Te lek yachʼil kʼop ya yal te Marcos

12 Te Jesús jajch yalbeyxan skʼoplal lokʼombakʼopetik. Jich la yal: «Ay jtul winik te la stsʼun tsʼusub ta skʼinal sok la sjoy ta tsʼajkʼ. Jaʼnix jich la sjokʼ te banti ya yichʼ pitsʼel te yaʼlel te tsʼusube sok la spas toyol yilojibal kʼinal. Ta patil la yakʼbey jilel skanantay te j-aʼteletike, jich bajt ta yan lum. 2 Ta yorail stulbeyel sit te tsʼusube la stikun jtul j-abat yuʼun ta stojol te j-aʼteletik swenta ya skʼanbey tal te bin ya yichʼ-euke. 3 Pero, te j-aʼteletik la stsakik te j-abate, bayal la smajik, maʼyuk bin la yakʼbeyik bael. 4 Te yajwal te tsʼusubiltike la schaʼtikun yan j-abat yuʼun. Jaʼ ini la yejchentesbeyik sjol sok jkʼaxel ma la yichʼik ta mukʼ. 5 La schaʼtikun yan j-abat, la smilik stukel. La schaʼtikun bayalxan j-abatetik; ay chaʼoxtul te bayal la smajik sok ay yantik te la smilike. 6 Aytoxan te machʼa la stikune, jaʼ te snichʼan te kʼax kʼux ta yoʼtane, jaʼ te slajibal te machʼa la stikun baele, melel jich la yal ta yoʼtan: ‹Ya yichʼbonik ta mukʼ stukel te jnichʼane›. 7 Pero, te j-aʼteletik jich la yalbey sbaik: ‹Jaʼ te machʼa ya yichʼ jilel spisil te kʼinale. Akʼa jmiltik, jichme ya kichʼbeytik spisil te bin ay ta swentae›. 8 Jich yuʼun la stsakik, la smilik sok la slokʼesik bael te banti ay te tsʼusubiltike. 9 ¿Bin ya spas te yajwal te tsʼusubiltike? Yame xtal smil te j-aʼteletik sok yame yakʼbey jilel ta skʼab yantik j-aʼteletik te tsʼusubiltike. 10 ¿Yuʼunbal jkʼaxel maʼyuk akʼoponojik ta sJun Dios te jich tsʼibaybile: ‹Te ton te la spʼajik te jpasnaetike jaʼ te mukʼul ton te ya yakʼbey yiptajib te sjol na›? 11 ¿Yuʼunbal maʼyuk akʼoponojik: ‹Jaʼ ini talem ta stojol te Jehová* sok bayal yutsil ya kiltik›, te xchie?».

12 Te kʼalal la snaʼik stojol te skontratak te Jesús te jaʼ skʼoplalik te lokʼombakʼope, kʼan stsakik, pero la xiʼik te ants winiketik yuʼun te lume. Jich la yijkitayik jilel, bajtik.

13 Tey-abi la stikunik chaʼoxtul fariseoetik sok chaʼoxtul winiketik yuʼun te Herodes yuʼun ya slebeyik smul te Jesús ta swenta te bin ya yale. 14 Te kʼalal kʼotike, jich la yalbeyik te Jesús: «Maestro, jnaʼojkotik te spisil-ora ya awal te bin smelelile sok te ma jaʼuk ya ale te lek ya yilat te yantike, melel ma jaʼuknax ya awil te bin yilelike, smelelil te bin ya awakʼ ta nopel ta swenta te Diose. ¿Stojilbal teme ya jtojbeytik jpatantik* te César, o maʼuk? 15 ¿Yabal skʼan ya jtojtik, o maʼuk?». Pero, kʼalal te Jesús la yil te chaʼlam yoʼtanike,* jich la yaltiklanbey: «¿Bin yuʼun te ya apasonik ta pruebae? Ichʼbonik tal jun denario* yuʼun ya kil». 16 Jich la yichʼbeyik tal sok jich la sjojkʼoy: «¿Machʼa slokʼomba ini sok machʼa sbiil te liʼ tsʼibaybile?». «Jaʼ te César», xchiik. 17 Jaʼ yuʼun, jich la yal te Jesús: «Akʼbeyaik te César te bin jaʼ yuʼun César, pero akʼbeyaik te Dios te bin jaʼ yuʼun te Diose». Chamnax jilel yoʼtanik* yuʼun.

18 Tey-abi talik te saduceoetik —te ya yalik te maʼyuk chaʼkuxajele—, jich la sjojkʼoybeyik te Jesuse: 19 «Maestro, te Moisés la stsʼibaybotik jilel, teme ay jtul winik te ya xlaj te sbankile teme maʼyuk jilel yal snichʼnab sok te yiname, te winik ini yame skʼan ya yinamin te yinam te sbankile, yuʼun jich ya yakʼbey stsʼumbal te sbankil te laje. 20 Ay juktul winiketik te jun-nax te smeʼ statike. Te bankilale la sta yinam, pero maʼyuk jilel snichʼan te kʼalal laje. 21 Te schebale la yikʼbey te yinam te sbankile. Jaʼnix jich laj, pero maʼyuk jilel snichʼan; jichnix kʼot ta stojol te yoxebale. 22 Ta sjuktulul maʼyuk jilel yal snichʼnabik. Patil lajik bael ta spisilik, jaʼnix jich laj-euk te antse. 23 Ta yorail chaʼkuxajel, ¿machʼa ta sjuktulul ya yikʼ yinamin te antse? Melel ta sjuktulul la yinaminik». 24 Jich albotik yuʼun te Jesús: «Te bin yuʼun te chʼayemexe, jaʼ yuʼun te maba ya anaʼik te bin ya yal te sJun Diose sok te bin-utʼil ay te yuʼel te Diose. 25 Te kʼalal ya xchaʼkuxajik tal ta yolil te machʼatik lajemike, te winiketik maba ya xnujpunikix, te antsetik maba ya x-akʼotikix ta nujpunel, melel jich ya xkʼotik te bitʼil chʼul-abatetik te ayik ta chʼulchane. 26 Pero, ta swenta te ya yichʼik chaʼkuxajtesel te machʼatik lajemike, ¿yuʼunbal maʼyuk akʼoponojik ta libro yuʼun Moisés te kʼalal kʼoponot yuʼun Dios ta jpejt* chʼix te jich albot yuʼune: ‹Joʼon Dioson yuʼun te Abrahán, joʼon Dioson yuʼun te Isaac sok joʼon Dioson yuʼun te Jacob›, te xchie? 27 Te Diose ma jaʼuk Dios yuʼun te machʼatik lajemike, jaʼ Dios yuʼun te machʼatik kuxulike. Te jaʼexe chʼayemex ta jkʼaxel».

