Te lek yachʼil kʼop ya yal te Mateo

11 Te kʼalal laj yoʼtan te Jesús ta yakʼbeyel mantalil te 12 ta tul jnopojeletik yuʼune, bajt ta yantik mukʼul lumetik ta pʼijubteswanej sok ta scholel skʼop Dios.

2 Te kʼalal chukul-a te Juan J-akʼ-ichʼjaʼe, la yaʼiy stojol te aʼtelil yak ta spasel te Cristoe, jaʼ yuʼun la stikun te jnopojeletik yuʼun 3 ta sjojkʼoybeyel te Jesuse: «¿Jaʼatbal te machʼa albil skʼoplal te ya xtale, o yabal jmaliytik yan?». 4 Jich la yal te Jesús: «Baanik sok cholbeyaik yaʼiy te Juan te bin yakex ta yilel sok ta yaʼiyel stojole: 5 ya yilikix kʼinal te machʼatik ma xyilik kʼinal-ae, ya xbeenikix te koxoetik, lekubenikix te machʼatik yichʼojik kʼaʼel chamele, ya yaʼiyikix kʼop te kojkchikinetik, la yichʼikix chaʼkuxajtesel te machʼatik lajemike sok ya yichʼikix cholbeyel te lek yachʼil kʼop te pobreetike. 6 Tseʼelnaxme yoʼtan te machʼa maba xchebet yoʼtan* ta jtojole».

7 Te kʼalal sujtik bael te jnopojeletik yuʼun te Juane, te Jesús jajch scholbey yaʼiy te ants winiketik ta swenta te Juane. Jich la yal: «¿Bin lokʼ awilik ta jochol takin kʼinal? ¿Jaʼbal jalal* te ya xyukʼilanot yuʼun te ikʼe? 8 Jich yuʼun, ¿bin lokʼ awilik? ¿Jaʼbal jtul winik te slapoj lekil pakʼe? ¡Anaʼojik te ayik ta sna ajwaliletik te machʼatik ya slapik fino pakʼe! 9 Jich yuʼun, ¿bin lokʼ awilik jiche? ¿Jaʼbal jtul j-alwanej? Ta melel, kʼaxemtoxan jich bin-utʼil jtul j-alwanej. 10 Jaʼ te machʼa jich tsʼibaybil jilel skʼoplale: ‹¡Ilawil! ¡Yame jtikun te machʼa ya yal te jkʼop te ya xnailaj ta atojole, jaʼme ya xnailaj ta atojol yuʼun ya schajpanbat te abee!›, te xchie. 11 Jamal ya kalbeyex te maʼyuk jtuluk winik ta yolil te ants winiketik te jich akʼbil mukʼ yaʼtel te bin-utʼil te Juan J-akʼ-ichʼjaʼe. Pero, te machʼa pekʼel yaʼtel ya xkʼot ta Wentainel* yuʼun te chʼulchane, jaʼ toyolxan yaʼtel ya xkʼot te bitʼil te Juane. 12 Jaʼto tal ta skʼajkʼalel te Juan J-akʼ-ichʼjaʼe, te ants winiketik yakik ta spasel tulan yuʼun ya x-ochik ta Wentainel* yuʼun te chʼulchane. Te machʼatik yakik ta spasel tulane, yame xkʼot staik. 13 Melel te J-alwanejetik sok te Leye la yalik albilkʼopetik te smakojbey skʼoplal jaʼto ta skʼajkʼalel te Juane. 14 Chikan teme ya achʼuunik o maʼuke, ‹te Elías te albil skʼoplal ya xtale›, jaʼ te Juane. 15 Te machʼa ay schikine, akʼame schʼam yaʼiy ta lek te kʼope.

