Sbabial carta yu’un Pedro

4 Jich bitʼil te kʼax swokol te Cristo ta sbakʼetal, akʼa ta awoʼtanik te jichuk snopojibal awuʼunik-euke. Melel te machʼa kʼaxem swokol ta sbakʼetal la yijkitayix jilel te mulile, 2 yuʼun jich maba ya spasix te bin ya smulan te sbakʼetal te jayeb kʼajkʼal kuxul ta kʼinale, jaʼ ya spasbeyix te skʼanojel yoʼtan te Diose. 3 Melel ayix bayal tiempo te la apasbeyik te skʼanojel yoʼtan te jyanlumetik, jaʼ te maʼyukix skʼexlalik ta skʼaxuntayel mantal,* maʼyuk slajib te bin ya skʼan te sbakʼetalik, bayal ya yuchʼik, ya spasik kʼin te jkʼaxel ma stojiluk, ya spasik kʼin yuʼun ya yuchʼik tey-a sok ya yichʼik ta mukʼ lokʼombaetik te ilobtik sba. 4 Yan-nax ya yilik-a te bitʼil maba ya ajokinikix ta spasel te bin ya skʼan te abakʼetalik ta swenta te chopol kuxlejalile, jaʼ yuʼun chopol akʼoplal ya yalbeyex. 5 Pero, te ants winiketik ini yame x-ichʼotik ta kʼop yuʼun te machʼa ya yichʼ ta kʼop te machʼatik kuxulik sok te machʼatik lajemik. 6 Jaʼ swentail te la yichʼik cholbeyel te lek yachʼil kʼop te machʼatik lajemik, manchukme ya yichʼik ichʼel ta kʼop ta chʼichʼbakʼet jich te bin-utʼil ya yichʼik ichʼel ta kʼop te ants winiketike, ya xjuʼ ya xkuxinik jich te bin-utʼil ya xtojobtesotik yuʼun te chʼul espíritu* yuʼun Dios jich te bin-utʼil lek ya yil stukele.

7 Nopol* ya sta yorail te ya xlaj spisil te bintik aye. Jich yuʼun ayukme spʼijil awoʼtanik sok kuxulukme awoʼtanik ta spisil-ora ta skʼoponel te Diose. 8 Te bin tulanxan skʼoplale, jaʼ te talel kʼaxel kʼuxuk xa awaʼiy abaik sok spisil awoʼtanik, melel te kʼuxul oʼtanil ya schʼaybey skʼoplal bayal muliletik. 9 Talel kʼaxel xa awotses abaik ta anaik sok mame xwulwunukex ta kʼop yuʼun. 10 Chikan te bin majtanil awichʼojik ta jujuntule, tuuntesaik yuʼun talel kʼaxel ya awabatin abaik jich te bin-utʼil lekil j-abatex yuʼun te slekil yoʼtan Dios te ma snujpʼuk ya kichʼtik te bayal ta chajp yakʼojbotik kiltike. 11 Teme ay machʼa ya xkʼopoj, jich akʼa kʼopojuk te bin-utʼil machʼa ya yakʼ ta naʼel te bin yaloj te Diose, teme ay machʼa ya yakʼ sba ta abatinel ta stojol yantik, jich akʼa spas te bin-utʼil te machʼa te ay bin ya spas ta swenta yip te Diose, yuʼun jich spisil te bintik ya yichʼ pasele jaʼ ya yichʼ albeyel yutsil skʼoplal te Dios ta swenta te Jesucristoe. Jaʼ yuʼun te utsilal sok ay yuʼel ta sbajtelkʼinal. Jichuk.

12 Kermanotak te kʼuxex ta koʼtan, mame chamuknax awoʼtanik* yuʼun te pruebaetik te yak ta kʼaxel ta atojolik te jich skʼuxul te bin-utʼil te kʼajkʼe, te jich yilel te ma xa anaʼik te bin yak ta kʼoel ta atojolike. 13 Te bin ya skʼan ya apasike, jaʼ te tseʼeluk awoʼtanik te bitʼil pajal yak ta kʼaxel awokolik jich te bin-utʼil kʼax swokol te Cristoe, jaʼnix jich ya ata bayal stseʼelil awoʼtanik sok bayal sbujtsʼ awoʼtanik te kʼalal ya xchiknaj tal te yutsilale. 14 Teme yak sbolkʼoptaybelex ta swenta sbiil te Cristo, tseʼelukme awoʼtanik yuʼun, melel yuʼun ay ta atojolik te chʼul espíritu* yuʼun Dios te ay yutsilale.

15 Jaʼ yuʼun mame ayuk machʼa ya xkʼax swokol ta skaj milaw, elekʼ, spasel chopol aʼtelil o te ya schʼik sba-a te banti ma swentauke. 16 Pero, teme ay machʼa ya xkʼax swokol ta skaj te ya schʼuun te Cristo, mame xkʼexaw yuʼun; jaʼ lekxan te akʼa yalbey yutsil skʼoplal te Dios ta swenta te ya schʼuun te Cristo. 17 Melel jaʼ yorailix te tiempo te albil skʼoplal yuʼun jich jaʼ nail ya xjajch ta ichʼel ta kʼop te sna te Diose. Pero, teme jaʼ nail ya xjajch ta jtojoltik, ¿bin-utʼil ya xkʼotik ta lokʼel te machʼatik maba ya schʼuunik te lek yachʼil kʼop yuʼun te Diose? 18 «Teme wokol ya sta skolel te machʼa toj yoʼtane, ¿bin ya xkʼot ta stojol te machʼa chopol* sok te machʼa jmulawile?». 19 Jaʼ yuʼun, te machʼatik ayik ta wokol ta swenta te skʼanojel yoʼtan te Diose akʼa yakʼ sbaik ta skʼab te Jpaswanej te jun yoʼtan te kʼalal yakik ta spasel te bin leke.