Carta yuʼun Santiago

5 Aʼiya awaʼiyik, jaʼex jkʼulejetik; okʼetaya abaik sok mela awoʼtanik ta swenta te wokoliletik ya xtal ta atojolike. 2 Kʼaʼix te akʼulejalike sok ochix sjochʼol te akʼuʼ apakʼike. 3 Chuxubix* te oro sok te plata awuʼunike, te bitʼil chuxubenixe jaʼme ya yalbeyex te ma lek akʼoplalik sok jaʼme ya sweʼbeyex te abakʼetalike. Spisil te bin atsobojike jichme ya xkʼot te bin-utʼil kʼajkʼ te kʼalal nopolix-a* te slajibal kʼajkʼale. 4 Ilawilik, yak ta aw ta atojolik te stojol skʼab te machʼatik la stsobeyik sit te awal tsʼunubiletik awuʼunik ta akʼinalik, jaʼnix jich te yawik te j-aʼteletik te yakik ta skʼanel koltayele, kʼotix ta schikin te Jehová* te jwolwanej yuʼun te soldadoetike.* 5 Bayal amulanojbeyik yutsilal te akʼulejalik ta balumilal sok jaʼ baem ta awoʼtanik spasel te bintik mulantik sba ta balumilale. Te awoʼtanike jich kʼoem te bin-utʼil chambalametik te ya yichʼ jujpʼtesel jaʼto te kʼalal ya sta skʼajkʼalel te ya yichʼ milele. 6 La alebeyik smul sok la amilik te machʼa toj yoʼtane. Maʼyuk bin la yal te kʼalal jich la apasbeyike.

7 Jaʼ yuʼun, kermanotak, lamalukme awoʼtanik ta smaliyel jaʼto te kʼalal liʼ ayix-a* te Kajwaltike. Ilawilik, te jtsʼunbajel lamal yoʼtan ya smaliy te kʼalal ya sitin te yawal tsʼunube jaʼto teme tal te jaʼal te mato yorailuk sok te kʼalal mero yorailix-ae. 8 Jaʼnix jichex lamalukme awoʼtanik; junukme awoʼtanik, melel nopolix* te skʼajkʼalel* te Kajwaltike.

9 Kermanotak, mame talel kʼaxel xa alebey aba amulik swenta jich maba ya awichʼik ichʼel ta kʼop. Ilawilik, te Juez tekʼelix ta tiʼnail. 10 Kermanotak, jaʼ xa akʼayinbeyik stalel te j-alwanejetik te kʼopojik ta swenta sbiil te Jehová,* te kujch yuʼunik te swokolik sok te lamalnax yoʼtanik la smaliyike. 11 Ilawilik, bayalme yutsilik te machʼatik kujch yuʼunik te swokolike. Awaʼiyojbeyik skʼoplal te kujch yuʼun te Jobe sok te bin-utʼil akʼbot bendición yuʼun Jehová* ta patil, jich yuʼun anaʼojik te bayal kʼuxotik ta yoʼtan te Jehová* sok te ya snaʼ yoʼbolil jbatike.

12 Kermanotak, te bin tulanxan skʼoplale, jaʼ te manchuk ya awakʼik ta testigo te chʼulchan o te balumilal o bilukxan yantik. Jaʼ lekxan te jich ya apasike, teme «yak» xchiexe, yuʼun-nanix yak-abi; teme «maʼuk» xchiexe, yuʼun-nanix maʼuk-abi, yuʼun jich ma xa awichʼik ichʼel ta kʼop-a.

13 ¿Aybal machʼa ay swokol ta awolilik? Mame skom sba ta skʼoponel Dios. ¿Aybal machʼa te tseʼel yoʼtane? Akʼa skʼayojtay salmoetik. 14 ¿Aybal machʼa ay ta chamel ta awolilik? Akʼa yikʼ tal te ancianoetik ta congregación yuʼun ya xkʼoponbot Dios yuʼun, akʼa sjaxbeyik aceite ta stojol ta swenta sbiil te Jehová.* 15 Teme sok schʼuunel yoʼtanik ya skʼoponik Dios, jich ya xlekub te machʼa ay ta chamel* sok yame xjachot yuʼun te Jehová.* Jaʼnix jich, teme ay spasoj mulil, yame xpasbot perdón yuʼun.

16 Jich yuʼun, talel kʼaxel albeya abaik ta jamal te amulike sok talel kʼaxel kʼoponbeya abaik Dios, yuʼun jich ya xlekubex-a. Te machʼa toj yoʼtan te ya skʼanbey wokol te Diose bayal bin lek ya xkʼot ta lokʼel yuʼun. 17 Jich bitʼil te Elías te pajal chʼichʼbakʼetotik soke, jich la yaʼiy sba-euk te bin-utʼil ya kaʼiy jbatike, manchukme jich-abi te kʼalal la skʼopon Dios sok spisil yoʼtan te manchuk ya xtal jaʼale, jich maba tal jaʼal ta balumilal oxeb jaʼbil sok olil. 18 Patil la schaʼkʼopon te Diose, jich tal jaʼal sok la yakʼ sit te awal tsʼunubil ta balumilale.

19 Kermanotak, teme ay jtul ta awolilik te ya yijkitay te smelelil kʼop, pero te ay machʼa ya yikʼ sujtel tal, 20 naʼaikme te machʼauk-a te ya yikʼ sujtel tal jtul jmulawil te jowijem ta bee yame skoltay lokʼel tal ta lajel sok jaʼ ta swenta te ya schʼay te smule.