16 »¿Machʼa ya jpajbey skʼoplal sok te jkaj tsʼumbalil ini? Jaʼ jich kʼoemik te bin-utʼil te chʼin achʼix keremetik te nakalik ta yolil mercado te jich ya yawtayik te sjoʼtak ta tajimal: 17 ‹La jkokʼesintik amay* ta atojolik, pero maba la awaʼiyik ajkʼot; la jkʼayojtaytik kʼayojil yuʼun mel-oʼtan, pero maba la awakʼik ta ilel te ya amel awoʼtanik yuʼune›. 18 Te kʼalal jul te Juane, maba weʼ uchʼaj jich bin-utʼil te yantike, pero te ants winiketik jich ya yalik ta stojol: ‹Ay pukuj ta yoʼtan›. 19 Te kʼalal jul-euk te sNichʼan te Winik* te ya xweʼ x-uchʼaj stukele, te ants winiketik jich ya yalik ta stojol: ‹¡Ilawilik! Bayal ya xweʼ sok ya yuchʼ vino, jaʼ yamigotak te jkʼanpatanetik sok te jmulawiletike›. Manchukme jich ya yalik-abi, ya xchiknaj ta ilel te ay pʼijil oʼtanil te kʼalal ya yichʼ pasel te bin toj ta pasele».

20 Tey-abi, te Jesús jich jamal la yalbey te mukʼul lumetik te banti bayal milagroetik la spase, melel maba sujtesoj yoʼtanik: 21 «¡Yame awil awokol, Corazín! ¡Yame awil awokol, Betsaida! Te teyuk la yichʼ pasel ta Tiro sok ta Sidón te milagroetik la yichʼ pasel ta atojolike, la slapik chʼixal pakʼ* sok la snajkan sbaik ta tan yuʼun ya sujtes yoʼtanik te jichuke. 22 Jamal ya kalbeyex: ta Skʼajkʼalel ichʼel ta kʼop* kʼaxtoxan ya awil awokolik te bin-utʼil te Tiro sok te Sidón. 23 Jaxan te jaʼat, Capernaúm, ¿yuʼunbal ya akuy te ya stoyesat moel te Dios kʼalalto ta chʼulchan? Maʼuk, yame stikunat bael kʼalalto ta Mukenal.* Te teyuk la yichʼ pasel ta Sodoma te milagroetik la yichʼ pasel ta atojole, maniwan la yichʼ lajinel te jichuke. 24 Jamal ya kalbeyex: ta Skʼajkʼalel ichʼel ta kʼop* kʼaxtoxan ya awil awokol te bin-utʼil te Sodoma».

25 Ta yorail-abi, jich la yal te Jesuse: «Jtat, ya kalbat yutsil akʼoplal ta komonsitil, jaʼat te Ajwalilat yuʼun chʼulchan sok balumilal, melel anakʼoj te nojptesel ini ta stojol te machʼatik pʼijike, jaʼ la awakʼbey snaʼ te machʼatik alaletik kʼoeme. 26 Jich, jTat, melel jich ya skʼan awoʼtan te jich ya yichʼ pasele». 27 Te Jesús jich la yalxan: «Te jTate yakʼojbon ta jkʼab spisil te bintik aye. Maʼyuk machʼa ya snaʼbon jba ta lek te jaʼ Nichʼanilone, jaʼnax te jTate. Sok maʼyuk machʼa ya snaʼbey sba ta lek te jTate, joʼon-nax jtukel sok te jayeb machʼatik ya jkʼan ya kakʼ snaʼbey sbae. 28 Laʼik ta jtojol apisilik, jaʼex te tulan ya x-aʼtejex sok te bayal awijkatsik, joʼon ya kakʼbeyex akux awoʼtanik. 29 Jaʼ xa awichʼbonik te yugo-teʼ* kuʼune sok nopbonik jtalel, melel manso koʼtan sok pekʼel koʼtan. Jichme ya kakʼbeyex akux awoʼtanik. 30 Melel maba al ta kuchel te yugo-teʼ* kuʼune sok maba al te ijkatsil kuʼune».