Te lek yachʼil kʼop ya yal te Mateo

2 Te kʼalal ayinemix-a* te Jesús ta Belén ta skʼinal Judea, jaʼ ay ta ajwalil-a te Herodes,* julik chaʼoxtul winiketik* ta Jerusalén te jajchemik tal ta slokʼib kʼajkʼal te ya snaʼik stʼunel te ekʼetike, 2 jich jul sjojkʼoyik: «¿Banti ay te ajwalil yuʼun te judioetik te ayinemixe?* Melel la kilkotik te ekʼ te la yikʼotik tal ta stojol kʼalal ayotik ta slokʼib kʼajkʼal, jaʼ yuʼun talonkotik yuʼun ya jnijan jbatik ta stojol». 3 Kʼalal la yaʼiy stojol-abi te ajwalil Herodes, jajch ta kʼop yoʼtan yuʼun, sok spisil te lum Jerusalén. 4 Jich yuʼun, te ajwalil la stsob spisil te jwolwanej sacerdoteetik sok te escribaetik yuʼun te lume, la sjojkʼoy yaʼiy te banti ya x-ayin* te Cristoe.* 5 Jich la yalik: «Ta Belén ta skʼinal Judea, melel jich la yichʼ tsʼibayel ta swenta te j-alwaneje: 6 ‹Jaʼat, lum Belén te ayat ta skʼinal Judá, mame jaʼukat te jkʼaxel maʼyuk akʼoplal ta stojol te ajwaliletik yuʼun Judá, melel ya xlokʼ tal ta atojol jtul ajwalil te ya swentain te lum Israel kuʼune›», te xchie.

7 Jich yuʼun, te Herodes muken la stikun ta ikʼel te winiketik te ya snaʼik stʼunel te ekʼetike sok la sjojkʼoy yaʼiy te bin-nix-ora chiknaj-a te ekʼe. 8 Tey-abi la stikunlan bael ta Belén sok jich la yalbey: «Baanik sok leaik ta bayuk te alale. Te kʼalal ya ataike, yame sujtex tal yuʼun ya awakʼbonik jnaʼ te banti aye swenta jich ya xbajt kichʼ ta mukʼ-euk». 9 Te kʼalal laj yaʼiybelik te bin la yal te ajwalile, lokʼik bael. Te ekʼ te la yilik te kʼalal ayikto ta slokʼib kʼajkʼal-ae, jaʼ ikʼotik bael yuʼun te bantito ay te alale. 10 Te kʼalal la yilik te tey tejkʼaj-a te ekʼe, bujtsʼan-nax kʼinal la yaʼiyik yuʼun. 11 Te kʼalal ochik ta yutil na, tey la yilik-a te alal sok te snane,* jaʼ te Mariae. Jich yuʼun la skejan sbaik ta stojol sok la snijan sbaik ta stojol. La slokʼesik te majtaniletik te yichʼojike, la yakʼbeyik oro, olíbano sok mirra. 12 Pero albotik yuʼun Dios ta swayichik te manchuk ya sujtikix te banti ay te Herodese, jich yuʼun yan be la stʼunik te kʼalal sujtik ta slumalike.

13 Te kʼalal bajtikix-a te winiketike, chiknaj jtul chʼul-abat yuʼun Jehová* ta swayich te José sok jich albot: «Jajchan, ikʼa bael te alal sok te snane,* anan bael ta Egipto, jilan tey-a jaʼto te bin-ora ya kalbat te ya sujtate, melel te Herodes ya skʼan ya xtal smil te alale». 14 Jich jajch te José, ajkʼabalto-a te la yikʼ bael ta Egipto te alal sok te snane,* 15 tey jilik-a jaʼto te kʼalal laj te Herodese. Jich kʼot ta pasel te bin la yal te Jehová* ta swenta te j-alwanej yuʼune: «La kikʼ lokʼel tal ta Egipto te jnichʼan», te xchie.

16 Kʼalal la snaʼ stojol te Herodes te la yichʼ loʼlayel yuʼun te winiketik-abi, kʼax bayal ilin yuʼun. Jaʼ yuʼun, jich la yalbey ta mantal te j-abatetik yuʼune: «Baanik ta Belén sok ta lumetik te ayik ta sjoyobal, milaik spisil te alal keremetik te aytonax cheb yaʼbilalik o te mato stae». Jaʼ jich la spas ta swenta te la stʼun ta yoʼtan te bin-ora chiknaj te ekʼ te albotik yuʼun te winiketike. 17 Jich kʼot ta pasel te bin albil jilel skʼoplal ta swenta te j-alwanej Jeremías: 18 «Chiknaj tulan aw ta Ramá, tulan okʼel sok tulan mel-oʼtan. Jaʼ te Raquel te yak ta okʼel yuʼun te yalatake; ma skʼan mukʼubtesbeyel kʼinal yaʼiy, melel lajemikix te yalatake», te xchie.

19 Te kʼalal lajemix-a te Herodese, chiknaj jtul chʼul-abat yuʼun Jehová* ta swayich te José te kʼalal ayto ta Egipto-a 20 sok jich albot: «Jajchan, ikʼa bael te alal sok te snane,* sujtan ta lum Israel, melel lajemikix te machʼatik kʼan smilik te alale». 21 Jich jajch te José, la yikʼ bael te alal sok te snane,* sujtik ta lum Israel. 22 Pero, kʼalal la yaʼiy stojol te jaʼ ay ta ajwalil-a te Arquelao te snichʼan Herodes, maba la skʼan och ta Judea, melel tal xiwel ta yoʼtan. Jaʼnix jich albot yuʼun Dios ta swayich te akʼa bajtuk ta skʼinal Galilea. 23 Jil ta nainel ta jpam lum te Nazaret sbiile. Jich kʼot ta pasel te bin yaloj jilel te j-alwanejetike: «Ya x-akʼbot sbiilin Nazareno»,* te xchie.