Carta ta stojol te Filipenseetik

2 Jich yuʼun, teme ya xjuʼ ya awakʼik smukʼul oʼtanil ta swenta te Cristo, teme ay machʼa ya xjuʼ ya awakʼbeyik smukʼul kʼinal yaʼiy sok kʼuxul oʼtanil, teme ya ajokin abaik sok te awermanotakike sok teme ya awakʼik ta ilel kʼuxul oʼtanil sok te ya anaʼbeyik yoʼbolil sbaik te yantike, 2 akʼbonik stseʼelil koʼtan te kʼalal ya awakʼik ta ilel te pajal te snopojibal awuʼunik sok te pajal te skʼuxul awoʼtanike, te junuknax ayex sok te junuknax te snopojibal awuʼunike. 3 Mame ayuk bin ya apasik ta swentanax sjachel kʼop o te yuʼun-nax ay bin ya skʼan awoʼtanik ta atukelike, jaʼ lekxan te pekʼel ya awakʼ abaik sok te ya anopik te jaʼ mukʼxan skʼoplal te yantik te bin-utʼil te jaʼexe, 4 mame atukeliknax ya ale awutsil alekilalik, jaʼme xa alebeyik yutsil slekil te yantike.

5 Jichuk snopojibal awuʼunik te bin-utʼil la yakʼ ta ilel te Cristo Jesús, 6 manchukme jich yilel-a te bin-utʼil te Diose, maʼyuk bin-ora la snop te jich pajal ya xkʼot te bin-utʼil te Diose. 7 Maʼuk, te bin la spase, jaʼ te la yijkitay jilel spisil te bintik ay yuʼune sok la yakʼ sba ta abatinel te jich kʼot te bin-utʼil jtul ants winik. 8 Te kʼalal kuxin jich te bin-utʼil jtul winik, la spejkʼan sba sok la schʼuun mantal jaʼto te kʼalal laje, jich, jaʼ te la yichʼ jijpanel ta teʼ yuʼun wokolil.* 9 Jaʼ swentail te toyesbot yaʼtel yuʼun te Diose, jaʼnix jich sok slekil yoʼtan la stoyesbey skʼoplal te sbiil ta stojol spisil te yantik biililetike. 10 Yuʼun jich ta swenta sbiil te Jesús ya skejan sbaik ta stojol spisil te machʼatik ay ta chʼulchan, ta balumilal sok ta yeʼtal te balumilal 11 sok spisil te ants winiketik akʼa yalik ta komonsitil te jaʼ Kajwaltik te Jesucristo, yuʼun jich ya yichʼ albeyel yutsil skʼoplal te jTatik Diose.

12 Jich yuʼun, kermanotak te kʼuxex ta koʼtane, jich te bin-utʼil spisil-ora achʼuunojik mantale —ma jaʼuknax te kʼalal jokinojex-ae, kʼaxtoxan-a te bitʼil maba jokinojexe—, pasaik tulan ta stael te akolelik ta swenta xiwel sok nijkel. 13 Melel te Diose jaʼnix ya yakʼbeyex awipik swenta ayuk ta awoʼtanik te ya akʼan ya apasik sok te yakuk xjuʼ awuʼunik spasel te bintik lek ya yile. 14 Spisil te bin ya apasike mame sokuk wulwulkʼop sok mame xa atsak abaik ta kʼop, 15 yuʼun jich maʼyuk bin ya awichʼik tabeyel ta alel sok maba ya awichʼik tabeyel amulik te snichʼnabex Dios te maʼyuk amulik ta yolil te jkaj tsʼumbalil te ma lekuk stalel sok te chopole, jich yak ta tilel axojobilik te bin-utʼil sakal kʼinal ta balumilal 16 te kʼalal jun awoʼtanik ta stojol te kʼop te ya yakʼ kuxlejalil. Ta swenta-abi, jichme ay stseʼelil koʼtan ta skʼajkʼalel te Cristo ta swenta te maba tojolnax animajon sok te ma tojoluk te tulan aʼtejone. 17 Manchukme ya kichʼ akʼel jich bin-utʼil malbil majtanil ta sba te milbil majtanil sok te chʼul aʼtelil te apasojik ta swenta te schʼuunel awoʼtanike, tseʼel koʼtan yuʼun sok ya jkʼan te tseʼeluk awoʼtanik ta apisilik-euke. 18 Jaʼnix jich tseʼeluk awoʼtanik yuʼun jich pajal ay stseʼelil koʼtantik.

19 Ta ora ini yakon ta smaliyel teme jich ya skʼan yoʼtan te Kajwaltik Jesús swenta ya jtikun tal ta oranax ta atojolik te Timoteo yuʼun jich ya jta smukʼul koʼtan te kʼalal ya kaʼiy stojol te bin-utʼil ayexe. 20 Melel maʼyuk machʼa yan ay kuʼun te pajal yoʼtan soke, te bin-utʼil ay akʼoplalik ta yoʼtan ta smelelile. 21 Melel spisil te yantike jaʼnax ya sleik yutsil slekilalik, ma jaʼuk te bin ya skʼan yoʼtan te Jesucristo. 22 Pero, te jaʼexe anaʼojik te yakʼoj ta ilel te lek stalele, melel la sjokinon jich bin-utʼil j-abat ta scholel te lek yachʼil kʼope, jich te bin-utʼil ya spas jtul kerem sok te state. 23 Jaʼ swentail te jaʼ ya jkʼan ya jtikun ta atojolik ta oranax te k’alal jnaʼojix-a te bin ya xkʼot ta pasel ta jtojole. 24 Ta melel, ay smukʼul koʼtan ta stojol te Kajwaltik te nopol* ya xbajt kilex-euke.

25 Pero, ta ora ini mukʼ skʼoplal ya kil te ya jtikun ta atojolik te kermanotik Epafrodito, te jaʼ joy ta aʼtel sok te jaʼ soldado yuʼun Cristo, te jaʼexnix la atikunik tal ta jtojol yuʼun ya skoltayon ta swenta te bintik ya xtuun kuʼune. 26 Yoʼtanuk ya skʼan ya yilex ta apisilik sok ay ta mel-oʼtan ta skaj te la awaʼiyik stojol te ay ta chamele. 27 Ta melel, tsakot ta tulan chamel te jtebxanix kʼan lajuk yuʼune. Pero naʼbot yoʼbolil sba yuʼun te Diose; ma jaʼuknax ta stojol, jaʼnix jich la snaʼbon yoʼbolil jba-euk, yuʼun jich maba ya jmelxan koʼtan-a te bin-utʼil ayonix ta mel-oʼtan-ae. 28 Jaʼ yuʼun ya jtikun ta atojolik ta oranax, yuʼun jich ya ata stseʼelil awoʼtanik te kʼalal ya awilik yan bueltae, jichme xkuxet kʼinal ya kaʼiy-euk-a. 29 Jich yuʼun, bayalukme stseʼelil awoʼtanik ya awikʼ ta atojolik jich te bin-utʼil ya awikʼ ta atojolik te jnopojeletik yuʼun te Kajwaltike. Jaʼnix jich, spisiluk-ora ay skʼoplal ta awoʼtanik te winiketik te jich stalelik te bin-utʼil te Epafrodito, 30 melel jtebxanix kʼan lajuk ta swenta spasbeyel yaʼtel te Cristoe,* la yakʼ ta wokol te skuxlejal yuʼun la yakʼbon te koltayel te ma juʼ la awakʼbonik te jaʼex ta skaj te maba liʼ ayexe.