Te lek yach’il k’op ya yal te Juan

8 12 Te Jesús jich la yalbeyxan te ants winiketik: «Joʼon sakal kʼinalon yuʼun te balumilal. Te machʼa ya stʼunon maʼyuk bin-ora ya xbeen ta ijkʼal kʼinal, yame sta te sakal kʼinal yuʼun te kuxlejalile». 13 Jich albot yuʼun te fariseoetike: «Atukelnax lek akʼoplal ya awalbey aba. Ma smeleliluk te bin ya awale». 14 Jich la yal te Jesús: «Manchukme ya kalbey jba lek jkʼoplal, smelelil te bin ya kale, melel ya jnaʼ te banti talemon sok ya jnaʼ te banti ya xboone. Pero, te jaʼexe ma xa anaʼik te banti talemone sok ma xa anaʼik te banti ya xboone. 15 Te jaʼexe jaʼnax ya alebeyik smul te yantik ta swentanax te bin ya ataik ta ilele; te joʼone maʼyuk machʼa ya jlebey smul. 16 Te ayuk machʼa ya kalbey smule, smelelilnanix-a te bin ya kale, melel maba jtukel ayon, sjokinojon te Tatil te la stikunon tale. 17 Jaʼnix jich, ta Ley awuʼunik jich tsʼibaybil: ‹Smelelil ya xkʼot te skʼop te chaʼtul testigoetike›. 18 Joʼon ya kalbey jba lek jkʼoplal, jaʼnix jich ya yalbon lek jkʼoplal te Tatil te la stikunon tale». 19 Jaʼ yuʼun, jich la sjojkʼoybeyik: «¿Banti ay te aTate?». Jich albotik yuʼun te Jesús: «Te jaʼexe ma xa anaʼbonik jba sok ma xa anaʼbeyik sba-euk te jTate. Te yakuk anaʼbonik jbae, ya anaʼbeyik sba-euk te jTat te jichuke». 20 La yal te kʼopetik ini te banti ay te cajaetik yuʼun smajtan Dios te kʼalal yak ta nojpteswanej ta templo. Maʼyuk machʼa la stsak, melel mato staojuk yorail te jich ya xkʼot ta stojole.

21 Jich la yalxan te Jesús: «Te joʼone yame xboon, yame aleonik, pero aynanix amulik ya xlajex bael-a. Te banti ya xboon te joʼone ma xjuʼ ya xbaex tey-a». 22 Jich jajch yalik te judioetike: «¿Yuʼunbal ya smil sba? Yuʼun jich la yal ‹Te banti ya xboon te joʼone, ma xjuʼ ya xbaex tey-a›». 23 Jich la yalxan: «Te jaʼexe jajchemex ta alan; yan te joʼone talemon ta toyol. Te jaʼexe yuʼunex te balumilal; yan te joʼone ma yuʼunukon te balumilal ini. 24 Jaʼ yuʼun la kalbeyex ‹Aynanix amulik ya xlajex bael-a›. Melel teme ma xa achʼuunik te joʼon te albil skʼoplal ya xtale, aynanix amulik ya xlajex bael-a». 25 Jaʼ yuʼun, jich och sjojkʼoybeyik: «¿Machʼaat-a?». Jich albotik yuʼun te Jesús: «¿Bin yuʼun te yato kalulanbeyexe? 26 Ay bayal te bin ya xjuʼ ya kal ta atojolike sok bayal te bin ya xjuʼ ya kichʼex ta kʼop yuʼune. Ta melel, te machʼa la stikunon tale smelelilnanix-a te bin ya yale, jaʼnix ya kal ta balumilal te bin la kaʼiy stojol te la yale». 27 Pero ma kʼot ta yoʼtanik te jaʼ yak ta yalbeyel skʼoplal te Tatile. 28 Jich la yal te Jesús: «Te kʼalal jipilix ta teʼ awuʼunik-a te sNichʼan te Winike,* jichme ya anaʼik te joʼon te albil skʼoplal ya xtale sok te maʼyuk bin ya jpas ta jtukel oʼtan-naxe, jaʼ ya kal te bin la yakʼbon jnop te Tatile. 29 Sjokinojon te machʼa la stikunon tale; maba yijkitayojon jtukel, melel spisil-ora jaʼ ya jpas te bin lek yoʼtan yuʼune». 30 Te kʼalal jich yak ta yalel-a te Jesuse, bayal machʼatik la yakʼ schʼuunel yoʼtanik ta stojol.

31 Te Jesús jich la yalbey te judioetik te chʼuunot yuʼune: «Teme jun awoʼtanik ta stojol te jkʼope, jaʼme smelelil jnopojelex kuʼun; 32 jichme ya anopik te smelelil kʼope, sok jaʼ ya yakʼex ta libre te smelelil kʼope». 33 Jich la yalbeyik te Jesús: «Talemonkotik ta stsʼumbal Abrahán sok maʼyuk bin-ora ay machʼa smosoinojonkotik. ¿Bin yuʼun te ya awal ‹Ya xjilex ta libre›, te xchiate?». 34 Jich albotik yuʼun te Jesús: «Jamal ya kalbeyex, spisil te machʼa ya sle smule mosoinbil yuʼun te mulile. 35 Jaʼnix jich, te machʼa ay ta mosoil ma spisiluk-ora ya xjil ta sna te yajwale; yan te nichʼanile spisil-ora ya xjil stukel. 36 Jich yuʼun, teme libre ya yakʼex te Nichʼanile, libre ya xjilex ta smelelil. 37 Ya jnaʼ te stsʼumbalex Abrahán; pero ya akʼan ya amilonik, melel ma xkʼot ta awoʼtanik te bin ya kalbeyexe. 38 Jaʼ ya kalbey skʼoplal te bin la kil te kʼalal ayon sok-a te jTate, yan te jaʼexe jaʼ ya apasik te bin awaʼiyojik stojol te ya yal te atatike». 39 Jich la yalbeyik te Jesús: «Jaʼ jtatkotik te Abrahán». Jich albotik yuʼun te Jesús: «Te jaʼuk yal snichʼnabex te Abrahán, jaʼ ya apasik te aʼtelil la spas te Abrahán te jichuke. 40 Pero ya akʼan ya amilonik, joʼon te ya kalbeyex te smelelil kʼop te la kaʼiy stojol te la yal te Diose. Ma jichuk la spas stukel te Abrahán. 41 Te jaʼexe jaʼ ya apasik te aʼtelil te ya spas te atatike». Jich la yalbeyik te Jesús: «Te joʼonkotike maba ayinemonkotik* ta mulwej;* jun-nax te jTatike, jaʼ te Diose».

