Sbabial carta yu’un Pedro

2 Jich yuʼun ijkitayaik spasel spisil ta chajp chopolil, loʼlaywanej, chaʼlam-oʼtanil,* bikʼtal oʼtanil sok spisil ta chajp leaw ta kʼop. 2 K’anaik te lekil leche yuʼun te skʼop Dios jich te bin-utʼil alaletik te ayinelikto,* yuʼun jichme ya xmukʼubex ta swenta te akolelike, 3 jaʼnax teme awilojikix te slekil yoʼtan te Kajwaltike.

4 Te k’alal yakex ta noptsajel* ta stojol —te kuxul ton te la yichʼ p’ajel yuʼun te ants winiketik, pero te tsabil yuʼun te Dios sok te bayal skʼoplal ta yoʼtan—, 5 jaʼexnix yakex ta tsʼakel moel jich te bin-utʼil kuxul tonetik yuʼun ya xkʼoex bitʼil jun na ta swenta te chʼul espíritu,* yuʼun jich chʼul sacerdote ya xkʼoex sok jich ya awakʼik milbil majtaniletik ta swenta chʼul espíritu te lek ya yil te Dios ta swenta te Jesucristo. 6 Melel jich ya yal te sJun Dios: «¡Ilawilik! Ya kakʼ ta Sion jun ton te tsabile, jaʼ te mukʼul ton te ya yakʼbey yiptajib te xujk na te mukʼ skʼoplale, te machʼa ya yakʼ schʼuunel yoʼtan ta stojol maba ya xjil ta kʼexlal yuʼun».

7 Ta skaj te bitʼil jchʼuunjelexe bayal skʼoplal ya awilik, yan stukel te machʼatik maba ya schʼuunik jich tsʼibaybil ta stojolik: «Manchukme te jpasnaetik la spʼajik te ton, jaʼnanix kʼot ta mukʼul ton-a te ya yakʼbey yiptajib te sjol nae», 8 sok «ton yuʼun kʼojchinojibal sok mukʼul ton te ya xyalteswan». Ya skʼojchin yokik, melel maba ya schʼuunik te skʼop Diose. Jichnix ya xkʼot ta stojolik te ya skʼojchin yokike. 9 Pero, te jaʼexe «jaʼ jchajp tsʼumbalilex te awichʼojik tsael, sacerdote ya xkʼoex te ya x-aʼtejex jich te bin-utʼil ajwaliletik, chʼul lum ya xkʼoex sok jpam lum yuʼun Dios ya xkʼoex, yuʼun jich ya apukbeyik skʼoplal ta bayuk te tʼujbil yutsilal»* te machʼa la yikʼex lokʼel tal ta ijkʼal kʼinal yuʼun la yakʼex ta sakal kʼinal te bayal yutsilale. 10 Melel te jaʼexe maba lumex yuʼun Dios ta nailalto tal, pero ta ora ini jaʼex lumex yuʼun te Diose; ta nailalto maba la awichʼik naʼbeyel yoʼbolil abaik, pero ta ora ini la awichʼikix naʼbeyel yoʼbolil abaik.

11 Kermanotak te kʼuxex ta koʼtan, ya jkʼanbeyex wokol jich te bin-utʼil jyanlumex sok jbeomex ta kʼinal te mame xa apasik te bintik ya smulan spasel te abakʼetalik te jaʼ ya skontrainexe. 12 Lekukme atalelik ta stojol te yantik nacionetik, yuʼun jich te kʼalal ya slebeyex amulik, jaʼnix ya yilik te lek te awaʼtelike, te bin ya xkʼot ta lokʼel jaʼ te ya yalbeyik yutsil skʼoplal te Dios te kʼalal ya xtal ta ilawe.

13 Ta swenta te Kajwaltik akʼa abaik ta wentainel yuʼun spisil te machʼatik yichʼoj yaʼtelik ta balumilal, chikan teme ajwalil te yichʼoj mukʼ yaʼtel, 14 o chikan teme gobernadoretik, te jaʼ tikunbilik yuʼun ya yakʼbeyik castigo te machʼatik ya spasik te bin chopol* sok te ya yalbeyik lek skʼoplal te machʼatik ya spasik te bin leke. 15 Melel te skʼanojel yoʼtan Dios, jaʼ te ya amakbeyik ye te machʼatik ma snaʼik kʼinal te chikan-nax bin ya yalik te kʼalal ya apasik te bin leke. 16 Jichuk ya xkuxinex te bin-utʼil machʼatik ayik ta libre, pero jich bitʼil te libre ayexe maba ya skʼan ya yal te ya xjuʼ ya apasik te bin chopole,* jaʼ lekxan te j-abatex yuʼun Dios ya xkʼoexe. 17 Ichʼaik ta mukʼ spisil te ants winiketik, kʼuxme xa awaʼiy ta awoʼtanik spisil te awermanotakik te pajal schʼuunel awoʼtanik soke, xiʼaik* te Dios sok ichʼaik ta mukʼ te ajwalile.

18 Te mosoetik akʼa yakʼ sbaik ta wentainel yuʼun te yajwalik jich te bitʼil ya skʼanik ichʼel ta mukʼe, mame jaʼuknax ta stojol te machʼatik lek yoʼtanik sok te machʼatik ma jaʼuk ya yakʼik ta chʼuunel te bin ya yalike, jaʼnix jich ta stojol te machʼatik tulan yoʼtanike. 19 Melel teme ay machʼa ya stsʼijk yuʼun te kontrainel yuʼun te ants winiketik sok teme yak ta kʼaxel swokol ta swenta te ya schʼuunbey smantal te Diose, lek ya x-ilot yuʼun Dios ta swenta te bin lek ya spase. 20 Pero, teme ta skaj amulik ya awichʼik majel, ¿bin awutsilalik ya ataik teme ya stsʼijk awuʼunik te awokolike? Yan stukel teme ya stsʼijk awuʼunik te awokolik ta skaj te lek te bin ya apasike, jaʼ-abi kʼax lek yoʼtan yuʼun te Diose.

21 Ta melel, jaʼ swentail te la awichʼik ikʼele, melel jaʼnix te Cristo te kʼax swokol ta atojolike, jich la yakʼbeyex jilel awilik te bin-utʼil ta tʼunel te ejemplo yuʼune. 22 Maba la sle smul stukel sok maʼyuk la yaʼiy loʼlaywanej. 23 Te kʼalal yak ta bolkʼoptayel-ae, maba la sutbey te sbolkʼopike, te kʼalal yak ta kʼaxel swokol-ae, maʼyuk bin chopol* la yal yuʼun jich ya skoltay sba-a. Te bin la spase, jaʼ te la yakʼ sba ta skʼab te machʼa toj ya x-ichʼawan ta kʼope. 24 Jaʼnix la skuchbotik te jmultik ta sbakʼetal ta teʼ yuʼun jich ya kichʼtik koltayel lokʼel ta swenta te mulile, yuʼun jich ya jpastik te bin stojil ta pasele. «Jaʼ ta swenta te yejchen te lekubexe». 25 Melel te jaʼexe jichex-a te bin-utʼil tuminchijetik te jowijemike, pero ta ora ini sujtemexix tal ta stojol te jkanan sok te machʼa ya skanantaybeyex te akuxlejalike.