíritu:* 42 «¡Bayal awutsilal ta yolil te antsetike sok bayal yutsilal-euk te alal te ay ta achʼujte! 43 ¿Bin-utʼil ay-a te la jta te majtanil ini, te tal yilon te snan* te Kajwale? 44 Melel te kʼalal la kaʼiy stojol te jul apatbon koʼtane, te alal te ay ta jchʼujte la stij sba sok sbujtsʼ yoʼtan. 45 Tseʼelnaxme awoʼtan-euk te la achʼuun te ya xkʼot ta pasel spisil te bin la yalbat te Jehovae».*

46 Te María jich la yal: «Ya jmukʼubtesbey skʼoplal te Jehová* sok spisil te jkuxlejal. 47 Bayal sbujtsʼ koʼtan ya kaʼiy ta stojol Dios te Jkoltaywanej kuʼune, 48 melel la yil te pekʼel jkʼoplal te j-abaton yuʼune. ¡Ta ora bael ini yame yalbonik yutsil jkʼoplal spisil te kajalkaj tsʼumbaliletik! 49 Melel te Machʼa bayal yuʼele bayal bintik mukʼ spasoj ta jtojol sok chʼultesbil te sbiile. 50 Ta kajalkaj tsʼumbaliletik yame snaʼbey yoʼbolil sba te machʼatik ya xiʼot yuʼune. 51 Bayal bintik spasoj ta swenta te yuʼele sok ya yakʼ xpujkik bael te machʼatik ya stoy sbaike. 52 La slokʼes ta smukʼul naktajibik te machʼatik ay yipike sok la stoyesbey skʼoplal te machʼatik pekʼel yoʼtanike; 53 te machʼatik ayik ta wiʼnale snojesbeyojix schʼujtik ta lekil weʼelil, yan stukel te jkʼulejetike jochol skʼabik la stikun bael. 54 Tal skoltay te Israel te jaʼ j-abat yuʼun, maba chʼay ta yoʼtan 55 te la skʼuxultay te Abrahán sok te stsʼumbal ta sbajtelkʼinal, jich te bitʼil la yalbey ta jamal te antiguo jmeʼ jtatike». 56 Te María ayniwan oxeb u la sjokin te Elisabet. Patil sujt bael ta sna.

57 La sta yorail te ayin* yal te Elisabete, ayin skerem-al. 58 Te kʼalal la snaʼik stojol te spatxujk sok te machʼatik ay bin yutoj sba sok te Elisabet te la yichʼ kʼuxultayel yuʼun te Jehová,* tseʼelnax yoʼtanik sok te Elisabete. 59 Ta swaxakebal kʼajkʼal yayinel-a* te alale la yakʼbeyik yichʼ circuncisión* ta sbakʼetal. Zacarías kʼan yakʼbeyik sbiilin jich te bin-utʼil sbiil te state. 60 Pero, te snan* te alale, jich la yal: «Maʼuk. Juan sbiil ya xkʼot». 61 Jich la yichʼ albeyel: «Maʼyuk jtuluk ta afamilia te jich sbiil-abi». 62 Jaʼ yuʼun la sjojkʼoybeyik te stat te alal ta swenta seña skʼabik te bin sbiil ya xkʼot yuʼun te alale. 63 Te Zacarías la skʼan tal chʼin tabla sok jich la stsʼibay: «Juan sbiil ya xkʼot». Chamnax yoʼtanik* yuʼun ta spisilik. 64 Ta oranax jam ye jich jajch ta kʼop, jajch yalbey yutsil skʼoplal te Diose. 65 Spisil te spatxujke chamnax yoʼtanik* yuʼun; jajch spukbeyik skʼoplal ta spamal witstikil te ay ta skʼinal Judea. 66 Spisil te machʼatik la yaʼiyik ini la skʼej ta yoʼtanik sok jich la sjojkʼoybey sbaik: «¿Binwan yilel ya xkʼot te alal ini?». Melel la snaʼik te jokinbil yuʼun Jehová.*

67 Tey-abi, te stat te alal te jaʼ te Zacarías noj ta yoʼtan te chʼul espíritu* sok jich la yal te albilkʼop ini: 68 «Akʼa yichʼ albeyel yutsil skʼoplal te Jehová,* te Dios yuʼun Israel, melel la snaʼbey yoʼbolil sba te lum yuʼun sok la yakʼ ta libre. 69 La yakʼbotik jtul jkoltaywanej* te bayal yuʼel te talem ta stsʼumbal David te jaʼ j-abat yuʼune 70 —jich te bitʼil yaloj ta swenta te chʼul j-alwanejetik yuʼun ta nameye— 71 swenta ya skoltayotik lokʼel ta skʼab te jkontrataktike sok ta skʼab te machʼatik ya spʼajotike, 72 yuʼun ya snaʼbey yoʼbolil sba te antiguo jmeʼ jtatike sok yuʼun ya xjul ta yoʼtan te chʼul chapbilkʼop yuʼune, 73 jaʼ te bin jamal la yalbey te jtatik Abrahán 74 te kʼalal skoltayojotikix lokʼel ta skʼab-a te jkontrataktike, te ya yakʼbotik te majtanil te ya kichʼtik ta mukʼ te maʼyuk xiwel ya kaʼiytik yuʼune 75 sok te jun koʼtan ya kakʼ jbatik sok te ya jchʼuuntik mantal te jayeb kʼajkʼal kuxulotike. 76 Te jaʼate, chʼin alal, j-alwanej ya xkʼoat yuʼun te Machʼa toyol aye, melel ya xnailajat ta stojol te Jehová* yuʼun ya achajpanbey te beetik yuʼune, 77 yuʼun ya yakʼbey snaʼ te lum yuʼun te ya sta skolelik ta swenta te perdón yuʼun te smulik 78 ta skaj te yutsil skʼuxul yoʼtan te Dios kuʼuntike. Te kʼuxul oʼtanil-abi yame xchiknaj xojobil kʼalalto ta chʼulchan yuʼun ya yakʼbotik sakal kʼinal jich bitʼil te kʼalal ya xlokʼ tal te kʼajkʼale, 79 yuʼun ya sakubtes kʼinal ta stojol te machʼatik ayik ta ijkʼal kʼinal sok ta yaxinal te lajele, jaʼnix jich ya stojobtesotik bael ta sbelal te lamalkʼinal».

80 Mukʼub te alale, la stsakxan yip yoʼtan ta stojol te Diose. Ayin ta jochol takin kʼinal jaʼto kʼalal la sta yorail te la yakʼ sba ta ilel ta stojol te israeletike.