42 Jich albotik yuʼun te Jesús: «Te jaʼuk aTatik te Diose, kʼuxon ta awoʼtanik te jichuke, melel jaʼ la stikunon tal te Diose, jaʼ yuʼun liʼ ayon. Ma jtukel oʼtanuknax te talone, jaʼ la stikunon tal te Diose. 43 ¿Bin yuʼun te ma xkʼot ta awoʼtanik te bin ya kalbeyexe? Jaʼ yuʼun te ma xa akʼan ya awaʼiyik stojol te jkʼope. 44 Te jaʼexe jaʼ atatik te Pukuje,* sok jaʼ ya akʼan ya apasik te skʼanojel yoʼtan te atatike. Kʼalalto ta sjajchibal jmilawal stukel. Maba jun yoʼtan la yakʼ sba ta swenta te smelelil kʼope. Melel maʼyuk ta yoʼtan te bin smelelile. Ta jujun buelta te ya spas lote, jaʼ ya yal te bin stalel ay ta yoʼtane, melel jpaslot stukel, sok jaʼ tatil yuʼun spasel lot. 45 Yan te joʼone, manchukme ya kalbeyex te bin smelelil, maba ya achʼuunbonik. 46 ¿Aybal jtulex te ya xjuʼ ya yakʼ ta ilel te ay jmule? Teme smelelil te bin ya kale, ¿bin yuʼun maba ya achʼuunbonik? 47 Te machʼa jaʼ yuʼun te Diose ya yaʼiybey skʼop te Diose. Jich bitʼil te maba yuʼunex te Diose, maba ya akʼan ya awaʼiybeyik te skʼope».

48 Te kʼalal jich la yaʼiyik stojole, te judioetik jich la yalbeyik te Jesuse: «¿Mabal smeleliluk te ya kaltik ‹Jaʼat samaritanoat sok te ochem pukuj ta awoʼtane›?». 49 Jich albotik yuʼun te Jesús: «Maʼyuk ochem pukuj ta koʼtan, te bin ya jpase jaʼ te ya kichʼ ta mukʼ te jTate, yan te jaʼexe maba ya awichʼonik ta mukʼ. 50 Te joʼone maba yakon ta sleel yutsil jkʼoplal; pero ay machʼa te yak ta sleel yutsil skʼoplal stukele, jaʼ te machʼa ya x-ichʼawan ta kʼope. 51 Jamal ya kalbeyex te machʼa ya schʼuunbon te jkʼope maʼyuk bin-ora ya yil te lajele». 52 Te judioetik jich la yalbeyik te Jesús: «Jamal chikan ta ilel te yuʼun-nix ay pukuj ta awoʼtan-ae. Laj te Abrahán, jaʼnix jich-euk te j-alwanejetike, pero te jaʼate jich ya awal: ‹Te machʼa ya schʼuunbon te jkʼope maʼyuk bin-ora ya yil te lajele›. 53 ¿Yuʼunbal jaʼ mukʼxan akʼoplal te bitʼil te jtatik Abrahán te laje? Jaʼnix jich lajik-euk te j-alwanejetike. ¿Machʼa ya akuy aba-a te jaʼate?». 54 Jich albotik yuʼun te Jesús: «Te yuʼunuk joʼon-nix ya jle yutsil jkʼoplal, maʼyuk skʼoplal ya xkʼot. Te machʼa ya yalbon yutsil jkʼoplale jaʼ te jTate, jaʼ te Dios awuʼunik ya awalike. 55 Pero, te jaʼexe ma xa anaʼbeyik sba; yan te joʼone ya jnaʼbey sba. Te yakuk kal te ma jnaʼbey sbae, yakon ta spasel lot jich bitʼil jaʼex te jichuke, yan te joʼone ya jnaʼbey sba ta smelelil sok ya jchʼuunbey te skʼope. 56 Te atatik Abrahán tseʼelnax yoʼtan la smaliy te bin-ora ya xtalone, la yil sok tseʼelnax yoʼtan yuʼun». 57 Jich albotik yuʼun te judioetike: «Mato ayuk 50 awaʼbilal, ¿bitʼil ay-a te ya awal te awiloj te Abrahane?». 58 Jich albotik yuʼun te Jesús: «Jamal ya kalbeyex te kʼalal mato x-ayin-a* te Abrahane, ayonix jtukel-a». 59 Jich yuʼun la stamik ton yuʼun ya schʼojik-a te Jesuse, pero la snakʼ sba sok lokʼ bael ta templo.