28 Ay jtul escriba te la yaʼiy stojol te bin yakik ta yalele. Kʼalal la yil te mero la snaʼ sutel te Jesuse, jich la sjojkʼoybey: «¿Bin mantalil te mukʼxan skʼoplal ta spisil te mantaliletike?». 29 Te Jesús jich la yal: «Te sbabiale jaʼ ini: ‹Aʼiya awaʼiy Israel, te Jehová* te Dios kuʼuntik jtulnax te Jehová.* 30 Kʼuxukme xa awaʼiy ta awoʼtan te Jehová* te Dios awuʼun ta spisil awoʼtan, ta spisil akuxlejal, ta spisil apʼijil sok ta spisil awip›. 31 Te schebal mantalil jaʼ ini: ‹Kʼuxukme xa awaʼiy ta awoʼtan te apatxujk jichnix te bin-utʼil kʼux ya awaʼiy aba te jaʼate›. Maʼyuk yan mantalil te mukʼxan skʼoplal jich bitʼil te cheb ini». 32 Jich albot yuʼun te escribae: «Mero lek la asut, Maestro, smelelil te bin la awale: ‹Jtulnax te Diose, maʼyuk yan›. 33 Sok te bitʼil kʼux ya kaʼiytik ta spisil koʼtantik, ta spisil jpʼijiltik sok ta spisil kiptik sok te kʼuxuk ya kaʼiy ta koʼtantik te jpatxujktik jichnix te bin-utʼil kʼux ya kaʼiy jbatike, jaʼ mukʼxan skʼoplal ta spisil te chikʼbil majtaniletik sok te milbil majtaniletik». 34 Te kʼalal la yil te Jesús te sok spʼijil yoʼtan la sute, jich la yalbey: «Maba namal* ayat ta banti te Wentainel* yuʼun te Diose». Jich maʼyuk bin la skʼan la sjojkʼoybeyikix-a te Jesuse.

35 Te kʼalal yak ta nojpteswanej ta templo-a te Jesús, jich la sjojkʼoy: «¿Bin-utʼil ay-a te ya yalik te escribaetik te jaʼ snichʼan David te Cristoe? 36 Ta swenta chʼul espíritu* jaʼnix te David jich la yal: ‹Te Jehová* jich la yalbey te Kajwale: «Naklan ta jwaʼel kʼab jaʼto te kʼalal ya kakʼbat ta yeʼtal awok te akontratak», te xchie›. 37 Jaʼnix te David la yalbey Kajwal; jich yuʼun, ¿bin-utʼil ay-a te jaʼ snichʼane?».

Te ants winiketik te bayalik tey-ae la smulanik yaʼiyel te bin la yale. 38 Te kʼalal yak ta nojpteswanej-ae, jich la yaltiklanbey: «Kanantayame abaik yuʼun te escribaetik te ya smulanik te ya yakʼ sbaik ta ilel sok te snajtil kʼuʼik sok te ya smulanik te ya yichʼik patbeyel yoʼtanik ta mercado, 39 soknix ya xnajkajik ta sjajchibal lugaretik ta sinagogaetik. Jaʼnix jich, te kʼalal ya xbajtik ta kʼine, jaʼ ya smulanik smakel te lugaretik te banti ya xnajkajik te machʼatik ichʼbilik ta mukʼe. 40 Ya spojbeyik te bintik ay yuʼun* te meʼba antsetik sok jalnax ya skʼoponik Dios yuʼun-nax ya yakʼ sbaik ta ilel. Ta swenta-abi yame yichʼik tulan castigo».

41 Te Jesús la snajkan sba ta jun lugar te banti ya xchiknaj ta ilel te cajaetik yuʼun smajtan Dios. Jajch yil te ya yotses stakʼinik tey-a te ants winiketike; bayal jkʼulejetik la yotsesik bayal stakʼinik tey-a. 42 Tal jtul meʼba ants te maʼyuk bin ay yuʼun, la yotses chaʼsejp chʼin takʼin te maʼyuk bintik lek ya yichʼix manel-ae.* 43 La yikʼ tal te jnopojeletik yuʼune sok jich la yaltiklanbey: «Jamal ya kalbeyex, te meʼba ants ini te maʼyuk bin ay yuʼune, jaʼ kʼaxtoxan la yakʼ ta scajail smajtan Dios te bitʼil te yantike, 44 melel spisil te yantike jaʼ ya yakʼik te bin sobrailix yuʼunike; yan stukel te meʼba ants te jkʼaxel maʼyuk bin ay yuʼune spisil la yakʼ te bin ay yuʼune».